Titu 1:1-16
1 Ji Pablu, Tata Diosïiri jántspiriiska ka tata Jesukristueri apostoliiska, ka májkueni mintsikasïnga eskaksï Tata Diosïiri erakukateecha ka ísï eska na terukuntajka jurhimbikua ambe jingoni enga xarhatajka na engachi jatsika para marhuakuni Tata Diosïni;*
2 ka iámindu inde ambe uaxastakata jarhasti indeni ambe jimbo engachi erokuarhini jaka, enga jindeeka tsípikua para méntkisï, ambe engajtsïni Tata Diosï ióntkitki aiachika, ima Tata Diosï enga no chkuanderajka
3 —ka jiáni enga ima sési exeka, ambakiti aianhperakuani jimbo, mítetarpisti imeeri uandakuani ka ji erakunhaska parani indeni ambe jámani aianhpini jimboka ísï juramuska juchaari Tata Diosï, ima engajtsïni pʼímutantaka—.
4 Karachixakakeni tʼungini Titu, jíkeni tʼungini ísï exesïnga komueska juchiiti sapi,* jimbokari tʼujtu májkueni mintsikasïnga eskani ji:
Ji kómarhisïnga eska Tata Diosï, enga jindeeka Taati, ka ístu Kristu Jesúsi engajtsïni pʼímutantaka, eskaksïni kánikua kóndentaaka* ka eskaksïni jarhuataaka parari pínandikua jatsini.
5 Jíkeni jini jurajkuspka Kreta parakari sési peentapiringa indeni ambe enga no káni sési úkuarhini japka* ka parakari erakuapiringa máru orhejtsïkutiichani mándani ireta jimbo ka jíkeni arhispkia na engari erakuapiringa:
6 orhejtsïkuti ma jatsisti para sési jámani paraka kʼuiripu no uaaka no sési ambe uandani imeeri ambe, jatsisti para májku uarhiitintku jatsini ka imeeri uájpeechajtuksï jatsisti para jakajkutiini, nóksï jatsisti para ísï mítekateeni eskaksï tsïnchekuarhintasïnga* o eskaksï no kurhandirasïnga.
7 Ka jimboka Tata Diosïiri ambe exeni jarhasïnga,* orhejtsïkuti ma jatsisti para sési jámani paraka kʼuiripu no uaaka no sési ambe uandani imeeri ambe, ka no jatsisti para inchandimeni, nijtu sóntku ikiani, no jatsisti para kauicheeni, nijtu no sési jámani,* ka ístu no jatsisti para sentabu tsitini ka nijtu imeeri ambe jimbojku uandanhiani.
8 Sánderu sési, jatsisti para sési kámpini, tsitini imani ambe úni enga sési jaka, méntkisï sési eratsentani ambe ma,* sési jámani ka mintsinharhikueni ka ístu jatsisti para pʼíngukuarhini.
9 Enga jorhentpini jauaka,* jatsisti para Tata Diosïiri uandakua jimbo jupindaskuarhini enga mintsinharhikueka, paraka uaaka uinhaperaantani máteruechani* indeni ambakiti jorhentperakua jingoni* ka paraka uaaka xukaani* imeechani engaksï máteru ambe jorhentpini jauaka.
10 Jimbokaksï jarhaska uánikua achamasïicha engaksï méntku no uéjka kurhandirani, engaksï ísku ambe ma uandajka ka engaksï támisï jánhastaajka kʼuiripuechani, sánderia ima kʼuiripuecha engaksï inchandimejka paraksï tatakeecha pasïri pʼikujtsïkuni tsʼiuerakuani.*
11 Uétarhisïndi eskachi pínasku jatsiauaka indeeni járhati achamasïichani jimbokaksï indeechasï támisï jánhastaajti iámu kʼumanchikuarhu anapuechani, indeni jimbo engaksï chkuanderakua ambe jorhentpijka nomasi paraksï andakuekani.
12 Asta Kreta anapu achamasï ma, enga imeecheeri uandakua páriika,* ísï uandaspti: “Kreta anapuechaksï no sési chkuanderasti, ísïksï jámasïndi komueska animaliicha, no sésiksï xépisti ka puruksï tʼireni uékasïndi”.
13 Ini ambe engakeni arhini jaka, meru ísïisti. Jimbokenisï ísï arhini jaka eskari seguiriini jauaka uinhamu xukaani* parakaksï imeecha seguiriini jauaka mintsikani
14 ka parakaksï ísku kurhandiaka judiuecheeri uandantskua ambe ka ístu ambe engaksï juramujka inde kʼuiripuecha engaksï jurajkujka jurhimbikua ambe.
15 Para ima kʼuiripuecha engaksï pímbinhasïika, iámindu ambe pímbinhasïisti. Joperu para imeecha engaksï ikichakueni úkuarhikia ka engaksï no mintsikajka, no ma ambe pímbinhasï jarhasti, jimbokaksï ikichakueni jásï ambe úskia imeecheeri eratsekuani ka ístuksï nóteru ambe ma pʼikuarherasïndia.*
16 Kʼuiripu japarinksï uandasïndi eskaksï míteska Tata Diosïni, joperu imani ambe jimbo engaksï újka, xarhatasïndiksï eskaksï méntku no kurhajchasïnga, jimbokaksï imeecha ikichakueni jásï ambeeska ka nóksï kurhandirasïndi ka méntkuksï no marhuasïndi paraksï ambakiti ambe úni.
Notecha
^ O “para méntkisï kómarhini Tata Diosïni”, “para no jurajkuni Tata Diosïni”.
^ O “uátsïti”.
^ Exe je Glosario, Tata Diosï kánikua kóntpintasïndi.
^ O “enga no marhuajka”.
^ O “eskaksï nánderkueni jámasïnga”.
^ O “jimboka iámindu ambe exeni jarhasïnga Tata Diosïiri kʼumanchikuarhu”.
^ O “nijtu uarhipeni jámani”.
^ O “méntkisï jánhaskatiini”.
^ O “Para sési jorhentpini”.
^ O “paraka uaaka arhiani máteruechani ambe engaksï jatsika para úni”.
^ O “indeni jorhentperakua jingoni enga kánikua marhuajka”, “indeni jorhentperakua jingoni enga sési útspijka”.
^ O “arhistakuani”.
^ O “sirkunsidarikuarhini”.
^ O “enga imeecheeri profeteeka”.
^ O “uandontskuarhekuani”.
^ O “ka ístu imeecheeri konsiensia”. Exe je Glosario, konsiensia.
