Roma 12:1-21
12 Ísï jimbo erachiicha,* jimbokaksïni Tata Diosï xáni pʼamojkuska, kurhachesïngaksïni eskajtsï íntskuntaaka Tata Diosïni chaari kuerpuechani ka chaari tsípikuani komueska pímbinhasï kéjtsïtakua ma, ísï eska Tata Diosï na jaiapanhentajka; ka ísï úparini, chaari eratsekua jingontsï marhuakuni jauaka Tata Diosïni.
2 Ka ásteru jámia je májkueni jámani eska i parhakpini anapu kʼuiripuecha,* sánderu sési, mójtaku je chaari eratsekuani parakajtsï uaaka sési míteni ambe enga Tata Diosï uéjka, imani ambe enga sési jaka, ambe enga ima jaiapanhentajka ka ambe enga ambakiti ambeeka.
3 Jimbokarini Tata Diosï xáni kóndentaska, jíksïni arhisïnga eskajtsï no jámaaka kʼéri ambe exekuarhini,* sánderu sési, xarhata je eskajtsï sési eratsesïnga, ísï eskaksïni Tata Diosï na sésikua íntskuka parajtsï imani mintsikani.
4 Juchaari kuerpu mámaru ambe jukasti joperu no iámindu ambe májkueni ambe úsïndi úni,
5 ka juchajtuchi ísïiska, nájkirukachi uánikueka, iáminduechachi májku kuerpueska Kristuni jingoni, joperuchi mándani arhini májku úkuarhintasïnga máteru ka máteruni jingoni.
6 Ísï jimbo, jimbokajtsïni Tata Diosï xáni kóndentaska, iáminduechachi intsïnhaska sésikua parachi úni ambe ma. Engachi intsïnhaka sésikua parachi Tata Diosïiri ambe uandantani, ju je uandantani ísï eskajtsïni Tata Diosï na xáni sésikua íntskuka parachi imani mintsikani;
7 engachi intsïnhaka sésikua parachi máteruechani jarhuataani,* ju je kánikua jánguarhintani ísï úni; enga nema intsïnhaka sésikua para jorhentpini, eska jorhentpiaka;
8 ima enga újka uinhaperaantani máteruechani,* eska uinhaperantauaka;* ima enga intsïmbiajka ambe ma máteruechani, eska kánikua intsïmbiauaka; ima enga újka orhekupaani* máteruechani, eska sési orhekupauaka;* ima enga pʼamojkuajka máteruechani, eska tsípikua jingoni pʼamojkuauaka.
9 Mintsita jingoni xénchpera je. Ikicha je imani ambe enga no sési jaka; kánikua jánguarhinta je úni ambe enga sési jaka.
10 Ísï xénchpera je enajkijtsï iáminduecha ermanutiipirini. Ka chá ueena je janhanharhiani máteruechani.
11 Kánikua jánguarhintsï je ánchikuarhini, asï jáma je xépini.* Eskaksïni espiritu santu jarhuataaka parajtsï chá kánikua jánguarhintani. Tata Diosï Jeobani jántspiku je.
12 Tsípi je imani ambe jimbo engajtsï erokuarhini jaka. Tekaantsï je engajtsï no sési nitamakuarhini jauaka. Méntku kómarhini ja je.
13 Intsïmbia je erachiichani ambe engajtsï sáni jatsikuarheka chá, ísï eskaksï imeecha na uétarhinchani jauaka. Méntkisï sési kaa je máteruechani.
14 Méntkisï kómarhijpikua je imeechani engaksïni no sési kámajka paraka méntkisï sési nikuauaka, ka asï jáma je no sési ambe uandani imeecheeri ambe.
15 Tsípi je imeechani jingoni engaksï tsípijka; ka uera je imeechani jingoni engaksï uerajka.
16 Ísï exea je máteruechani eskajtsï chájkumindu na exekuarhijka; asï eratsi je eskajtsï chá kʼéri ambeeska, sánderu sési, méntkisï kaxumbikua jingoni jáma je. Asï eratsi je eskajtsï chá sánderu jánhaskasïnga eska máteruecha.
17 Engaksïni kʼuiripuecha no sési ambe úchiaka, chá asï jáma je májkueni kaani. Imani ambe ú je ambe engaksï kʼuiripuecha uandajka eska sési jarhaska.
18 Engajtsï uaaka ísï úni, jánguarhinta je xáni eskajtsï na xáni uaaka parajtsï sési pájperani iáminduechani jingoni.
19 Juchiiti erachiicha, asï jáma je no sési ambe úkuantani kʼuiripuechani,* sánderu sési, Tata Diosïni jurajkuku je paraka ima xarhataaka na enga xáni ikiajka indeni ambe jimbo enga xáni no sési únhajka. Jimboka ísï karakata jarhaska: “‘Jíndentsïni jurajkuchi je; ji íntsauaka ambe engaksï jirinhakuarhika’, ísï uandasïndi Tata Diosï Jeoba”.
20 Sánderu sési, “enga kʼarhimani jauaka ima engakeni ikiachejka, tʼirera sáni; enga kʼarhichani jauaka, itsï sáni íntsku; jimboka engari ísï uaaka, ima ísku pakaraati ka mintsitarhuri niárakuaka”.*
21 Asï jurajkutakuarhi parakeni no sési ambe andani, sánderu sési, sési ambe ú parakari uaaka no sési ambeni andani.
Notecha
^ O “ermanuecha”.
^ O “i tiempu anapuecha”. Exe je Glosario, tiempu.
^ O “jukari ambe eratseni chaari ambe”.
^ O “marhuakuani”.
^ O “arhijtsïkpini”.
^ O “eska sési arhijtsïkpiaka”.
^ O “orhejtsïkuni”.
^ O “eska jánguarhintaaka orhejtsïkuani máteruechani”.
^ O “Chkapinta je ánchikuarhini engajtsï úkua ambe jatsiaka”.
^ O “asï jáma je maiamukukuarhintani”.
^ Griegu jimbo: “tʼuri turhiri jatsijtsïkuni jauaka”. Indenisï arhikuekani jati eska ima kʼuiripu mójtakurhiaka ka nóteru xáni ikiani jarhania.
