Roma 8:1-39
-
Espiritu santu tsípikua íntspisïndi ka pʼímutantpini (1 a 11)
-
Espiritu uandantasïndi eska Tata Diosï pʼíkuantaska komueska imeeri uájpeecha (12 a 17)
-
Kueraakata pʼímutanhantaati para nóteru jántspiriinia (18 a 25)
-
“Espiritu santujtsïni uandapechesïndi” (26 ka 27)
-
Imeecha enga Tata Diosï tʼuini erakuapkia (28 a 30)
-
Juchachi orhepani uérasïnga jimbokajtsïni Tata Diosï xénchasïnga (31 a 39)
8 Ísï jimbo, imeecha engaksï Kristu Jesúsini jingoni jaka, nóksï kastigarinhasïndi.
2 Jimboka ambe enga espiritu santu juramujka,* tsípikua íntspisïndi Kristu Jesúsini jimbo, ka pʼímutantastikini parakeni pekadu ka uarhikua nóteru juramuchinia.*
3 Moisésiiri Lei no úsïreendi pʼímutaantani kʼuiripuechani indeni jimbo engaksï no újka pʼíngukuarhini jimbokaksï pekadu jukaraska. Ka Tata Diosï pʼímutaantasti kʼuiripuechani jimboka axaska imeeri Uájpani komueska kʼuiripu ma* para úni kʼamajkuni pekaduni. Ka ísï úparini, jusgaristi pekaduni enga kuerpu jukaratini jaka para kastigarini,
4 parachi jucha úni ambe enga Lei uandajka, ima ambe enga sési jaka, jucha engachi kurhajchajka espiritu santuni ka engachi no jurajkutakuarhejka parachi úni ambe enga tsitijka kuerpu enga pekadu jukaraka.
5 Jimboka imeecha engaksï jurajkutakuarhejka paraksï ísï irekani eska na tsitijka kuerpu enga pekadu jukaraka, méntkuksï imani ambe eratseni jarhasïndi ambe enga kuerpu tsitijka, joperu imeecha engaksï ísï irekajka eska espiritu santu na arhiajka, méntkuksï imani ambe eratseni jarhasïndi ambe enga espiritu santu uéjka.
6 Jimboka méntku eratseni jarhani ambe enga tsitijka kuerpu enga pekadu jukaraka, uarhikuarhu pájpisïndi, joperu méntku eratseni jarhani ambe enga espiritu santu uéjka, tsípikuarhu pájpisïndi ka pínandikua íntspisïndi;
7 méntku eratseni jarhani ambe enga tsitijka kuerpu enga pekadu jukaraka, úsïndi eskachi no uaaka sési pájperani Tata Diosïni jingoni, jimboka kuerpu no úsïnga ambe enga Tata Diosï juramujka* ka no méni uaati ísï úni.
8 Ísï jimbo, imeecha engaksï jurajkutakuarhejka paraksï úni ambe enga tsitijka kuerpu enga pekadu jukaraka, nóksï jaiapanherantasïndi Tata Diosïni.
9 Joperu enga Tata Diosïiri espiritu chánksïni jingoni jauaka, chájtsï no jurajkutakuarheaka parajtsï ísï irekani eska na tsitijka chaari kuerpu enga pekadu jukaraka, sánderu sési, ísïjtsï irekaaka eskaksïni espiritu santu na arhiaka. Joperu enga nema no ísï eratseska eska Kristu,* ima kʼuiripu no imeeriisti.
10 Joperu enga Kristu chánksïni jingoni jauaka, espiritu santuksïni tsípikua íntskuati jimbokajtsï ísï exenhaaka komueska kʼuiripuecha engaksï sési jámajka nájkirukajtsï uarhirini jauaka pekaduni jimbo.
11 Jimajkani, enga Tata Diosïiri espiritu tsítantaka* Kristu Jesúsini ka inde espiritu chánksïni jingoni jarhani, Tata Diosï indeni espirituni jimbo tsípikua íntskuauati chaari kuerpuechani engaksï uarhijka.
12 Ísï jimbo erachiicha,* nóchi jatsiska para jurajkutakuarheni parachi ísï irekani eska na tsitijka kuerpu enga pekadu jukaraka.
13 Engajtsï chá jurajkutakuarheaka parajtsï ísï irekani eska na tsitijka chaari kuerpu enga pekadu jukaraka, chájtsï sési jimbo uarhiaka. Joperu engajtsï espiritu santu jimbo uándikuska ambe enga chaari kuerpu no sési niátajka, chájtsï tsípikua jatsiaka.
14 Jimboka imeecha engaksï ísï irekajka eska Tata Diosïiri espiritu na arhiajka, imaksï kʼóru Tata Diosïiri uájpeesti.
15 Jimbokajtsï chá no intsïnhaska espiritu ma enga újka eskajtsï jántspiriuaka ka enga újka eskajtsï ménderu chétku* irekaaka, sánderu sési, intsïnhaskajtsï espiritu ma enga újka eskaksïni Tata Diosï ísï pʼíkuntaaka komueska imeeri uájpeecha, inde espiritu úsïndi eskachi uandaaka: “¡Abba,* Taati!”.
16 Tata Diosïiri espiritu úsïndi eskachi jucha sési mítetini jauaka* eskachi Tata Diosïiri uájpeeska.
17 Engachi jucha imeeri uájpeeka, jiájkani juchajtuchi pʼiuaka Tata Diosïiri erensiani májkueni eska Kristu, joperuchi orheta jatsiska para májkueni no sési nitamakuarhini eska Kristu parachi ísï kʼéri ambeeni eska ima.
18 Jimbosïni exejka eska ambe engachi iáiasï no sési nitamakuarhini jaka, méntku no ma ambeeska imani kóntperata jingoni engajtsïni Tata Diosï íntskuaka sánderu orhepani.
19 Jimboka iámu kueraakata, jingontku erokuarhixati paraka Tata Diosï xarhatauaka imeeri uájpeechani.
20 Jimboka iámu kueraakata míndakata jarhaspkia para xántkisku irekani jarhani ka nóksï ambe ma erokuarhixapti para sánderu orhepani, joperu no jimbokaksï imeecha ísï uékapiringa, sino jimboka Tata Diosïsï jurajkupka eska ísï úkuarhipiringa, ka indeni ambe jimbo, iásïchi arini ambe erokuarhixakaia:
21 eska Tata Diosïiri kueraakata pʼímutanhantaaka para nóteru jántspiriinia pekadueri nijtu uarhikueri ka ísïiuatiksï komueska Tata Diosïiri uájpeecha engaksï no jántspiriika.
22 Jimbokachi míteska eska iásï jamberi iámu kueraakata májku kʼéri seguiriixaka kómu atsïkuarhini ka kánikua no sési pʼikuarherani.
23 Joperu iásï, juchachi jatsiskia espiritu santu ka inde ambe sántku ambeesti ima ambeeri enga sánderu orhepani juuaka.* Jucha kómu atsïkuarhixaka juchaari mintsitarhu engajtsïni jamberi Tata Diosï ísï pʼíkuntaaka komueska imeeri uájpeecha, ka jiánchi pʼímutanhantaaka para jurajkuani juchaari kuerpuechani jimbokajtsïni Jesúsi euajpintaska.
24 Jiáni engajtsïni Tata Diosï pʼímutantaka pekadueri, jiánchi ueenaska indeni ambe erokuarhini. Joperu enga kʼuiripu ma exejkia ambe enga erokuarhini japka, nóteru ambe ma erokuarhini jarhasïndia ¿a no? Jimboka, ¿nénajtu uaa kʼuiripu ma erokuarhini jarhani ambe ma enga exeni jakaia?
25 Joperu engachi imani ambe erokuarhini jarhajka engachi nótki exejka, kánikuachi tekaantasïnga ka tsípikua jingonchi erokuarhini jarhasïnga eska ísï úkuarhiakia.
26 Ka ístu, espiritu santujtsïni sóntku jarhuatasïndi engachi jucha chkérini jarhajka. Jimbokachi ménisï no mítesïnga ambe kurhakuni Tata Diosïni kómarhikua jimbo, joperu engachi jucha kómu atsïkuarhini jarhajka ka nóchi míteni ambe uandani, espiritu santujtsïni uandapechesïndi.
27 Jimboka Tata Diosï exesïnga ambe engaksï kʼuiripuecha jatsijka imeecheeri mintsitarhu ka kurhangusïndi ambesï arhikuekani jaki espiritu, jimboka i kómarhijpikuasïnga pímbinharhatiichani ka imani ambe kurhakusïndi Tata Diosïni ambe enga Tata Diosï jaiapanhentajka.
28 Míteskachi eska Tata Diosï úsïnga eska inde ambe enga ima xáni újka jarhuatauaka imeechani engaksï xénchajka Tata Diosïni, imeechani enga ima erakuaka jimboka imasï ísï uékaka.
29 Orheta imeechani exeasti* ka tʼuini erakuasptia* paraksï ísïini eska imeeri Uájpa, paraka imeeri Uájpa orheteepiringa ermanu jémbeecheeri.
30 Imeechani enga tʼuini erakuapkia, uandajpaaspti; imeechani enga uandajpaaka, ísï exeasti komueska kʼuiripuecha engaksï sési jámajka. Ístu kʼéri ambe uaasti imeechani enga ísï exeaka komueska kʼuiripuecha engaksï sési jámajka.
31 Jimajkani, ¿ambechi uaa uandani? Enga Tata Diosï juchantsïni jingoni jaka, ¿néjtsïni uaa no sési úchini?
32 Míteparini eska ima imeeri Uájpani jamberi íntspiska juchantsïni jimbo, ¿andi nójtsïni íntskua imani jingoni iámindu máteru ambe?
33 ¿Né kʼamanharhitantaua Tata Diosïiri erakukateechani? Tata Diosïsï ísï exeajti komueska kʼuiripuecha engaksï sési jámajka.
34 ¿Né kastigariuaua? Kristu Jesúsisï uarhiti imeechani jimbo ka ístu tsítanhantasti.* Ima iásï Tata Diosïiri jurhijkandani jimbo jarhastia ka imajtsïnisï uandapecheni jarhajti.
35 ¿Jarhaski ambe ma enga uaaka úni eskajtsïni Kristu nóteru xénchaakia? ¿Engachi no sési nitamakuarhini jauaka? ¿Engachi uandanhiani jauaka? ¿Engajtsïni kʼuiripuecha no sési kámaaka? ¿Engachi no jatsiaka ambe tʼireni o ambe xukuparhani? ¿O engachi no sési ambe úkuarhinchaaka? ¿O engajtsïni nema uékani jauaka uándikuni? ¿Andi i ambe uaa úni eskajtsïni Kristu nóteru xénchaakia?
36 Ísï karakata jarhasti: “Tʼungini jimbo, méntkujtsïni úndaxati uándikuni. Ísïjtsïni exesïndi komueska karichiicha engaksï pánhani jakaia para uándikunhani”.
37 Joperu imani jimbo engajtsïni xénchaka, juchachi orhepani uérakusïnga iámindu ini ambe.
38 Jimbokani ji sési mítetixaka eska no ma ambe jarhaska enga uaaka úni eskajtsïni Tata Diosï nóteru xénchaakia, ni uarhikua, nijtu tsípikua, nijtu ánjeliicha, nijtuksï juramutiicha, nijtu ima ambe enga iásï úkuarhini jaka, nijtu ambe enga sánderu orhepatini úkuarhiaka, nijtu uinhapikua ambe,
39 nijtu ima ambe enga iótakuarhu jaka, nijtu ambe enga kétsekua jaka, méntku no ma kueraakata uaati úni eskajtsïni Tata Diosï nóteru xénchaakia ísï eskajtsïni na xénchajka Kristu Jesúsi enga jindeeka juchaari Tata.
Notecha
^ Griegu jimbo: “espiritu santueri lei”.
^ Griegu jimbo: “pʼímutantastikini pekadueri ka uarhikueri leiiri”.
^ Griegu jimbo: “komueska kʼuiripu ma enga pekadu jukaraka”.
^ Griegu jimbo: “ambe enga Tata Diosïiri lei uandajka”.
^ Griegu jimbo: “no jatsika Kristueri espiritu”, “pneu’ma”. Exe je Glosario, espiritu.
^ Griegu jimbo: “jauatantaka”.
^ O “ermanuecha”.
^ O “chétapu jingoni”.
^ Uandakua ma enga ebreu o arameu jimbo jaka ka enga arhikuekajka ‘¡oh, juchiiti taati!’, joperu májkueniisti enga ma pʼurhe jimbo uékperakua jingoni arhijka taatini pa.
^ O “Tata Diosïiri espiritu uandantasïndi juchaari espiritu jingoni”.
^ Griegu jimbo: “ka juchachi ueenaska pʼikuntani espiritueri ambe”.
^ O “míteantasti”.
^ O “uandasptia”.
^ Griegu jimbo: “jauatanhantasti”.
