Mateu 2:1-23
2 Ísï tátsekua enga Jesúsi na andajpenupkia Beléni enga Judea jaka, imani jurhiatikuechani jimbo enga Erodesi* juramuni japka, jurhasptiksï Jerusaléni máru achamasïicha engaksï jóskuecheeri ambe mítekupka,* engaksï jini uératini jupka nani enga ísï jurhiata andarajka
2 ka kurhanguarhixaptiksï: “¿Nani jarhaski ima enga andajpenuka, enga jindeeka judiuecheeri juramuti? Jimbokachi exeska imeeri jóskuani engachi jimeesïsï japka nani enga jurhiata andarajka ka jurhaskachi parachi tinguixurhikuni”.*
3 Enga juramuti Erodesi kurhaapka ini ambe, ueenaspti chéni ka ístu iámindu Jerusaléni anapuecha.
4 Ka juramuti tánaantaspti iámindu kʼérati saserdotiichani ka iretarhu anapu karariichani ka kurhamarhiaspti nanisï andajpenupirini Kristu.*
5 Imeechaksï arhispti: “Jini Beléni enga Judea jaka, jimboka i ambesï karaka Tata Diosïiri uandakua pári:*
6 ‘Ka tʼu, ireta Beléni engari Judáeri echeri jimbo jaka, nóri ireta sapichu máeska imani juramutiichani japarini engaksï Judá jaka, jimboka jimini uéraaka juramuti ma enga orhekupaaka juchiiti ireta Israelini’”.
7 Jimajkani Erodesi sïpatikuarku pʼitajkuarhiaspti imeechani engaksï jóskuecheeri ambe mítekupka ka kurhamarhiaspti na jatinimindusï xarharapi jóskua.
8 Tátsekua Beléni axaaspti ka arhiaspti: “Ní je ka iápurisï jirinhanta je tataka sapichuni, ka engajtsï na exentaakia, kʼuanhatsenta je ka aianguakajtsïni parani jíjtuni nirani tinguixurhikuni”.
9 Ka enga juramuti na ísï arhiapkia, imeechaksï seguiriispti nirani. Ka ima jóskua engaksï exepka jiáni engaksï jimeesïsï japka enga jurhiata andarajka, imeecheeri orhepani jimbo niraxapti astaka anhaxurhipka jima karhakua enga tataka sapichu japka.
10 Ka kánikuaksï tsípispti engaksï exepka jóskuani.
11 Engaksï na inchapkia kʼumanchikuarhu, exesptiksï tataka sapichuni María jingoni, imeeri amamba. Jiájkani, tinguixurhisptiksï ka kʼéri ambeksï arhispti. Ístuksï mítaaspti kajeechani ka intsïmbisptiksï oru, olibanu ka mirra.
12 Joperu tsánharhikua ma jimbo, Tata Diosï arhiaspti eskaksï no jámapiringa Erodesini jingoni kʼuanhatsentani, jimboksïsï máteru xanharu jimbo níntapti imeecheeri iretarhu.
13 Ka engaksï imeecha na níntapkia, Tata Diosï Jeobaeri ánjeli tsánharhikua ma jimbo xarhakuspti Joséni ka arhispti: “Jauara, pá tataka sapichuni ka amambani ka ní Ejiptu sïpakuarhini ka jima pakara astakakeni ji arhiaka, jimboka Erodesi jámaaka jirinhantani tataka sapichuni para uándikuni”.
14 Jimajkani, José jauaraspti enga útasï chúripka, jauataspti tataka sapichuni ka amambani ka Ejiptu paaspti.
15 Ka jima pakaraspti astaka Erodesi uarhipka. Ka ísï niáraspti úkuarhini ambe enga Tata Diosï Jeoba tʼuini uandapkia imeeri uandakua párini jimbo: “Ióarhiska juchiiti sapini* para uéakuntani Ejiptu uératini”.
16 Erodesi kánikua ikiaspti enga mítepka eskaksï imeecha engaksï jóskuecheeri ambe mítekupka nóteru kʼuanhatsentaspkia. Ka exeparini na enga xáni ióni nitamapkia desde engaksï ima kʼuiripuecha ini ambe aiangupka, uándikutarkuarhiaspti iámindu tataka sapirhatiichani asta tsimani uéxurhini jatiriichani engaksï Beléni irekapka ka iámu jimeesïsï.
17 Ísï niáraspti úkuarhini ambe enga tʼuini uandakata japkia Jeremíasini jimbo, Tata Diosïiri uandakua pári:
18 “Jini Ramá kurhaakuarhispti nema uerani jarhani ka kánikua no sési pʼikuarherani. Rakeliispti enga uerani japka imeeri uájpeechani jimbo; no uékasïreendi eskaksï sési pʼikuastantapiringa jimbokaksï imeeri uájpeecha nóteru jarhaskia”.
19 Enga Erodesi na uarhipkia, Tata Diosï Jeobaeri ánjeli tsánharhikua ma jimbo xarhakuspti Joséni enga Ejiptu japka
20 ka arhispti: “Jauara, Israeli kʼuanhatsenta ka pánta tataka sapichuni ka amambani, jimbokaksï uarhiskia imeecha engaksï uékeenga uándikuni tataka sapichuni”.
21 Ísï jimbo, José jauaraspti ka kʼuanhatsentaspti Israeli ka pántaspti tataka sapichuni ka amambani.
22 Joperu chéspti Judea nirani enga mítepka eska jima Arkelau juramuxapkia ka nóteru taati jémbia Erodesi. Ístu, Tata Diosï arhispti tsánharhikua ma jimbo eska no jámapiringa jini nirani, jimbosï Galilea anapu echeri jimbo nípti.
23 Ka ireta ma jimbo pakaraspti irekani enga Nasareti arhinhajka. Ísï niáraspti úkuarhini ambe enga tʼuini uandakata japkia Tata Diosïiri uandakua páriichani jimbo: “Arhiatiksï eska Nasareti anapueska”.*
Notecha
^ Exe je Glosario, Erodesi.
^ O “máru maguecha”.
^ O “kʼéri ambe arhini”.
^ O “Erakukata”.
^ O “profeta”.
^ O “uátsïtini”.
^ Jamberi ebreu jimbo arhikuekajti ‘tsikixkurhita’.
