Santiagu 1:1-27
-
Ueenasïndi uandajpaani (1)
-
Tsípisïndi ima enga tekaantajka (2 a 15)
-
Iámindu sési jásï intsïmperata, auandarhu uératini jurhasïndi (16 a 18)
-
Ju je kurhandini ka úni ambe enga Tata Diosïiri uandakua uandajka (19 a 25)
-
Ima kʼuiripu enga espejurhu ma eratekuarhijka (23 ka 24)
-
-
Pímbinhasï kómarhini ka no ikichakueni jásï ambe jingoni (26 ka 27)
1 Ji Santiagu, Tata Diosïni jámasïnga jántspikuni ka ístu Tata Jesukristuni, ka karakuaxaka 12 kúnguarhikuechani engaksï iápurisï etsakuarhitini jaka:
¡Uandajperataksïni ma axachexaka!
2 Juchiiti erachiicha,* kánikua sési pʼikuarhera je engajtsï chá mámaru ambe no sési nitamakuarhini jauaka,
3 jimbokajtsï mítetixaka eska engajtsï ísï nitamakuarhijka, xarhatasïngajtsï eskajtsï kánikua mintsikasïnga ka indeni ambe jimbo chá sánderu tekaantasïnga.
4 Joperu chá seguiriini ja je tekaantani jimbokaksïni inde ambe jarhuataaka* parakajtsï sési jorhendakata jauaka, iámindu ambe jimbojtsï sési jauaka ka nójtsï ambe ma kueratanchaaka.
5 Ísï jimbo, enga nema kueratani jaka jánhaskani, eska méntku kurhakuni jauaka Tata Diosïni ka ima jarhuataati para jánhaskani, jimboka ima kánhachani íntsaasïnga ambe ma iáminduechani ka mintsita jingoni, ka no jámasïndi tátsekua méntku arhiani* jarhani eska íntsaaska.
6 Joperu jatsisti para seguiriini jarhani mintsikaparini kurhakuni ka no jámani no mintsikani; jimboka ima enga no mintsikajka, ísïisti eska marirhu anapu ola ma enga tarhiata pʼákchakujka ka enga jini ka jini jámajka.
7 Ka inde kʼuiripu no jamberi jatsipirindi para eratseni eska Tata Diosï Jeoba íntskuaka ambe ma.
8 Inde no jánhaskasïndi ambe úni, jimboka no májku xanharu jimbo jámasïnga.
9 Joperu ima erachi enga no kʼéri ambeeka, eska tsípiaka* jimboka iásï kʼéri ambeeskia,
10 ka ima enga jatsikuarheriika, eska tsípiaka jimboka iásï nóteru kʼéri ambeeskia; jimboka ima enga jatsikuarheriika ísï nóneeuati komueska tsïtsïki ma enga juátarhisï jukajka.
11 Jimboka jurhiata andarasïnga ka patsïrasïndi plantani jimboka kánikua aparhikuarhisïnga; tátsekua tsïtsïki uekorhesïndi ka nóteru sési jáxesïndia. Ka ima kʼuiripujtu enga jatsikuarheriika ísï nóneeuati enga jamberi útasï tsípikuarhini jauaka.
12 Tsípisïndi ima kʼuiripu enga seguiriini jaka tekaantani enga no sési nitamakuarhini jarhajka, jimboka enga orhepani uéraska, intsïnhaati korona tsípikueri enga Tata Diosï Jeoba aiakuajka imeechani engaksï seguiriini jaka xénchani.
13 Enga nema no sési nitamakuarhini jauaka, eska no jámaaka uandani: “Tata Diosïrinisï tsʼéjkuni jati”. Jimboka no nema úsïnga tsʼéjkuni Tata Diosïni no sési ambe jingoni ka nijtu ima tsʼéjkujki nemani.
14 Sánderu sési, inde ambe enga mándani kʼuiripu tsitijka, inde ambesï tsʼéjkujti,* jimboka antsitasïnga ka ísku ambe ma únchatarasïndi;
15 ka enga kʼuiripu ma kánikua únchani jarhajka ambe ma, tátsekua pekadu ambe niátasïndi,* ka pekadu uarhikua juásïndi.
16 Juchiiti erachiicha engaksïni ji xáni xénchajka, asï tontu úkuarhi je.*
17 Iámindu sési jásï intsïmperata ambe ka ambakiti ambe, auandarhu uératini jurhasïndi, imasï íntspijti enga auandarhu anapu tʼíntskuani kueraaka. Ima méntku no mójtakukuarhisïndi, ima no ísïisti komueska kʼumanda.*
18 Imasï uékati eskachi jucha andajpenupiringa indeni uandakua jimbo enga jurhimbikueka, parajtsïni juchantsïni orheta erakuni iámindu imeecheeri enga ima kuerauaka.
19 Juchiiti erachiicha engaksïni ji xáni xénchajka, uékasïnga eskajtsï mítetini jauaka eskajtsï iáminduecha jatsiska para jánguarhintani sóntku kurhandini, joperujtsï no jatsiska para sóntku uandani* ka nijtu sóntku ikiani,*
20 jimboka enga nema ikiajka, no úni jarhasïndi ambe enga Tata Diosï uandajka eska sési jarhaska.
21 Ísï jimbo, ásteru jáxetini jáma jeia ka méntku jurajku je no sési ambe* ka kaxumbikua jingoni* jurajkutakuarhi je eska Tata Diosïiri uandakua tsikiaka chaari mintsitarhu, inde uandakua engaksïni uaaka pʼímutantani.
22 Joperu ísï ú je eska Tata Diosïiri uandakua na uandajka ka no jinijku kurhandini, asï jáma je tontu úkuarhini chkuanderakua ambe eratseparini.
23 Jimboka enga nema kurhandiska Tata Diosïiri uandakuani joperu no ísï úni, ísïisti komueska ima kʼuiripu enga espejurhu ma eratekuarhijka:
24 eratekuarhisïndi ka enga na kéndikujkia, miripakurhisïndi na enga jásï kʼuiripu máeka.
25 Joperu ima enga jingontku exejka indeni leini enga iámindu ambe jimbo ambakitiika ka enga újka eskachi nóteru jántspiriuakia, ka enga méntku úni jarhajka ambe enga jimini uandajka, no jinijku kurhandisïndi ka tátsekua mirikurhini, sánderu sési, ísï úsïndi eska jimini na uandajka; ka ima kánikua tsípiati ambe uéjki úni.
26 Joperu enga nema eratsejka eska kómarhixaka Tata Diosïni* ka jini no úni pʼímukukuarhini,* jandiajkusï tontu úkuarhini jati imeeri mintsitarhu ka ískusï kómarhini jati Tata Diosïni.
27 Parachi pímbinhasï kómarhini ka no ikichakueni jásï ambe jingoni, juchaari Tata Diosï ka Taati ísïsï uandajti eskachi jatsiska para kómarhini:* eskachi exeani jauaka uérfanuechani ka tsïndiichani engaksï no sési nitamakuarhini jarhajka ka méntku no jáxeni parhakpini jingoni.
Notecha
^ O “ermanuecha”.
^ O “seguiriini ja je jurajkuni eska tekaantskua kʼamaraaka indeeri ánchikuarhitani”.
^ O “arhinharhikuni”, “arhikuntani”.
^ Griegu jimbo: “arhikuarhiaka”.
^ O “jupikajti”.
^ Griegu jimbo: “enga tsitikua jarhajkia, tátsekua pekadu andajpenusïndi”.
^ O “asï jurajku je eskaksïni nema támisï jánhastaaka”.
^ O “no ísïisti eska kʼumanda enga sánhani arhijka manakuarhini”.
^ O “joperujtsï jatsiska para ióndani uandani”.
^ O “ka ióndani ikiani”.
^ O jamberi “ambe engajtsï xáni no sési újka”.
^ O “ka iatsitakuarhu”.
^ O “eska tsitisïnga relijioniiri ambe”.
^ O “no pʼínguni katambani”.
^ O “ísïsï uandajti eska jindeeska relijioni enga pímbinhasïika ka enga no ikichakueni jásï ambeeka”.
