Mateu 7:1-29
-
ARHIJTSÏKPISÏNDI JUÁTARHU (1 a 27)
-
“Ásteru jáma jeia no sési ambe exekuani máteruechani” (1 a 6)
-
Seguirii je kurhajkuarhini, jirinhani ka uámutani puertarhu (7 a 11)
-
Jesúsi jorhentpisïndi na engachi jatsika para kámpini (12)
-
Puerta enga no kómukurhaka (13 ka 14)
-
“Chájtsï míteantauaka imani ambe jimbo engaksï újka” (15 a 23)
-
Kʼumanchikua enga kʼerendarhu uaxastanhaka ka kʼumanchikua enga kutsarirhu uaxastanhaka (24 a 27)
-
-
Kʼuiripuechaksï ísku pakarasïndi engaksï kurhajchajka Jesúsini (28 ka 29)
7 ”Ásteru jáma jeia no sési ambe exekuani máteruechani parajtsï chájtu no no sési ambe exeminhani.
2 Jimboka engajtsï chá no sési ambe exekuauaka máteruechani, chájtujtsï ísï no sési ambe exeminhaaka ka ísï eskajtsï chá na káuaka máteruechani, chájtujtsï ísï kánhaaka.
3 ¿Andiresï exejki indeni pajani enga chiiti erachi* echenharhika, joperuri no exeni indeni bigasïni engari tʼu jatanharhika?
4 ¿Ka nénari uaa arhini chiiti erachini ‘jurajkukeni pʼitanharhikuntani indeni pajani engari echenharhika’ ka jiniri tʼu bigasï ma jatanharhitini jarhani?
5 ¡Ísku apari! Orheta tʼu pʼitanharhinta indeni bigasïni engari kámani jaka ka ísï kʼóruri uaakia sési exeni néna pʼikunharhikuntani pajani chiiti erachini.
6 ”Asï jáma je pímbinhasï ambe íntsaani uíchuechani, nijtu kúchiichani kʼuanikukuani chaari perleechani, jimbokaksï jamberi úpiringa ísku tʼauanduani, pʼirhipakuarhenksï ka no sésiksïni úchini chánksïni.
7 ”Seguirii je kurhajkuarhini ka intsïnhaakajtsï, seguirii je jirinhani ka exentaakajtsï, seguirii je uámutani puertarhu ka mítaminhaakajtsï.
8 Jimboka ima enga kurhajkuarhijka, intsïnhasïndi, ka ima enga jirinhajka, exentasïndi, ka ima enga uámutajka puertarhu, mítaminhaati.
9 Engaksïni chaari sapi kurhinda ma kurhachejka, ¿andi chá tsakapu ma íntskusïni?
10 Ka engaksïni kurucha ma kurhachejka, chájtsï no akuitsi ma íntskusïnga, ¿a no?
11 Jiájkani, nájkirukajtsï chá engajtsï no ambarhatiika újka ambakiti ambe íntsaani chaari sapiichani, ¡na xáni sánderumindu chaari Taati enga auandarhu jaka uaa ambakiti ambe íntsaani imeechani engaksï kurhakujka!
12 ”Ísï jimbo, ísï kaa je máteruechani eskajtsï na uékapiringa eskaksïni kámapiringa chánksïni.* Jimboka i ambesï uandajti Lei ka Tata Diosïiri Uandakua Páriicha.*
13 ”Incha je indeni puerta jimbo enga no kómukurhaka, jimboka kómukurhaska puerta ka kórhurani inde xanharu enga uarhikuarhu pájpejka ka uánikuestiksï engaksï indeni puerta jimbo inchajka;
14 joperu no kómukurhasti puerta ka no kórhurani xanharu enga tsípikuarhu pájpejka ka no uánikua kʼuiripuechaksï exentasïndi.
15 ”Xéparini je imani kʼuiripuechani jingoni engaksï Tata Diosïiri uandakua pári arhikateeka, engaksïni ísï jurhajka andarhierani komueska karichi ma ka jiniksï jiuatsï apejpitiini.
16 Chájtsï míteantauaka imani ambe jimbo engaksï újka.* No nema pʼikuntasïndi ubasï jima enga chekamikua ambe jukajka nijtu jígusï jima enga aparhita jukajka, ¿a no?
17 Májkueni, ambakiti anhatapu ma, ambanharhi frutu jukasïndi; joperu anhatapu tereri ma, no sési jásï frutu jukasïndi.
18 Ambakiti anhatapu ma no úsïndi no sési jásï frutu jukani ka anhatapu tereri ma no úsïndi ambanharhi frutu jukani.
19 Ima anhatapu enga no újka ambanharhi frutu jukani, chʼapanhasïndi ka chpirirhu kʼuanijpanhani.
20 Ísï jimbo, chájtsï míteantauaka imani kʼuiripuechani imani ambe jimbo engaksï újka.
21 ”No iáminduecha engajtsïni arhijka ‘Tata, Tata’ inchaatiksï auandarhu anapu Reinurhu. Imajkuksïsï inchaati engaksï újka ambe enga uékajka juchiiti Taati enga auandarhu jaka.
22 Imani jurhiatikua jimbo, uánikuajtsïni arhiati: ‘Tata, Tata, ¿andi no chiiti nombri jimbochi uandantaski ambe enga úkuarhipiringa sánderu orhepani ka chiiti nombri jimbochi petarhitaantani demoniuechani ka chiiti nombri jimbochi uánikua milagruechani uaani?’.
23 Joperuni ji arhiauaka: ‘¡Jíksïni no míteska!’ ‘¡Kéndikuchejtsïni je, chá engajtsï no újka ambe enga lei uandajka!’.
24 ”Ísï jimbo, ima enga kurhandijka ambe engani uandakia ka ísï úni, ísïiuati komueska achamasï jánhaskati enga kʼerendarhu uaxastaka imeeri kʼumanchikuani.
25 Ueenaspti janini, tátsekua iurhekua úkuarhispti, ístu uinhamu tarhiaspti ka méntkuksï no sési kántaspti imani kʼumanchikuani..., joperu kʼumanchikua no xerekuarhentaspti jimboka sési uaxastakata jarhaspka kʼerendarhu.
26 Joperu ima enga kurhandijka ambe engani uandakia ka no ísï úni, ísïiuati komueska ima achamasï enga no jánhaskatiika enga kutsarirhu uaxastaka imeeri kʼumanchikuani.
27 Ueenaspti janini, tátsekua iurhekua úkuarhispti, ístu uinhamu tarhiaspti ka méntkuksï no sési kántaspti imani kʼumanchikuani..., ka kʼumanchikua iámu xerekuarhentaspti, kánikua no sési niraspti kuarhatseni”.
28 Enga Jesúsi na kʼamarapkia ini ambe uandani, kʼuiripuechaksï ísku pakaraspti exeparini na enga xáni sési jorhentpienga
29 jimboka ísï jorhentpisïreenga eska kʼuiripu ma enga Tata Diosï sésikua íntskuka para jorhentpini ka no ísï eskaksï karariicha.
Notecha
^ O “ermanu”.
^ Griegu jimbo: “ú je máteruecha jimbo ambe engajtsï uékapiringa eskaksï ima úpiringa chánksïni jimbo”.
^ O “Profeteecha”.
^ Griegu jimbo: “imeecheeri frutu jimbo”.
