Roma 11:1-36
11 Jimajkani ji kurhanguarhisïnga: ¿andi Tata Diosï nóteru jaiapanhentaskia imeeri iretani? ¡Nómbe! Jimbokani jíjtuni israelita máeska, Abraáni uájpeeska ka Benjamíniiri kʼumanchikuarhu anapueska.
2 Ísï jimbo, no jindeesti jimboka Tata Diosï nóteru jaiapanhentapiringia imeeri iretani, imani enga orhetku erakupka.* ¿Andi nójtsï míteski ambe enga arhijka Karakateecharhu Elíasiiri ambe? Ima kómarhispti Tata Diosïni ka arhispti eska ikiakuaxapka israeliteechani. Arhispti:
3 “Tata Diosï Jeoba, uándikuastiksïa chiiti uandakua páriichani* ka xereantastiksï chiiti altariichani; jíterkusïni pakarani jakaia, ka iásï jíndentujtsïni uékaxatiia uándikuni”.
4 Joperu, ¿ambe arhispi Tata Diosï? “Útasï 7 mili achamasïichaksï jarhasti engaksï nótki tinguixurhikuni jaka Baalini”.
5 Májkueni, iásïjtuksï jarhasti máru kʼuiripuecha engaksï erakunhaka jimboka Tata Diosï kánikua kóndeantaska.
6 Jiájkanksï erakunhasti jimboka Tata Diosï kánikua kóndeantaska ka no imeecheeri úkuecha jimbo. Jimboka enga úkuecha jimboepiringa, jiájkani no jindeepirindi jimboka Tata Diosï kánikua kóntpintasïnga.
7 Jimajkani, ¿ambechi uandapirini jucha? Israeli anapuechaksï no niárasti jatsini imani ambe engaksï jimbo xáni jánguarhintani jaka, joperu erakukateechaksï kʼóru niárasti jatsini. Máteruechaksï nóteru ambe ma uékastia míteni,
8 ísï eska na karakata jaka: “Asta iásï jamberi, Tata Diosï ústi eskaksï imeecha uinhamu kʼuíni jauaka, imeecheeri éskuechaksï no exesïndi niksï imeecheeri kutsïkuecha kurhaajki”.
9 Ístu, Dabidi uandasïndi: “Eska imeecheeri kʼuínchikuecha ísïiuaka komueska ójkutakua ma engaksï jimbo téksarhutaaka ka kastigarinhanksï.
10 Eskaksï xurhanharhiaka* éskuecharhu paraksï nóteru exenia. Ka ú eskaksï méntku kʼutitsetini jámaaka”.
11 Jimajkani ji kurhanguarhisïnga: engaksï judiuecha téksarhutaka, ¿nóteruksï uaaia jauarani? ¡Jo, uaatiksï! Joperu jimbokaksï pekariiska, iásïksï no judiuecha uaatia pʼímutanhantani, ka indeni jimbo, judiuechaksï kánikua ikiauati.
12 Ísï jimbo, engaksï parhakpini anapuecha kóndenhantani jaka, nájkirukaksï judiuecha no intsïnhaani jaka indeni kóntperateechani, ka nájkirukaksï no judiuecha sánderu kóndenhantani jaka eska judiuecha, ¡na xáni sánderu uánikua kóntperateechaksï jaua engaksï iáminduecha jauakia!
13 Iásï, jíksïni chánksïnisï arhini jaka, chá engajtsï no judiueka. Jimbokani ji apostoliiska engani axanhaka parani no judiuechani aianguani, ji kánikua tsitisïnga* marhuakuni Tata Diosïni.
14 Ístuni erokuarhixaka nándikani uaaka úni eskaksï juchiiti iretarhu anapuecha enbidia pʼikuarheraaka* indeni ambe jimbo engajtsï chá intsïnhaka, ka ísï úparini, úni pʼímutantaani máru.
15 Jimboka, enga ísï no jaiapanheantaka imeechani, iásïksï parhakpini anapuecha úsïndia sési pájperantani Tata Diosïni jingoni. Ka enga ménderu jióantaska, ísïiuati komueskaksï tsíntani jimbokaksï uarhirixapka.
16 Ístu, enga ima sanititu kurhinda enga orheta kéjtsïtanhaka pímbinhasïika, jiájkani iámindu kurhinda pímbinhasïisti. Ka enga pímbinhasïika sïrangua, ístuksï pímbinhasïisti rameecha.
17 Joperu máru rameecha inde olibusïiri anhatapueri, chʼapandikunhastiksï ka tʼuri mójtsïtanhaska* jima engaksï máteru rameecha pakarani japka, tʼu engari juátarhu anapu olibusï máeka, ka iásïri tʼu jamberi marhuatasïngia ambakiti ambe enga olibusïiri sïranguarhu jaka.
18 Ísï jimbo, asï jáma eratseni eskari tʼu sánderu ambakitiiska ka eska máteru rameecha, engari ísï eratseska, miá eskakeni tʼungini inde sïranguasï pʼínguni jaka ka eskari no tʼusï pʼínguni jaka sïranguani.
19 Ka tʼuri uandaaka: “Joperu máru rameechaksï chʼapandikunhasti parani ji mójtsïtanhani”.
20 ¡Ka ísïisti! Imeechaksï chʼapandikunhasti jimbokaksï no mintsikaska, joperuri tʼu uíuinhasï jarhaska jimbokari mintsikasïnga. Ísï jimbo, asï jáma kʼéramakuarhini, sánderu sési, xéparini jáma.
21 Enga Tata Diosï chʼapandikuaka imani rameechani engaksï orhetku jukapka, ¿andi tʼu exesïni eskakeni tʼungini kʼóru pʼamojkuni jauaka?
22 Tʼuri míteska eska Tata Diosï kánikua kóntpintasïnga, joperu eska ístu kastigarpisïnga. Ima kastigariuasïndi imeechani engaksï téksarhutajka jimbokaksï no mintsikasïnga, joperukeni tʼungini kánikua kóndentaati engari seguiriini jauaka jánguarhintani parakeni Tata Diosï méntkisï kóndentani jarhani. Ka engari no jánguarhintaska, imakeni tʼungintu chʼapandikuati.
23 Joperu, engaksï imeecha ménderu mintsikaaka imajtuksï mójtsïtanhaati, jimboka Tata Diosï uaaka ménderu mójtsïtantaani jima engaksï jukarini japka.
24 Engari tʼu chʼapandikunhaka juátarhu anapu olibusï ma jimbo ka imani olibusï jimbori mójtsïtanhani enga ikaranhaka, ¿jiájkani no sánderu fásiliua ménderu mójtsïtantaani imani rameechani engaksï chʼapandikunhapkia imani olibusïrhu enga ikaranhaka?
25 Parajtsï no kʼéramakuarhini jarhani erachiicha,* uékasïnga eskajtsï mítetini jauaka indeni ambe enga Tata Diosïiriika:* máru Israeli anapuechaksï nóteru ambe ma uékastia míteni astakaksï na iámu andanguakia imeecha engaksï no judiueka,
26 ka ísï, iámindu Israeli anapuechaksï pʼímutanhantaati. Ísï eska na karakata jaka: “Sioni uératini juuati ima enga pʼímutantauaka kʼuiripuechani ka jarhuatauati iámindu Jakobu uájpeechani paraksï nóteru no sési ambe niátania.
27 Ka ísï pakatperaxaka imeechani jingoni para jiáni engani na puákuantauakia imani ambe jimbo engaksï xáni no sési niátaka”.
28 Ísïisti, imeechaksï no jaiapanhentasïndi ambakiti aianhperakuani ka indeni ambe jimbo chájtsï sési uéranchaska; joperu Tata Diosï erakuasti ka xénchaasti imeeri ióntki anapu parientiichani jimbo.
29 Jimboka Tata Diosï no pʼamondakuarhiaka enga ísï intsïmpika ka nijtu enga ísï erakuaka imeechani enga erakuakia.
30 Chájtsï no kurhajchasïreenga Tata Diosïni, joperu iásï, Tata Diosïksïni pʼamojkusïndia jimbokaksï judiuecha no kurhajchaska, iásïksï imasï no kurhajchajtia Tata Diosïni, ka indeni jimbo, chájtsï niáraska pʼamojkunhani.
31 Joperu imeechajtuksï niáraati pʼamojkunhani ísï eska chá na pʼamojkunhaka.
32 Jimboka Tata Diosï jurajkuaska eskaksï ísï jauaka enajkiksï ónhakata jaki paraksï no kurhandirani ka para úni iáminduechani pʼamojkuani.
33 Tata Diosï kánikua kóntpintasïndi ka no nema úsïndi méntku sési míteni na enga xáni jánhaskatiika Tata Diosï nijtu ambe enga xáni míteka, ka no nema uaati kurhanguni ambe enga eratseni jaka úni ka nijtu ambe enga xáni újka.
34 Jimboka, “¿né niáraskia míteni ambe enga eratsejka Tata Diosï Jeoba? ¿O né niáraski arhini na enga jatsika para úni ambe ma?”.
35 O “¿Né íntskuski orheta ambe ma Tata Diosïni para ima maiamuntani jarhani?”.
36 Jimboka iámindu ambe Tata Diosïiriiska, imani jimboksïsï jati ka imeeristiksï. Imasï jukanchati para méntkisï kʼéri ambe arhinhani. Eska ísï úkuarhiaka.
Notecha
^ O “mítentapka”.
^ O “chiiti profeteechani”.
^ O “Eskaksï xúmu jánhaskaaka”.
^ O “jukaparharasïnga”.
^ O “selosu jauaka”.
^ O “kutujtsïtanhaska”.
^ O “ermanuecha”.
^ Exe je Glosario, ambe ma enga Tata Diosïiriika.
