Roma 16:1-27
-
Pablu uandasïndi eskaksï sési erokaaka Febeni, pirenchi ma enga Tata Diosïni marhuakujka (1 ka 2)
-
Uandajperata ma axakuasïndi Roma anapu erachiichani (3 a 16)
-
Arhiasïndi eskaksï jingontku jámaaka imeecha jingoni engaksï máteru ambe jorhentpijka (17 a 20)
-
Uandajperata ma axakuasïndi imeechani engaksï Pabluni jarhuatajka (21 a 24)
-
Uandanhantaxatiia inde ambe enga Tata Diosïiriika ka enga iónisï jískakata japka (25 a 27)
16 Sési eroka je pirenchi Febeni, inde pirenchi imani kúnguarhikuarhu marhuaxati enga Senkreasi jaka,
2 kurhachexakaksïni eskajtsï sési erokaaka ísï eska na kʼuanijka eskaksï uaaka pímbinharhatiicha, jimboka imajtu mintsikasïnga Tatani, ka jarhuata je para ima jatsini ambe enga uétarhinchani jauaka, jimboka ima uánikua kuájpiaska ka jíndeni jamberireni kuájpisti.
3 Aiangu je Priskani ka Ákilani eskani uandajperata ma axakuaxaka, indeechajtsïni jarhuatasïndi parachi Kristu Jesúsiiri ánchikuarhitani úni,
4 indeechaksï sáno uarhisti parajtsïni jíndeni kuájpini. Ka ji ka iámindu kúnguarhikuecha engaksï ireteecharhisï jaka, diosmaiamukuachi arhiaxaka.
5 Ístu, aiangua je imani kúnguarhikuarhu anapuechani engaksï imeeri kʼumanchikuarhu tánguarhijka eskani uandajperata ma axakuaxaka. Ístu, aiangu je Epénetuni eskani uandajperata ma axakuxaka, imani engani ji xáni xénchajka, ima jindeesti ma enga ueenaka chúxapani Kristuni jini Asia.
6 Aiangu je Maríani eskani uandajperata ma axakuxaka, ima uinhamu ánchikuarhisti chánksïni jimbo.
7 Ístu, aiangu je Andrónikuni ka Juniasini eskani uandajperata ma axakuaxaka, imeechaksï juchiiti parientiisti ka niáraspkachi márku ónhanhani; apostoliichaksï sési míteasti indeechani ka imeechaksï sánderu ióni páxatiia Kristuni chúxapani eskani ji.
8 Ístu, aiangu je Ampliatuni eskani uandajperata ma axakuxaka, imani engani ji xáni xénchajka jimboka imajtu mintsikasïnga Tatani.
9 Aiangu je Urbanuni eskani uandajperata ma axakuxaka, imajtujtsïni jarhuatasïndi para Kristueri ánchikuarhitani úni, ka ístu aiangu je Estakisini eskani uandajperata ma axakuxaka, imani engani ji xáni xénchajka.
10 Ístu, aiangu je Apelesini eskani uandajperata ma axakuxaka, ima enga erakunhaka para Kristuni marhuakuni. Aiangu je Aristóbolueri kʼumanchikuarhu anapuechani eskani uandajperata ma axakuaxaka.
11 Aiangu je juchiiti parientini Erodiónini eskani uandajperata ma axakuxaka. Ka ístu, aiangu je Narsisueri kʼumanchikuarhu anapuechani eskani uandajperata ma axakuaxaka, jimbokaksï imeechajtu Tateeri chúxapatiiska.
12 Aiangu je Trifenani ka Trifosani eskani uandajperata ma axakuaxaka, íksï uarhiitiicha uinhamu ánchikuarhixati paraksï Tateeri ánchikuarhitani úni. Ístu, aiangu je Pérsidani, imani engani ji xáni xénchajka, eskani uandajperata ma axakuxaka, jimboka indejtu uinhamu ánchikuarhiska para Tateeri ánchikuarhitani úni.
13 Aiangu je Rufuni eskani uandajperata ma axakuxaka, ima enga erakunhaka para Tatani marhuakuni ka ístu aiangu je amambani eskani uandajperata ma axakuxaka, ima ísïisti komueska juchiiti naandi.
14 Aiangu je Asínkrituni, Flegonteni, Ermesini, Patrobasini, Ermasini ka erachiichani* engaksï imeecha jingoni jaka eskani iáminduechani uandajperata ma axakuaxaka.
15 Ka ístu, aiangu je Filóloguni ka Juliani, Nereuni ka imeeri pirembani eskani uandajperata ma axakuaxaka, ka ístu Olimpasini ka iámindu erachiichani engaksï imeecha jingoni jaka.
16 Ka engajtsï uandajperaaka, mintsita jingoni putinharhikpera je. Iámindu Kristueri kúnguarhikuechaksïni uandajperata ma axachexati chánksïni.
17 Erachiicha, kurhachexakaksïni eskajtsï jingontku jámaaka imeechani jingoni engaksï uéjka támisï jánhastaani ka ójkutaani* máteruechani jimbokaksï máteru ambe jorhentpisïnga ka no imani ambe engajtsï jorhenguarhikia, asï jáma je imeechani jingoni kúnguarhini.
18 Inde achamasïicha engaksï indeni ambe újka, nóksï jántspikusïndi juchaari Tata Kristuni ka sánderuksï imani ambe úsïndi engaksï imeecha tsitijka, sésiksï jándirantasïndi uandani ka sésiksï arhiasïndi kʼuiripuechani paraksï támisï jánhastaani.
19 Ka iáminduechaksï mítesti eskajtsï chá kʼóru kurhandirasïnga, ka ji kánikua sési pʼikuarherasïnga chánksïni jimbo. Joperu uékasïnga eskajtsï jánhaskaaka parajtsï míteni ambesï sési jaki ka ambesï no sési jaki.
20 Joperu no ióni jimbo, Tata Diosï, enga pínandikua íntspijka, juramukuaksïni íntskuati parajtsï puchandurhini Satanásini. Eskaksïni Jesúsi* kánikua kóndentaaka.
21 Timoteu, ima engareni jarhuatajka, uandajperataksïni ma axachexati ka juchiiti parienticha Lusiu, Jasóni ka Sosípatru ístuksïni uandajperata ma axachexati.
22 Ji Tersiu engani karaka ini karakatani, jíjtuksïni uandajperata ma axachexaka jimbokajtsï chájtu mintsikasïnga Tatani.
23 Ji ka iámindu kúnguarhikuarhu anapuecha, ménisïchi Gaiueri kʼumanchikuarhu pakarasïnga ka imajtuksïni uandajperata ma axachexati. Erastu, ima enga sentabu patsariika iretarhu ka ístu imeeri ermanu jémba Kuartu, ístuksïni uandajperata ma axachexati.
24 *
25 Tata Diosïksïni uinhaperantasïndi ambakiti aianhperakuani jimbo engani ji uandantajka tata Jesukristueri ambe, iásï uandanhantaxatiia inde ambe enga Tata Diosïiriika* ka enga iónisï jískakata japka.
26 Iásï xarharaxatiia ka mítekuarhixatiia ambe engaksï Tata Diosïiri uandakua páriicha* karaka. Juchaari Tata Diosï, enga méntkisï jauaka, imasï ísï uékati, mítetaraasti no judiuechani paraksï ima niárani jakajkuni ini ambe ka kurhajchanksï.
27 Eska Tata Diosï, ima enga xáni jánhaskatiika, eska méntkisï kʼéri ambe arhinhaaka tata Jesukristuni jimbo. Eska ísï úkuarhiaka.
Notecha
^ O “ermanuechani”.
^ O “téksarhutaraani”.
^ Griegu jimbo: “Tata Jesúsi”.
^ Exe je ambe enga arhijka nota enga Mateu 17:21 jimbo jaka.
^ Exe je Glosario, ambe ma enga Tata Diosïiriika.
^ O “profeteecha”.
