Roma 4:1-25
4 Jiájkani, ¿ambechi uandapirini eska andakuarheska juchaari ióntki anapu parienti Abraáni?
2 Jimboka enga Tata Diosï ísï exepiringa Abraánini komueska kʼuiripu ma enga sési jámajka nomasi jimboka ambakiti kʼuiripuespka, úpirindi arhikuarhini joperu no Tata Diosïni japarini.
3 Jimboka, ¿ambe uandasïni Karakateecharhu? “Abraáni mintsikaspti Tata Diosï Jeobani ka ima ísï exespti komueska kʼuiripu ma enga sési jámeenga”.
4 Acheeti ma enga ánchikuarhijka, maiamunhasïndi jimboka andakuarheska* ka no jimboka patroni jémba xáni ambakiti kʼuiripueuaka.
5 Joperu ima acheeti enga no ma ambe újka joperu mintsikani Tata Diosïni, Tata Diosï ísï exeati imani acheetini komueska kʼuiripu ma enga sési jámajka, jimboka Tata Diosïsï újka ísï exeani imani kʼuiripuechani engaksï no sési ambe ueenga komueska kʼuiripuecha engaksï sési jámajka.
6 Ístu Dabidi uandasïndi eska achamasï ma kánikua sési pʼikuarherasïnga enga Tata Diosï ísï exejka komueska kʼuiripu ma enga sési jámajka, joperu no jimboka ima xáni ambakiti kʼuiripueuaka. Uandaspti:
7 “Tsípisïndiksï imeecha enga Tata Diosï puákuantakia ambe engaksï no sési niátaka* ka enga mirikurhikia imeecheeri pekaduechani;
8 tsípisïndi ima kʼuiripu enga Tata Diosï Jeoba méntku no miáuaka ambe enga ima no sési niátaka”.*
9 ¿Jiájkani imeechajkuksïsï uaa tsípini engaksï pasïri pʼikujtsïkuka tsʼiuerakuani?* ¿O ístu imeecha engaksï no ísï úka? Jimbokachi jucha uandasïnga: “Tata Diosï ísï exesti Abraánini komueska kʼuiripu ma enga sési jámeenga jimboka mintsikasïreenga imani”.
10 Jimajkani, ¿Tata Diosï na jatini ísï exeski Abraánini komueska kʼuiripu ma enga sési jámeenga? ¿Enga na pasïri pʼikujtsïkupkia tsʼiuerakuani o enga nótki ísï úni japka? Jiáni enga nótki pʼikujtsïkuenga pasïri tsʼiuerakuani.
11 Tátsekua mínda ma intsïnhaspti, enga jindeepka pasïri pʼikujtsïkuni tsʼiuerakuani, para Tata Diosï ísï exeni komueska kʼuiripu ma enga sési jámeenga, jimboka ima mintsikasïreenga Tata Diosïni, nájkiruka nótki pasïri pʼikujtsïkuni japka tsʼiuerakuani. I ambe ísï úkuarhispti paraka ima jindeepiringa taati iámindu imeecheeri engaksï mintsikajka nájkirukaksï nótki pasïri pʼikujtsïkujka tsʼiuerakuani, ka ísï, Tata Diosï ísï exeani komueska kʼuiripuecha engaksï sési jámajka.
12 Ístu Abraáni jindeesti taati imeecheeri engaksï pasïri pʼikujtsïkujka tsʼiuerakuani, joperu no imeecheerku, sino ístu imeecheeri engaksï ísï mintsikajka Tata Diosïni eska Abraáni. Juchaari taati Abraáni mintsikaspti Tata Diosïni jiáni enga nótki pasïri pʼikujtsïkuni japka tsʼiuerakuani.
13 Jimboka Abraáni o imeeri uájpeechaksï no leini jimbosï niárapti aiaminhani eska ima parhakpini ma intsïnhapiringa, sánderu sési Abraáni mintsikaspti Tata Diosïni ka ima sési jámaspti imani japarini, jimbosï ísï aiaminhapti.
14 Engaksï kʼuiripuecha leini jimbo intsïnhapiringa ambe engaksï aiaminhaka, jiájkani ískuepirindi mintsikani Tata Diosïni ka no ma ambe marhuapirindi ambe enga Abraáni aiaminhaka.
15 Jimboka enga nema no újka ambe enga lei uandajka kastigarinhasïndi, ka no nema no sési úni jarhasïndi enga no jarhajka lei.
16 Tata Diosï ísï aiakuspti jimboka Abraáni mintsikasïreenga ka ístu jimboka Tata Diosï kánikua kóndentaspka. Tata Diosï ísï aiakuspti jimboka Abraáni mintsikasïreenga ka no jimboka úsïreenga ambe enga lei uandajka, parakaksï imeeri uájpeechajtu májkueni aiaminhapiringa, no imeechajku engaksï úni japiringa ambe enga lei uandajka, sino ístu imeecha engaksï májkueni mintsikapiringa eska Abraáni, enga jindeeka juchaari taati.
17 —Ísïisti eska na karakata jaka: “Jíkeni tʼungini erakuska parari uánikua ireteecheeri taatiini”—. Abraáni xarhatakuspti Tata Diosïni eska mintsikasïreenga imani enga tsípikua íntsaantajka uarhiriichani ka imani enga ísï uandajka enajki úkuarhia ima ambe enga nótki úkuarhini jaka.*
18 Ima erokuarhispti ka mintsikaspti eska niárapiringa uánikua ireteecheeri taatini nájkiruka ísï xarhareenga enajki no méni úpirini ísï úkuarhini. Ima jakajkuspti ambe enga Tata Diosï arhipka: “Xánksï uánikueuati chiiti uájpeecha”.
19 Ka nájkiruka ima méntkisï mintsikapka, kʼóru eratsesïreendi eska nóteru úpiringia sapiichani kaani,* jimboka ma 100 uéxurhinisï jatiriispkia, ka ístu eratsesïreendi eska Sara kutsïmespkia para sapiichani kánguarhiani.
20 Joperu jimboka Tata Diosï ísï aiakuspka, ima méntkisï mintsikaspti ka no méni uandaspti eska no ísï úkuarhipiringa, sánderu sési, uíuinhaxentaspti jimboka mintsikasïreenga Tata Diosïni, ka ísï úparini, kʼéri ambe arhispti imani.
21 Ka meru mintsikasïreendi eska Tata Diosï úpiringa úni ambe enga aiakupka.
22 Ísï jimbo, “Tata Diosï ísï exespti imani komueska kʼuiripu ma enga sési jámeenga”.
23 Joperu enga ísï karakata jaka “Tata Diosï ísï exesti imani komueska kʼuiripu ma enga sési jámeenga” no imantkusï arhikuekani jati,
24 ístujtsïni juchantsïni arhikuekaxati, jimbokajtsïni Tata Diosï ísï exeaka komueska kʼuiripuecha engachi sési jámajka, jimbokachi mintsikasïnga imani enga tsítantaka Jesúsini, juchaari Tatani.
25 Tata Diosï jurajkusti eskaksï kʼuiripuecha uándikupiringa ka ísïjtsïni úni puáchentani imani ambe jimbo engachi no sési úka, ka Tata Diosï tsítantasti* parajtsïni úni ísï exeni komueska kʼuiripuecha engachi sési jámajka.
Notecha
^ O “jimboka káminhaxapka”.
^ O “jimbokaksï no ísï úska eska lei na uandajka”.
^ O “méntku no miáuaka imeeri pekaduni”.
^ O “engaksï sirkunsidarikurhika”.
^ O jamberi “imani enga újka eska jauaka ima ambe enga no jaka”.
^ O “mítespti eska ísï jarhaspkia enajki uarhipia”.
^ Griegu jimbo: “jauatantasti”.
