Mateu 4:1-25
4 Jimajkani, espiritu santu páspti Jesúsini desierturhisï ka Noambakiti tsʼéjkuspti jima.
2 Tátsekua Jesúsi ueenaspti kʼarhimani jimboka 40 jurhiatikua ka 40 chúrikua kʼarhinda jarhaspka.*
3 Ka Noambakiti tsʼéjkuspti ka arhispti: “Engari tʼu Tata Diosïiri uájpeeka, arhia ini tsakapuechani eskaksï kurhinda úkuarhintaaka”.
4 Joperu Jesúsi arhispti: “Karakata jarhasti: ‘No kurhinda jimbojkusï jatsiti para irekani kʼuiripu ma, sino iámindu imani ambe jimbo enga Tata Diosï Jeoba uandajka’”.
5 Tátsekua, Noambakiti páspti imani iretarhu enga pímbinhasïika, jima peeraspti enga sánderu iótaka templurhu
6 ka arhispti: “Engari tʼu Tata Diosïiri uájpeeka, kʼuanikurhi, jimboka karakata jarhaska: ‘Ima juramukuauati imeeri ánjeliichani paraksïni jurhani jarhuatani’ ka ‘Paatiksïni imeecheeri jájkiicha jimbo parari méntku no ma tsakapu jingoni atakuarhini jantsirirhu’”.
7 Jesúsi arhispti: “Joperu ístu karakata jarhasti: ‘Asï jáma tsʼéjkuni chiiti Tata Diosï Jeobani’”.
8 Tátsekua, Noambakiti páspti juáta ma jimbo enga kánikua kʼépka ka exeraaspti iámu parhakpini anapu juramukuechani ka ambe engaksï xáni jatsikuarhepka.
9 Ka arhispti: “Jíkeni iámindu ambe íntskuaka engari tinguixurhiska ka engareni ma xanharku kómarhiska”.
10 Jimajkani Jesúsi arhispti: “¡Kéndikucherini Satanási! Jimboka karakata jarhaska: ‘Kómarhi chiiti Tata Diosï Jeobani ka imantku marhuaku’”.
11 Jiájkani Noambakiti kéndikukuspti ka máru ánjeliichaksï jurhaspti ka ueenasptiksï íntskuni Jesúsini ambe enga xáni uétarhinchani japka.
12 Ísï tátsekua, enga Jesúsi na kurhaapka eskaksï jupikaspka Juanuni, Galileaisï niraspti.
13 Ka enga na uéakuntapkia Nasareti uératini, Kapernaúmi pakaraspti enga marirhu uanamukuteni jaka, Sabulóni ka Neftalíiri echeriichani jimbo.
14 I ambe úkuarhispti paraka ísï úkuarhipiringa eska na karapka Isaíasi, Tata Diosïiri uandakua pári:*
15 “¡Galilea, nani engaksï no judiuecha irekaka, engari Sabulóni ka Neftalíiri echeriichani jimbo jaka, engari imani xanharu jimbo jaka enga marirhu pájpejka, engari Jordánirhu parhikuteni jaka!
16 Ireta enga pápkʼandu japka exespti tʼíntskua ma, ka i tʼíntskua niáraspti tʼíntskakuani imeechani engaksï jimeesïsï irekapka nani enga uarhikua ísïipka komueska kʼumanda ma”.
17 Jiáni uératini, Jesúsi ueenaspti arini ambe aianhpini: “Móanta je, jimboka auandarhu anapu Reinu janoxakaia”.
18 Enga Jesúsi xanharani japka Galilea anapu marirhu uanamukutenisï, exeaspti tsimani kʼuiripuechani engaksï ermanuepka, kʼuanimanksï jarhani kurucha pʼitamatarakuani,* jimbokaksï kurucha pʼitamatiispka. Ma, Simóni arhinhasïreendi engaksï ístu arhienga Pedru, ka máteru Andrési imeeri ermanu jémba.
19 Ka arhiaspti: “Chúxapajtsïni je ka jíksïni arhiaka nénajtsï uaa jirinhaantani kʼuiripuechani ísï eskajtsï chá na jámajka jirinhaantani kurucheechani”.
20 Imaksï jirejiresï jurajkuaspti kurucha pʼitamatarakuechani ka chúxapasptiksï.
21 Sánderu orhepatini, exeaspti tsimani kʼuiripuechani: Santiaguni* Sebedeu uájpani ka Juanuni imeeri ermanu jémbani. Taati jémba jingonksï jarhaspti barkurhu ka kurucha pʼitamatarakuechanksï sïriantaxapti.* Jesúsi ióarhiaspti
22 ka imaksï jirejiresï jurajkuspti barkuni ka taati jémbani, ka chúxapasptiksï.
23 Jesúsi iámu Galileaisï niraspti jorhentpini jima engaksï judiuecha tánguarhijka para Tata Diosïni kómarhini ka aianhpisïreendi ambakiti aianhperakua Tata Diosïiri Reinueri ambe. Ka ambakeraantasïreendi kʼuiripuechani engaksï mámaru ambe pʼamenchani japka ka no sési pʼikuarherani.
24 Niáraspti kánikua mítekateeni iámu Siriaisï. Juákuasïreendiksï iámindu imeechani engaksï pʼamenchani japka ka imeechani engaksï kánikua no sési pʼikuarherani japka, imeechani engaksï demoniuecha incharhiatini japka, imeechani engaksï ataki pʼínteenga ka imeechani engaksï no ueenga manakuarhini. Ka Jesúsi ambakeraantasïreendi.
25 Jimboksïsï uánikua kʼuiripuecha nireendi chúxapani, Galilea ka Dekápolisi* anapuecha, ístu Jerusaléni ka Judea anapuecha ka ístu Jordánirhu parhikuteni anapuecha.
Notecha
^ O “no ma ambe arhaspka”.
^ O “profeta Isaíasi”.
^ O “cheremakuani”.
^ O “Jakobuni”. Griegu jimbo: I·á·ko·bos.
^ O “sési jájkuantaxapti”, “takusï uaantaxapti”.
^ O “Diesi Ireta”.
