Mateu 21:1-46
-
Jesúsi inchaakusïndi Jerusaléni (1 a 11)
-
Petaantasïndi imeechani engaksï templurhu atarantani japka (12 a 17)
-
Xukasïndi jígusïiri anhatapuni ma (18 a 22)
-
Kurhamarhisïndiksï Jesúsini andisï ueeni ambe ma (23 a 27)
-
Ejemplu tsimani uájpeecheeri (28 a 32)
-
Ejemplu tarheriicheeri engaksï uándikpijka (33 a 46)
-
Nóksï jaiapanhentasïndi sánderu ambakiti tsakapuni (42)
-
21 Engaksï Jerusaléni no iauanisï jámani japka, niárasptiksï Betfagué, Olibusïiri juáta jimbo ka Jesúsi axaaspti imeeri tsimani chúxapatiichani
2 ka arhiaspti: “Ní je imani ireta sapichuni jimbo. Engajtsï na niáraakia, exentaakajtsï burru kutsïtini ma jótakuarhetini jarhani ka burru sapichuni ma. Kuerataa je ka juácheajtsïni je.
3 Engaksïni nema arhiska ambe ma, chá arhi je: ‘Juchaari Tatasï uékani jati úraani’. Ka imaksïni jirejiresï jiájkutauati”.
4 Iámindu i ambe ísï úkuarhispti paraka niárapiringa úkuarhini ambe enga Tata Diosïiri uandakua pári* uandapkia:
5 “Arhi je Sioniiri uátsïni: ‘¡Exe! Chiiti juramutikeni jurhaxati andarhierani. Kaxumbitiisti* ka burruni ma jatapuxati, jo, burru sapichuni ma’”.
6 Ísï jimbo, imeeri chúxapatiichaksï niraspti ka úsptiksï ambe enga Jesúsi arhiapka.
7 Ka imeechaksï juákuspti burru kutsïtini ka burru sapichuni ka imeecheeri xukuparhakua ambeksï tatsuparhakuaspti ka Jesúsi jataspti.
8 Ka sáno iámindu kʼuiripuechaksï tatsuntskakuspti xanharu jimbo imeecheeri xukuparhakua ambe. Máteruechaksï pímu ambe pʼikuspti ka xanharu jimboksï jatsintskakuspti.
9 Ístu, uánikua kʼuiripuecha engaksï orhekupani japka Jesúsini ka engaksï imeeri tátsepani jimbo nirani japka, uinhachasïreendiksï: “¡Oh, Tata Diosï, kuájchaku Dabidi Uájpani! ¡Újchakuranhasti ima enga Tata Diosï Jeobaeri nombri jimbo jurhani jaka! ¡Oh, Tata Diosï, tʼu engari auandarhu jaka, kuájchaku!”.
10 Enga ima inchaakupka Jerusaléni, iámindu kʼuiripuechaksï ueenaspti mámaru ambe uandani ka kurhanguarhisïrendiksï: “¿Neeski i?”.
11 Ka kʼuiripuechaksï uandasïreendi: “¡Tata Diosïiri uandakua páriisti enga Jesúsi arhinhajka, Nasareti anapu enga Galileaisï jaka!”.
12 Jesúsi templurhu inchaspti ka iáminduechani petaantaspti engaksï jima atarantani japka ka engaksï piáni japka ambe ma. Menonhaaspti imeecheeri meseechani engaksï sentabu ambe mójtakutspienga ka imeecheeri bankuechani engaksï palomasïichani atarantauenga.
13 Ka arhiaspti: “Karakata jarhasti ‘Juchiiti kʼumanchikua jindeuati parajtsïni kʼuiripuecha jima kómarhini’, joperujtsï chá úxaka eska ísïiuaka komueska kueba ma nani engaksï sïpariicha jarhajka”.
14 Enga Jesúsi útasï templurhu japka, andarhierasptiksï ima kʼuiripuecha engaksï no ueenga exeni ka ístu imeecha engaksï rengejteenga ka ima ambakeraantaspti.
15 Kʼérati saserdotiicha ka karariichaksï kánikua ikiaspti engaksï exepka na enga xáni ambakiti ambe úni japka Jesúsi ka ístu engaksï sapiicha uinhachani japka templurhu “¡Oh Tata Diosï, kuájchaku Dabidi Uájpani!”.
16 Ísï jimbo, imeechaksï arhispti Jesúsini: “¿Kurhaaxakiri ambe engaksï uandani jaka?”. Jesúsi arhiaspti: “Jo, kurhaaxaka. ¿Andi chá no méni arhintaski arini ambe: ‘Sapiicha ka charhakuechaksïni kʼéri ambe arhisïndi’?”.
17 Tátsekua, jima jurajkuaspti ka uéakuntaspti iretarhu uératini ka Betania niraspti, jima pakaraspti ima chúri.
18 Ka xarhentku enga kʼuanhatsentani japkia iretarhu, ueenaspti kʼarhimani.
19 Jimajkani, xanharu jimbo exespti jígusïiri anhatapuni ma ka niraspti andarhierani joperu no ma jígusï jukaspti, chkurhi ambejkusï jukapti. Ka arhispti: “Nóteruri méni jukaakia jígusï”. Ka anhatapu mátirku kʼarhispti.
20 Engaksï imeeri chúxapatiicha exepka ini ambe, ískuksï pakaraspti ka uandasptiksï: “¿Andisï anhatapu mátirku kʼarhi?”.
21 Jesúsi arhiaspti: “Jíksïni arhisïnga eska engajtsï mintsikaska ka jakajkuni eska ísï úkuarhiaka, chájtsï no ini ambejku uaaka ambe engani ji úkuka jígusïiri anhatapuni, sino ístujtsï arhiaka ini juátani ‘Manakuarhi ka marirhu kʼuanime’ ka ísï úkuarhiati.
22 Iámindu ambe engajtsï kurhakuaka Tata Diosïni, íntskuatiksïni engajtsï mintsikaparini kómarhiska”.
23 Tátsekua, enga na templurhu inchapka, kʼérati saserdotiicha ka iretarhu anapu orhejtsïkutiichaksï andarhieraspti enga ima jorhentpini japka ka kurhamarhisptiksï: “¿Andiresï ini ambe újki? ¿Ka nékini arhiski parari ísï úni?”.
24 Jesúsi arhiaspti: “Jíjtuksïni kurhamarhiaka ambe ma. Engajtsïni chá aianguska, jíjtuksïni arhiaka nérini arhiski parani ini ambe úni.
25 ¿Né arhiski Juanuni eska itsï ataapiringa* kʼuiripuechani? ¿Tata Diosï o kʼuiripuecha?”. Imeechaksï ueenaspti mámaru ambe uandani. Uandasïreendiksï: “Engachi arhiska eska Tata Diosï, indejtsïni arhiati: ‘Jiájkani, ¿andijtsïsï no jakajkukupi?’.
26 Ka engachi uandaska eska kʼuiripuecha, chésïngachi jimbokaksï iáminduecha uandasïnga eska Juanu Tata Diosïiri uandakua páriispka”.
27 Ísï jimbo, arhisptiksï: “Nóchi míteska”. Ka Jesúsi arhiaspti: “Jiájkani jíjtuksïni no aianguaka nérini arhiski parani ini ambe úni.
28 ”¿Nájtsï exesïni arini ambe? Achamasï ma tsimani uájpeechani kaasïreendi, andarhieraspti máechakuani ka arhispti: ‘Iju, ní ánchikuarhini iásï jima engani ubasï jatsikuka’.
29 Uájpa arhispti: ‘No niuaka’. Joperu tátsekua no sési pʼikuarheraspti ka niraspti.
30 Tátsekua, achamasï andarhieraspti máteru uájpani ka májkueni arhispti. Ka uájpa arhispti: ‘Jo, tata, niuaka’. Joperu tátsekua no niraspti.
31 Jiájkani, ¿né úspi ambe enga taati jémba uékeenga?”. Imeechaksï arhispti: “Ima enga orheta arhinhapka”. Jesúsi arhiaspti: “Jíksïni sési jimbo arhisïnga eskaksï ima orheta inchaaka Tata Diosïiri Reinurhu engaksï impuestu kobrarpijka ka uarhiitiicha engaksï ísku jándiika.
32 Jimboka Juanu jurhaska ka exerastiksïni nénasï jindee para sési jámani,* ka chájtsï no jakajkukuska. Joperu imeechaksï kʼóru jakajkukusti engaksï impuestu kobrarpijka ka uarhiitiicha engaksï ísku jándiika. Ka nájkiruka chá exeka indeni ambe, nójtsï móantaska ka nójtsï jakajkukuska.
33 ”Kurhaa je máteru ejempluni. Achamasï ma enga echeri ma jatsipka, ubasï jatsikuspti ka tsirindaspti. Ístu, jima jarhakuspti paraksï ubasï tsitanduni ka torre ma úspti. Tátsekua, echerini amediasï íntsaaspti tarheriichani ka iauanisï niraspti.
34 Jiáni enga tiempuepkia para ubasï pʼikuntani, axaaspti imeeri jántspiriichani paraksï arhiani tarheriichani eskaksï arhukukuntapiringia ubasïni.
35 Joperu tarheriichaksï jupikaaspti jántspiriichani. Máechakuanksï ataspti, máterunksï uándikuspti ka máterunksï tsakapu jimbo ataspti.
36 Tátsekua, achamasï axaaspti sánderu uánikua jántspiriichani, joperuksï imeechantu májkueni kaaspti.
37 Ka últimu axaspti imeeri uájpani, jimboka eratsesïreenga: ‘Juchiiti sapinksï* kʼóru janhanharhiati’.
38 Joperu engaksï exepka uájpani, tarheriichaksï arhijperaspti: ‘I jindeesti ima enga pʼiuaka erensiani. ¡Ju je uándikuni parachi jucha pakatakuarhini erensiani!’.
39 Ísï jimbo, jupikasptiksï uájpani, petaatantasptiksï ka uándikusptiksï.
40 Jiájkani, ¿ambe úkuaua tarheriichani ima achamasï enga ubasï jatsikuka enga na junguakia?”.
41 Imeecha engaksï kurhajchani japka, arhisptiksï: “Jimbokaksï xáni no ambakeska, ima méntku kʼamajkuauati ka máteru tarheriichani íntsauati echerini, imeechaksï kʼóru íntskuntaati ubasï jiáni enga tiempueuaka”.
42 Jesúsi arhiaspti: “Karakata arhisïndi: ‘Ima tsakapu engaksï kʼumanchikua úriicha no jiókuarhika, ima jindeesti sánderu ambakiti tsakapu.* Tata Diosï Jeobani jimbo jurhasti ka kánikua ambakiti ambeesti para jucha’. ¿Andi chá no méni arhintaxapi ini ambe?
43 Ísï jimbo, jíksïni arhisïnga eskajtsï chá euanhantaaka Tata Diosïiri Reinuni ka ima ireta intsïnhaati enga uaaka ambe enga Tata Diosï uéjka.*
44 Ístu, ima enga ini tsakapurhu andatseraaka, méntku xerendurhikuarhiati. Ka enga i tsakapu jatajchakuska nemani, méntku puchandurhiati”.
45 Engaksï kʼérati saserdotiicha ka fariseuecha kurhaapka ini ambe, pʼíkukuarhintasptiksï ambe enga Jesúsi uandani japka.*
46 Uékasïreendiksï jupirkuarhini joperuksï chérhiasïreendi kʼuiripuechani jimbokaksï uandasïreenga eska Tata Diosïiri uandakua páriispka.
Notecha
^ O “profeta”.
^ O “Iatsitakuarhu jámasïndi”.
^ Exe je Glosario, itsï atakuarhini; itsï atani.
^ O “exerastiksïni xanharuni enga sési jaka”.
^ O “uátsïtinksï”.
^ O “eskinarhu anapu tsakapu”. Indeni tsakapunisï arhikuekani jati enga kʼumanchikuarhu karhakua jukeenga para eskinani ma jójtsïtani para sánderu uíuinhasï jarhani.
^ Griegu jimbo: “enga frutu íntspiaka”.
^ O “kurhangusptiksï eska Jesúsi imeechanisï arhikuekaani japka”.
