Mateu 24:1-51
-
AMBE ENGA ÚKUARHINI JAUAKA ENGA KRISTU IXÚ JAUAKIA (1 a 51)
-
Uarhiperakua, kʼarhimakua ka jenchekua ambe (7)
-
Uandanhantaati ambakiti aianhperakua (14)
-
Kánikua no sési nitamakuarhinhaati (21 ka 22)
-
Achamasïiri Uájpeeri mínda (30)
-
Jígusïri anhatapu (32 a 34)
-
“Ísï eska na jánhaskuarhipka Noéri jurhiatikuechani jimbo” (37 a 39)
-
“Méntkisï jingontku ja je” (42 a 44)
-
Jántspiri enga mintsinharhikueka ka jántspiri enga no ambakeka (45 a 51)
-
24 Enga Jesúsi uéntani japkia templurhu, imeeri chúxapatiichaksï andarhieraspti ka exerasptiksï na enga xáni kʼépka templu.
2 Jimajkani Jesúsi arhiaspti: “¿Exexakijtsï iámindu i ambe? Jíksïni sési jimbo arhisïnga eska no ma tsakapu tsïntsïkata pakaraaka. Méntku iámindu ambe xerenhantaati”.
3 Enga Jesúsi juáta Olibusïrhu uaxakatini japka, imeeri chúxapatiichaksï andarhieraspti enga ima jandiajkuterku japkia ka kurhamarhisptiksï: “Aiangujtsïni, ¿na jatini úkuarhia i ambe ka nénachi mítea eskari tʼu ixú jarhaskia* ka eska nóteru ióni kuerataxakaia para kʼamajkunhani parhakpini?”.*
4 Ka Jesúsi arhiaspti: “Xéparini je. Eskaksïni no nema támisï jánhastaaka,*
5 jimbokaksï uánikua juuaka juchiiti nombrini úraparini ka uandaatiksï ‘Ji jindeeska Kristu’, ka uánikua kʼuiripuechanksï támisï jánhastauati.
6 Chájtsï kurhauaka eska uarhiperanhaxaka. Xéparini je ka asï jáma je chéni, jimboka i ambe jatsiska para ísï úkuarhini, joperu nótki kʼamajkunhaati parhakpini.*
7 ”Jimboka ireta ma uarhiperaaka máteru ireta jingoni ka juramukua ma máteru juramukua jingoni ka kʼarhimakua ambe jauati ka uápurisï jencheati.
8 Ka iámindu ini ambe jimbo, kʼuiripuechaksï úndaati kánikua no sési nitamakuarhini.*
9 ”Jiánisï, no sésiksïni kámaati ka uándikuatiksïni ka iámindu ireteechaksïni kurhunhiati jíndeni* jimbo.
10 Ka uánikua kʼuiripuechaksï nóteru mintsikaatia Tata Diosïni ka traisionarperaatiksï ka kurhunhperani.
11 Ka uánikuaksï uandaati eskaksï Tata Diosïiri uandakua páriiska* ka uánikua kʼuiripuechanksï támisï jánhastauati,
12 ka enga kʼuiripu sánhani arhini jauaka sánderu no sési úriini,* sáno iáminduechaksï nóteru xénchpeatia.
13 Joperu ima enga tekaantaaka astaka kʼamajkunhaaka parhakpini* pʼímutantskata uéraati.
14 Ka ambakiti aianhperakua Tata Diosïiri Reinueri, iámu parhakpinirhu uandanhantaati paraksï iámindu ireteecha mítetini jarhani ka jimajkani kʼamajkunhaati parhakpini.*
15 ”Ísï jimbo, engajtsï exeaka anhandetini jarhani jima enga pímbinhasïika imani ikichakueni jásï ambe enga iámindu ambe kʼamajkujka, ísï eska na uandapka Danieli Tata Diosïiri uandakua pári —kurhanguntee ima enga arhintajka—,*
16 eska imeecha engaksï Judea jauaka, eskaksï juátarhisï niuaka sïpakuarhini.
17 Ima enga kʼumanchikuarhu karhakua jámani jauaka, eska no kétsentaaka para petakuarhini ambe ma
18 ka ima enga tarhetarhisï* jámani jauaka, eska no kʼuanhatsentaaka para jirinhantani imeeri xukuparhakuani.
19 ¡Lástima ima uarhiitiicha engaksï embarasada jámani jauaka imani jurhiatikuechani jimbo o ima uarhiitiicha engaksï útasï tʼirerani* jauaka charhakuni!
20 Méntku kómarhini ja je Tata Diosïni parakajtsï no jiánisï sïpakuarhiaka enga iauani* jauaka o sábadu jurhiatikua ma jimbo.
21 Jimboka imani jurhiatikuechani jimbo, kánikua no sési nitamakuarhinhaati. No méni ísï nitamakuarhinhaxapti desde enga kʼuiripu kueraanhaka ka nóteru méni ísï nitamakuarhinhaatia.
22 Ka enga i tiempu no arisku nitamapiringa, no nema pʼímutantskata uérapirindi; joperu i tiempu arisku nitamaati erakukateechani jimbo.
23 ”Ísï jimbo, engaksïni nema arhiaka ‘¡Exe je, Kristu ixú jarhasti!’ o ‘¡Jini jarhasti!’, asï jáma je jakajkuni.
24 Jimbokaksï niáraaka jarhani kʼuiripuecha engaksï uandaaka eskaksï kristueska o eskaksï Tata Diosïiri uandakua páriiska. Ka kʼérati milagruechanksï uaauati ka uánikua máteru ambe* paraksï jánguarhintani támisï jánhastaani erakukateechani jamberi.
25 Joperu jíksïni xarheni aianguxaka ini ambe.
26 Ístu, engaksïni arhiska ‘¡Exe je, desierturhisï jámaxati!’, asï jáma je nirani; ka engaksïni arhiska ‘¡Exe je, kʼumanchikuarhu jarhasti!’, asï jáma je jakajkuni.
27 Jimboka ísï eska piritakua na úkuarhijka jimeesïsï enga jurhiata andarajka ka jimeesïsï jamberi xarharani enga jurhiata inchajtsïkujka, ísïiuati jiáni enga Achamasïiri Uájpa ixú jauakia.*
28 Jimaksï niáraati águileecha nani enga uarhiri jauaka.*
29 ”Enga na nitamaakia ima tiempu enga xáni no sési nitamakuarhinhaaka, jurhiata pátakuarhiati, luna nóteru tʼíntskaatia ka jóskuechaksï uekorheati, ka auandarhu anapu ambe méntku jiniani ka ixúani manatanhaati.
30 Jimajkani, xarhancheati Achamasïiri Uájpeeri mínda* ka iámu parhakpini anapu ireteechaksï uánheati xáni no sési pʼikuarherani ka exeatiksï Achamasïiri Uájpani auandarhu anapu nubeecharhisï jurhani jarhani iámu imeeri uinhapikua jingoni.
31 Ka enga kurhaakuarhiaka uinhamu kústanhani trompeta, ima axauati imeeri ánjeliichani paraksï tánaantani imeeri erakukateechani engaksï iámu parhakpinirhu jaka,* jima uératini enga sánderu iauaniika auandarhu asta máteru ladu jimbo.
32 ”Exe je jígusïiri anhatapuni. Enga tsikirhikuarhentani jarhajkia, chájtsï míteska eska no ióni jimbo emendeuakia.
33 Májkueni, engajtsï chá exeaka eska iámindu i ambe úkuarhixakaia, mítetini ja je eska Achamasïiri Uájpa janoxakaia, eska puertarhu jarhaskia.
34 Jíksïni sési jimbo arhisïnga eskaksï iásï anapu kʼuiripuecha útasï jauaka enga iámindu i ambe úkuarhiaka.
35 Auanda ka echeri no méntkisï jauati, joperu ambe engani ji uandajka pakaraati para méntkisï.
36 ”Joperu no nema mítesti na jatini ka na jandora úkuarhia i ambe, ánjeliichajtuksï no mítesti engaksï auandarhu jaka, nijtu Uájpa, Taatijkusï míteti.
37 Jimboka ísï eska na jánhaskuarhipka Noéri jurhiatikuechani jimbo, májkueni jánhaskuarhiati jiáni enga Achamasïiri Uájpa ixú jauakia.*
38 Jimboka imani jurhiatikuechani jimbo ante de xáni kʼéri janini,* kʼuiripuechaksï tʼirexapti ka itsïmani, tatakeechaksï tembuchaxapti ka nanakeecha uambuchani... asta imani jurhiatikua jimbo enga Noé arkarhu inchapka;
39 ka nóksï kasu úspti asta ima jurhiatikua enga xáni kʼéri janipka ka iáminduechani kʼamajkuani. Ka májkueniuati jiáni enga Achamasïiri Uájpa ixú jauakia.*
40 Jiánisï, tsimani acheetiichaksï tarhetarhisï jámani jauati: máechakua pánhaati ka máteru jurajkunhaati.
41 Tsimani uarhiitiichaksï urhuni jauati molinurhu: máechakua pánhaati ka máteru jurajkunhaati.
42 Ísï jimbo, méntkisï jingontku ja je, jimbokajtsï no míteska na jatini juua chaari Tata.
43 ”Enga kʼumanchikuarhu anapu achamasï mítepiringa na jandora niárapirini sïpari chúrikua, no kʼuípirindi ka no jurajkupirindi eska inchaakukupiringa, ¿no ísïiski?
44 Ísï jimbo, chájtu jingontku ja je, jimboka Achamasïiri Uájpa ima jandora juuaka engajtsï chá no jamberi erokuarhini jauaka.
45 ”¿Né jindeeski ima jántspiri enga mintsinharhikueka ka jánhaskatiini, enga kʼumanchikuarhu anapu achamasï jurajkukuaka iámindu imeeri jántspiriichani para tʼireraani jiáni engaksï uétarhinchani jauaka?
46 ¡Kánikua tsípiati ima jántspiri enga kʼumanchikuarhu anapu achamasï exenunguaska indeni ambe úni jarhani!
47 Jíksïni sési jimbo arhisïnga eska imeeri jájki jimbo jurajkuaka iámindu imeeri jatsikuarhekua ambe.
48 Joperu enga ma repentku ima jántspiri no ambakeaka ka eratseni ‘Juchiiti tata ióndaxatiia junguani’
49 ka pʼiárani ataani máteru jántspiriichani ka ístu ueenani imeecha jingoni tʼireni ka kauini engaksï ísku tsïnchentajka,
50 kʼumanchikuarhu anapu achamasï jiáni junguati enga ima no erontani jauaka ka ima jandora enga ima no míteka,
51 ka sánderu no sési jásï ambe úkuati indeni jántspirini ka ísku apariicha jingoni peeraati. Jimasï pʼíaraati uerani ka kirisïmiantauati sïniichani.*
Notecha
^ Exe je Glosario, enga Jesúsi ixú jauakia.
^ O “para kʼamakurhini i tiempu”. Exe je Glosario, tiempu.
^ O “támisï paaka”.
^ O “nótki kʼamakurhiati tiempu”. Exe je Glosario, tiempu.
^ O “úndaati ísï pʼamerani eska uarhiiti ma enga ambakentani jarhajka”.
^ O “juchiiti nombri”.
^ O “eskaksï profeteeska”.
^ Griegu jimbo: “nóteru imani ambe únia enga lei arhijka”, indenisï arhikuekani jati nóteru janhanharhinia ambe enga Tata Diosï juramujka.
^ O “astaka kʼamakurhiaka tiempu”. Exe je Glosario, tiempu.
^ O “kʼamakurhiati tiempu”. Exe je Glosario, tiempu.
^ Imani kʼuiripunisï arhikuekani jati enga arhintajka ambe enga Danieli karaka.
^ O “uéramanisï”.
^ O “lechi íntskuni”.
^ O “iéstani”.
^ O “kʼéri ambe”.
^ Exe je Glosario, enga Jesúsi ixú jauakia.
^ Griegu jimbo, ixú kʼuiripu uarhirini ma arhikuekaxati o animali uarhirini ma.
^ O “seniali”.
^ O “engaksï tʼápuru uératini parhakpinirhu jaka”.
^ Exe je Glosario, enga Jesúsi ixú jauakia.
^ O “ante de Dilubiu úkuarhini”.
^ Exe je Glosario, enga Jesúsi ixú jauakia.
^ Indenisï arhikuekani jati enga kʼuiripu ma kánikua ikiani jarhajka ka no jánhaskani ambe úni.
