Mateu 22:1-46
22 Jesúsi ménderu ejempluechani jingoni jorhendaaspti. Arhiaspti:
2 “Auandarhu anapu Reinu ísïisti komueska juramuti ma enga tembuchakua úkuntapka uájpani.
3 Ka imeeri jántspiriichani axaaspti paraksï ióarhiani imeechani engaksï tembuchakuarhu pʼímarhinhapka, joperuksï iicha no uékaspti jurhani.
4 Tátsekua, axaaspti máteru jántspiriichani ka arhiaspti: ‘Arhia je imeechani engaksï pʼímarhinhaka: “Exe je, tʼirekua jarhastia. Uándikutarkuarhiaskia toruechani ka animali pʼukurakateechani. Iámindu ambe jarhastia. Ju je tembuchakuarhu”’.
5 Joperuksï imeecha ísku kurhajchaaspti, máechakua tarheni niraspti ka máteru ánchikuarhini
6 ka máteruechaksï jupikaaspti jántspiriichani, ataasptiksï ka uándikuasptiksï.
7 ”Jimajkani juramuti kánikua ikiaspti ka axaaspti sondaduechani para kʼamajkuani imeechani engaksï jántspiriichani uándikuapka ka kurhiraspti imeecheeri iretani.
8 Tátsekua arhiaspti imeeri jántspiriichani: ‘Iámindu ambe jarhastia para tembuchakua, joperu imeecha engaksï pʼímarhinhapka nóksï jukanchaspti para ixú jarhani.
9 Ísï jimbo, ní je iretarhu uéakumanisï ka pʼímarhia je tembuchakuarhu iáminduechani engajtsï xanharu jimbo exeantauaka’.
10 Ísï jimbo, jántspiriichaksï niraspti iretarhu uéakumanisï ka tánaantasptiksï iámindu imeechani engaksï xanharu jimbo exeantauenga; ambarhati kʼuiripuechani ka ístu no sési úriichani. Ka uánikua kʼuiripu niraspti* tembuchakuarhu.
11 ”Enga juramuti inchapka para exeani imeechani engaksï nípka, acheetini ma exespti enga no ísï xukuparhatini japka eska na jindeeka para tembuchakuarhu ma nirani.
12 Ísï jimbo, juramuti arhispti: ‘Amigu, ¿andiresï no jukanta tembuchakuarhu anapu xukuparhakua?’. Ka acheeti ísku pakaraspti.
13 Jimajkani juramuti arhiaspti imeeri jántspiriichani: ‘Jónduku je ka jójkuni ka uérakua peta je jima enga pápkʼandeka. Jimasï pʼíaraati uerani ka kirisïmiantauati sïniichani’.*
14 ”Jimbokaksï uánikua pʼímarhinhasïnga, joperu namunitkuksïsï erakunhajti”.
15 Jimajkani fariseuechaksï kéndikuspti ka ueenasptiksï eratseni néna no sési ambe uandarani.
16 Ísï jimbo, fariseuechaksï axaaspti imeecheeri chúxapatiichani ka ístu Erodesiiri chúxapatiichani paraksï arhini Jesúsini: “Jorhentpiri, míteskachi eskari tʼu méntkisï jurhimbikua jingoni uandasïnga ka eskari jurhimbikua ambe jorhentpisïnga Tata Diosïiri ambe. Eskari no nemani jingoni uékasïnga sési pakarani, jimbokari tʼu no imani ambejku exesïnga na enga xarharajka kʼuiripu ma.
17 Jiájkani arhijtsïni, ¿tʼu na exesïni? ¿Sési jarhaski impuestu maiamuni Roma anapu juramutini* o nómbe?”.
18 Joperu Jesúsi mítespti na engaksï xáni no ambakepka, jimbosï arhiapti: “Ísku apariicha, ¿andijtsïnisï tsʼéjkujki?
19 Exerajtsïni je moneda ma para impuestu maiampini”. Ka imeechaksï denariu ma* juákuspti.
20 Jesúsi kurhamarhiaspti: “¿Neeski i enga ixú jukanharhitini jaka ka neeri nombri karakata jarhaski ixú?”.
21 Imeechaksï arhispti: “Roma anapu juramutiiri”. Ka Jesúsi arhiaspti: “Jiájkani, íntsku je Roma anapu juramutini ambe enga imeeriika, joperu Tata Diosïni ambe enga Tata Diosïiriika”.
22 Imeechaksï ísku pakareeraspti engaksï ini ambe kurhaapka. Nóteruksï ambe ma arhisptia ka kéndikusptiksï jima uératini.
23 Imani mismu jurhiatikua jimbo, saduseuechaksï jurhaspti —imeecha engaksï no jakajkujka eskaksï uarhiriicha tsíntaaka— ka kurhamarhisptiksï:
24 “Jorhentpiri, Moisési uandaspti: ‘Enga achamasï ma niáraska uarhini ka no ma sapini kánguarhini, imeeri ermanu jémba jatsisti para tembuntani uarhiitini para uájpeechani jurajkukuani ermanu jémbani enga uarhikia’.
25 Exe, ixúksï irekaspti siete kʼuiripuecha engaksï ermanuepka. Ima enga orheteepka, tembuchaspti joperu tátsekua uarhispti, ka jimboka no ma sapini kámaspka, ermanu jémba jatsispti para tembuntani uarhiitini
26 ka imajtu uarhispti ka ístu máteru..., ka ísïksï nipaspti astakaksï siete ermanu jémbeecha uarhipka.
27 Ka engaksï na iáminduecha uarhipkia, uarhiitijtu chúngumaantaspti.*
28 Arhijtsïni, jiáni engaksï uarhiriicha tsíntaaka, ¿neeri témbeua ima uarhiiti? Jimbokaksï iáminduecha tembuspka uarhiitini”.
29 Jesúsi arhiaspti: “Chájtsï támisï jarhaska jimbokajtsï no kurhangusïnga ambe enga arhijka Tata Diosïiri Karakata nijtu na enga xáni uinhapitiika Tata Diosï.
30 Jimboka jiáni engaksï uarhiriicha tsíntaaka, tatakeechaksï no tembuchaati nijtuksï nanakecha uambuchani. Sánderu sési, ísïistiksï eskaksï ánjeliicha engaksï auandarhu jaka.
31 Ka ístu, ¿andi nójtsï méni arhintaski ambe engaksïni Tata Diosï arhika ima jurhiatikueri engaksï uarhiriicha tsíntaaka? Ima uandaspti:
32 ‘Ji jindeeska Abraániiri Tata Diosï, Isaakiiri Tata Diosï ka Jakobueri Tata Diosï’. Ima no uarhiriicheeri Tata Diosïisti, sino imeecheeri engaksï tsípiti jaka”.
33 Ka kʼuiripuechaksï ísku pakaraspti engaksï kurhaapka ambe enga Jesúsi jorhentpienga.
34 Engaksï fariseuecha mítepka eskaksï saduseuecha nóteru ambe ma úspkia arhini Jesúsini, tánguarhintasptiksï paraksï májku kʼéri úkuarhintani.
35 Ka fariseu ma enga sési mítepka ambe enga Lei arhijka, arini ambe kurhamarhispti para tsʼéjkuni:
36 “Jorhentpiri, ¿náki mandamientu sánderu jukaparhakueski?”.
37 Jesúsi arhispti: “‘Xéncha chiiti Tata Diosï Jeobani iámu chiiti mintsita jingoni, iámu chiiti alma* jingoni ka iámu chiiti eratsekua jingoni’.
38 I jindeesti orheta mandamientu ka enga sánderu jukaparhakueka.
39 Ka máteru enga sáno májkueni arhijka, jindeesti: ‘Xénchaa máteru kʼuiripuechani* ísï eskari tʼujkumindu na xénchakuarhijka’.
40 Ini tsimani mandamientuecha jimbo uaxastakata jarhasti ambe enga xáni karakata jaka Leirhu ka ambe engaksï xáni uandaka Tata Diosïiri Uandakua Páriicha”.*
41 Ka engaksï fariseuecha jima japka tánguarhintatini, Jesúsi kurhamarhiaspti:
42 “¿Ambejtsï eratsesïni chá Kristueri ambe? ¿Né uájpeeski?”. Imaksï arhispti: “Dabidi uájpeesti”.
43 Jesúsi kurhamarhiaspti: “Jiájkani, ¿andisï Dabidi espiritu santuni jimbo arhijki ‘juchiiti Tata’? Jimboka ima uandaspka:
44 ‘Tata Diosï Jeoba arhisti juchiiti Tatani: “Uaxaka juchiiti jurhijkandani jimbo asta jiáni engakeni chiiti jantsiriicharhu kétsekua peerachiauaka imeechani engaksïni ikiachejka”’.
45 Enga Dabidi ísï arhijka ‘juchiiti Tata’, ¿andisï imeeri uájpee?”.
46 Ka no nema úspti kurhakuni. Ka jiáni uératini nóteru nema tekaasptia kurhamarhini ambe ma.
Notecha
^ O “jarhaspti engaksï mesarhu uaxaparhakupka”.
^ Indenisï arhikuekani jati enga kʼuiripu ma kánikua ikiani jarhajka ka no jánhaskani ambe úni.
^ Griegu jimbo: “Sésarini”. Ísïksï arhiasïreendi máru Roma anapu juramutiichani.
^ Denariu ma, jindeespti moneda ma plateeri Roma anapu. Xánksï maiamusïreendi kʼuiripuni ma enga ma jurhiatikua ánchikuarhienga.
^ O “uarhispti”.
^ O “tsípikua”. Exe je Glosario, alma.
^ O “Xéncha chiiti prójimuni”.
^ O “Profeteecha”.
