Santiagu 3:1-18
3 Juchiiti erachiicha,* chájtsï no xáni uánikua jatsipiringa para jorhentpini jámani, jimbokajtsï chá míteska eskachi sánderu uinhamu jusgarinhaaka.
2 Jimbokachi iáminduecha someni no sési ambe úsïnga.* Ima enga méntkisï sési uandajka, iámindu ambe sési úsïndi ka ístu úsïndi iámu imeeri kuerpuni pʼínguni.
3 Engachi jucha frenu jatsimukuajka kabaiuechani jindeesti parachi pʼínguani ka únchi nani uéjkisï paani.
4 Ístu, exea je barkuechani: nájkirukaksï kánikua kʼéka ka tarhiata manataani, jimeesïsïksï nirasïndi nani enga bolanti sapichu ma* paajka, ka jimeesïsïksï nirasïndi nani enga uékaaka nirani ima enga bolanti sapichuni manatajka.
5 Májkueni úkuarhisïndi katamba jingoni: nájkiruka sapichu ambeeka kuerpurhu, kánikua arhikuarhisïndi. ¡Ka exe je na enga xáni sántku chpiri jingoni ueenajka kʼéri juáta ma kurhini!
6 Katambajtu ísïisti komueska chpiri. Ambe engachi xáni jukaka juchaari kuerpurhu, katambasï no sési ambe niátajti, jimboka ikichakueni jásï ambe úsïnga iámu kuerpuni; katamba tsïjpasïndi kʼuiripuecheeri irekuani, ka ísï eska Jeena* indejtu májkueni kʼamajpisïndi.
7 Jimboka mámaru jásï animali enga no sési jámajka, pájaruecha, animaliicha engaksï antsikukuarhijka* ka animaliicha engaksï marirhisï jámajka, niárasïndiksï mansu úkuarhini ka kʼuiripuechaksï mansu uaasïndi.
8 Joperu no ma kʼuiripu úsïndi pʼínguni katambani. No nema úsïndi ísku jatsini ka kánikua no sési útspisïndi; iámu uinirixati uarhirakua.*
9 Katamba jingonchi kʼéri ambe arhisïnga Tata Diosï Jeobani enga jindeeka Taati, joperuchi ístu katamba jingoni no sési ambe uandasïnga ima kʼuiripuecheeri engaksï ísï únhaka “eska Tata Diosï na jásïika”.
10 Inde penchumikua enga kʼéri ambe arhijka Tata Diosïni,* ístu indesï no sési ambe uandajti.
Juchiiti erachiicha, no sési jarhasti eska i ambe úkuarhiaka.
11 Jima enga itsï kʼameri uérajka, no úsïndi itsï pʼuntsumarha uérani, ¿a no?
12 Juchiiti erachiicha, jígusï no úsïndi aseituna jukani ka nijtu ubasï újki jígusï jukani, ¿a no? Ka nijtu itsï pʼuntsumarha uérajki jima enga itsï itumarha uérajka.
13 ¿Jaki ma ísï chá enga jánhaskajka ka enga iámindu ambe kurhangujka? Eska imeeri ambakiti jángua jingoni xarhataaka eska iatsitakuarhu jámasïnga,* jimboka jánhaskani jarhuajpesïnga para nema iatsitakuarhu jámani.
14 Joperu engajtsï chá jatanhekuajka máteruechani ka kánikuajtsï tsitini arhirperani jámani máteruecha jingoni, asï jáma je arhikuarhini nijtu chkuanderakua ambe uandani jurhimbikueri ambe.
15 Inde jánhaskakua no Tata Diosïiriisti; sánderu sési, parhakpini anapu ambeesti, imeecheeriisti engaksï ísï jámajka eskaksï animaliicha ka demoniuecheeri ambeesti.
16 Jimboka jima engaksï jarhajka kʼuiripuecha engaksï jatanhetspijka ka engaksï tsitijka máteruecha jingoni arhirperani, ísku no nani máru jarhasïndi ambe ma ka no sési jásï ambe jarhasïndi.
17 Joperu ima kʼuiripu enga Tata Diosïiri jánhaskakua jatsika, pímbinhasï irekua ma jatsisti ka ístu jánguarhintasïndi iáminduecha jingoni sési pájperani, kurhangutspisïndi, kurhandirasïndi ka kánikua pʼamojpesïndi, ambakiti ambe úsïndi,* iáminduechani májkueni kaasïndi ka no ísku apariisti.
18 Ístu, imeecha engaksï jánguarhintajka máteruecha jingoni sési pájperani, jarhuajpesïndiksï para pínandikua jarhani* ka sésiksï jámasïndi engaksï ísï újka.
Notecha
^ O “ermanuecha”.
^ O “someni téksarhutasïnga”.
^ O “nani enga timoni”.
^ Exe je Glosario, Jeena.
^ O “akuitsiicha ka tikuiniini járhatiicha”.
^ O “benenu”.
^ O “enga sési ambe uandajka”.
^ O “iatsitakuarhu eratsesïnga”, “iatsitakuarhu uandasïnga”.
^ O “kánikua frutu jukasïndi”.
^ O jamberi “inde frutu enga jukajka jimboka nema sési jámasïnga, jima jatsikunhasïndi nani enga pínandikua jarhajka”.
