Roma 6:1-23
-
Niáraakachi jimbanhi tsípikua ma jatsini engachi Kristuni jimbo itsï atanhaska (1 a 11)
-
Asï jurajku je eskaksïni pekadu arhiaka ambe engajtsï jatsika para úni (12 a 14)
-
Nóteru pekadueri jántspiriinia, sino iásï Tata Diosïiri jántspiriinia (15 a 23)
-
Pekadueri andakua jindeesti uarhikua; ambe enga Tata Diosï intsïmpijka, jindeesti tsípikua (23)
-
6 Jiájkani, ¿jatsipirinchi para seguiriini jarhani no sési ambe niátani parajtsïni Tata Diosï sánderu kóndentani?
2 ¡Méntku nómbe! Jimbokachi jucha uarhiska parachi nóteru pekadu jingoni irekania, jiájkani, ¿nénachi úpirini útasï pekadu jingoni irekani jarhani?
3 ¿Ojtsï no kurhangusïni eskachi jucha engachi Kristu Jesúsi jimbo itsï atanhaka* ístuchi itsï atanhaska imeeri uarhikua jingoni?
4 Ísï jimbo, juchachi imani jingoni jatsinhantaska engachi ísï itsï atakuarhika imeeri uarhikua jingoni, paraka ísï eska Kristu na tsítanhantaka* Taatiiri uinhapikua jingoni, juchajtuchi niáraaka jatsini jimbanhi tsípikua ma.
5 Juchachi imani jingoni jarhaska jimboka ima uarhiska ka juchajtuchi uarhiska parachi ístu imani jingoni jarhani engachi na tsítanhantaakia ísï eska ima na tsítanhantaka.
6 Jimboka imani jimbo, juchachi imani jingoni cháparhatanhaska ka nóteruchi ísï jámasïngia* eska ióntki, paraka juchaari kuerpu enga pekadu jukaraka, nóterujtsïni no sési ambe úrapiringia ka ísïchi nóteru jántspiriinia pekadueri.
7 Jimboka ima kʼuiripu enga uarhikia, puáminhantastia imeeri pekadu.*
8 Ístu, engachi Kristu jingoni uarhika, ístuchi jakajkusïnga eskachi imani jingoni irekaaka.
9 Jimbokachi míteska eska iásï enga Kristu tsítanhantakia,* nóteru méni uarhiatia; uarhikua nóteru uaatia juramukuni.
10 Jimboka enga ima uarhika, ma ueltajkusï uarhiti ka para méntkisï, para méntku kʼamajkuni* pekaduni, joperu iásï irekaxatiia para úni ambe enga Tata Diosï uéjka.
11 Ísï jimbo, chájtu miánta je eskajtsï uarhiskia parajtsï nóteru pekadu jimbo irekania, joperu eskajtsï iásï irekaxakaia parajtsï úni ambe enga Tata Diosï uéjka, jimbokajtsï Kristu Jesúsiiri chúxapatiiska.
12 Ísï jimbo, asï jurajku je eskaksïni pekadu arhiaka ambe engajtsï jatsika para úni, asï ú je ambe engaksï chaari kuerpuecha tsitijka.
13 Ístu, ásteru jurajkutakuarhi jeia para pekadu úraani chaari kuerpuechani* parajtsï no sési ambe niátani. Sánderu sési, Tata Diosïiri jájki jimbo ja je komueska kʼuiripuecha engaksï uarhipkia joperu engaksï iásï tsípiti jakaia, ka Tata Diosïni jurajkukua je chaari kuerpuechani* parajtsï imani ambe úni enga sési jaka.
14 Pekaduksïni nóteru jatsistia para juramuchini jimbokaksïni chánksïni nóteru leisï juramuchijkia, sánderu sési, iásïksïni Tata Diosïsï kánikua kóndentani jati.
15 Jiájkani, ¿no sésichi ambe niátaa jimbokajtsïni Tata Diosï kánikua kóndentaxaka ka jimbokajtsïni nóteru leisï juramuchini jakaia? ¡Méntku nómbe!
16 Chájtsï míteska eska engajtsï chá kurhajchaska nemani, chájtsï imeeri jántspiriisïnga, ka engajtsï chá pekadueri jántspiriika, chájtsï niáraaka uarhini, joperu engajtsï chá Tata Diosïiri jántspiriika ka imantsï kurhajchani, chájtsï sési jámaaka.
17 Joperuchi diosmaiamukua arhisïnga Tata Diosïni, jimboka nájkirukajtsï chá pekadueri jántspiriipka, mintsita jingontsï kurhajchaska Tata Diosïni ka ísïjtsï úxaka eskaksïni ima na jorhendaka.
18 Ísï jimbo, jimbokajtsï chá pʼímutanhantaskia parajtsï nóteru pekadueri jántspiriinia, iásïjtsï chá Tata Diosïiri jántspiriiskia ka imani ambejtsï úsïnga enga sési jaka.
19 Jimboka chaari kuerpu pekadu jukaraska, jíksïni ísï aianguxaka parajtsï chá úni kurhanguni. Ísï eskajtsï chá na úraka chaari kuerpuni parajtsï ikichakueni jásï ambe niátani ka no sési ambe, iásïjtu ísï úra je chaari kuerpuni parajtsï imani ambe úni enga sési jaka ka ambe enga pímbinhasïika.
20 Jimboka engajtsï chá pekadueri jántspiriipka, chájtsï no jatsispka para úni ambe enga sési jaka.
21 Jiájkani, ¿ambejtsï andaskia engajtsï ióntki ísï jámeenga? Iásïjtsï kʼuratsesïngia imani ambe jimbo engajtsï ueenga. Jimboka inde ambe uarhikuarhu pájpesïnga.
22 Joperujtsï chá iásï pʼímutanhantaskia parajtsï nóteru pekadueri jántspiriinia ka iásïjtsï Tata Diosïiri jántspiriiskia, ísï jimbo, imani ambe ú je enga pímbinhasïika ka ísïjtsï uaaka jatsini tsípikua para méntkisï.
23 Jimboka pekadueri andakua jindeeska uarhikua, joperu ambe enga Tata Diosï intsïmpijka, jindeesti tsípikua para méntkisï Kristu Jesúsini jimbo enga jindeeka juchaari Tata.
Notecha
^ Exe je Glosario, itsï atakuarhini; itsï atani.
^ Griegu jimbo: “jauatanhantaka”.
^ O “nóteruchi xásïiskia”.
^ O “pʼímutanhantastia imeeri pekadueri”.
^ Griegu jimbo: “jauatanhantakia”.
^ O “kénditani”.
^ Griegu jimbo: “chaari kuerpurhu anapu ambe”.
^ Griegu jimbo: “jurajkuku je chaari kuerpurhu anapu ambe”.
