Roma 2:1-29
2 Ísï jimbo, né uéjkiri jindeeni tʼu, nóri sésikua jatsiska parari máteruechani jusgariuani jarhani. Jimboka engari máteru nemani jusgariiska, tʼurisï no sési uéranchaaka, jimbokari tʼujtu májkueni úxaka eska ima engari jusgarini jaka.
2 Sésichi mítetixaka eska Tata Diosï jusgariuasïnga imeechani engaksï ini ambe újka ka eska kastigariuasïnga ísï eskaksï na jirinhakuarhijka, jimboka Tata Diosï jurhimbikua jingoni jusgarpisïnga.
3 Joperu tʼu engari jusgariuani jaka imeechani engaksï májkueni ambe úni jaka eska tʼu, ¿andi tʼu exesïni eskari uaaka jirikuarhekuni Tata Diosïni parakeni no jusgariini?
4 ¿Andi nóri exesïni eskakeni Tata Diosï kánikua sési kámasïnga ka eskakeni tekaachintaxaka? ¿Ka andi nóri exesïni eskakeni Tata Diosï sési jimbo jarhuataxaka parari móantani?
5 Joperu, jimbokari inchandimesïnga ka nóri móantani mintsita jingoni, ikiataxakari Tata Diosïni ka ima jurhiatikua enga ima ísï jusgarpiaka eska na jindeeka, xarhataati na enga xáni ikiani jaka.
6 Ka ísï eskaksï na úka, mándani arhini íntsauati ambe engaksï jirinhakuarheka:
7 Tata Diosï íntsauati tsípikua para méntkisï imeechani engaksï no kuatantajka ambakiti ambe úni, jimbokaksï jánguarhintaxaka paraksï kʼéri ambe exenhani ka paraksï intsïnhani kuerpu ma enga no méni tereaka;
8 joperu imeechani engaksï arhirperajka ka engaksï no újka ambe enga jurhimbitkueka, Tata Diosï xarhatakuauati na enga xáni ikiani jaka.
9 Ka imeechani engaksï no sési ambe niátajka, kánikua no sési nikuauati ka kómu nitamakuarhiatiksï, judiuecha orheta ka ístu grieguecha.
10 Joperu imeecha engaksï ambakiti ambe újka, kʼéri ambeksï exenhaati ka pínandikuaksï jatsiati, judiuecha orheta ka ístu grieguecha.
11 Jimboka Tata Diosï iáminduechani májkueni kaasïnga.
12 Ísï jimbo, imeecha engaksï no sési ambe újka* ka nóksï míteni Moisésiiri Leini, uarhiatiksï na uéjkiksï no míteni Moisésiiri Leini; joperu imeecha engaksï no sési ambe újka ka mítenksï Moisésiiri Leini, ísïksï jusgarinhaati eska Moisésiiri Lei na arhijka.
13 Jimbokaksï no imeechasï sési jámani jaka Tata Diosïni japarini engaksï kurhandijka ambe enga lei uandajka, sánderu sési, imeechaksïsï sési jámani jati engaksï újka ambe enga lei uandajka.
14 Jimbokaksï no judiuecha no míteska ambe enga Lei uandajka, joperu imeechaksï úsïndi ambe enga lei uandajka, ka nájkirukaksï no míteka leini, inde lei imeecheeri mintsitarhu jarhasti.
15 Imeechaksï xarhatasïndi eska imeecheeri mintsitarhu jarhaska ambe enga lei jorhentpijka, ístu, mítetinksï jarhasïndi engaksï ambakiti ambe úni jarhajka o nómbe, ísï jimbo, imeechaksï jandiajku miákuarhini jarhasïndi* sinksï ambakiti ambe úski o nómbe.
16 I ambesï úkuarhiati ima jurhiatikua enga Tata Diosï jusgariuauaka kʼuiripuechani Kristu Jesúsini jimbo, imani ambe jimbo engaksï sïpatikuarku újka. Ka i jindeesti ambakiti aianhperakua engani ji uandantani jaka.
17 Ísï jimbo, tʼuri uandasïnga eskari judiueska ka eskari mintsikasïnga leini ka arhikuarhisïngari jimbokari míteska Tata Diosïni,
18 engari míteka ambe enga Tata Diosï uéjka eskari uaaka ka jaiapanhentandi ambakiti ambe jimbokari jorhendanhaska ambe enga Lei uandajka,
19 engari exejka eskari uaaka orhekupaani imeechani engaksï no újka exeni ka eskari tʼíntskakuasïnga imeechani engaksï pápkʼandu jaka,
20 engari eratsejka eskari uaaka imeechani arhistakuani engaksï méntku no jánhaskajka ka sapiichani jorhendaani, jimbokari kurhangusïnga ambe enga sánderu jukaparhakueka ka jurhimbikua ambe enga Lei jorhentpijka...,
21 jiájkani tʼu engari jorhentpini jámajka, ¿andiresï no tʼu ueenajki jorhenguarhini? Tʼuri arini ambe uandantasïnga “Asï jáma sïpani” ka jiniri tʼu sïpani jarhani.
22 Tʼuri uandasïnga “Asï jáma ísku jándikua ambe niátani”* ka jiniri tʼu ísku jándikua ambe niátani jarhani. Tʼuri uandasïnga eskari ikichaasïnga diosï úkateechani, ka jiniri sïpani jarhani templuecharhu.
23 Tʼuri uandasïnga eskari míteska ambe enga Lei uandajka, ka jiniri no janhanharhini jarhasïnga Tata Diosïni engari no újka ambe enga Lei uandajka.
24 Jimboka, ísï eska na karakata jaka, “chánksïni jimbo, parhakpini anapu kʼuiripuechaksï no sési ambe uandaxati Tata Diosïiri nombriiri ambe”.
25 Ísï jimbo, jiántku marhuasïndi pasïri pʼikujtsïkuni tsʼiuerakuani* engari újka ambe enga lei uandajka. Joperu engari no újka ambe enga lei uandajka, ísïipirindi enajkiri no méni pʼikujtsïku pasïri tsʼiuerakuani.
26 Ísï jimbo, enga achamasï ma no pʼikujtsïkujka pasïri tsʼiuerakuani, joperu úni jarhani ambe enga Lei uandajka, ¿andi Tata Diosï no ísï exea enajki pasïri pʼikujtsïku tsʼiuerakuani?
27 Ísï jimbo, ima achamasï enga no pʼikujtsïkuka pasïri tsʼiuerakuani, joperu úni jarhani ambe enga Lei arhijka, imakenisï jusgariuati tʼungini, jimbokari tʼu kʼóru míteska ambe enga karakata jaka Leirhu ka pʼikujtsïkuskari pasïri tsʼiuerakuani.
28 Jimboka no imasï judiueka enga uandajka eska judiueska, ka no solu kuerpurhu xarharasïndi enga kʼuiripu ma pasïri pʼikujtsïkujka tsʼiuerakuani.
29 Sánderu sési, kʼuiripu ma mintsita jingonisï xarhatajti eska judiueska ka imeeri mintsitarhu ísï úsïndi enajki pasïri pʼikujtsïku tsʼiuerakuani ka i ambe espiritu santu jimbosï ísï úkuarhijti ka no jimboka ísï karakata jarhaska Leirhu. Indeni kʼuiripuni, Tata Diosïsï kʼéri ambe arhijti ka no kʼuiripuecha.
Notecha
^ O “engaksï pekariijka”.
^ O “imeecheeri konsiensia uandantasïndi”. Exe je Glosario, konsiensia.
^ Exe je Glosario, enganiarpini; ísku jándikua ambe niátani.
^ O “sirkunsidarikuarhini”.
