Titu 2:1-15
2 Joperu tʼu seguiriini ja jorhentpini indeni ambe enga terukuntajka ambakiti jorhentperakua jingoni.*
2 Ima achamasïicha engaksï jatiriikia, jatsistiksï para pʼíngukuarhini iámindu ambe jimbo ka mintsinharhikuenksï, ístuksï jatsisti para sési eratsentani ambe ma ka ístuksï jatsisti para kánikua mintsikani, xénchpeni ka tekaantani.
3 Ístu, ima uarhiitiicha engaksï jatiriikia jatsistiksï para méntkisï sési jámani paraksï xarhatani eskaksï janhanharhisïnga Tata Diosïni, nóksï jatsisti para uandakua ambe jauatatspeni, nijtuksï kauicheeni ka jatsistiksï para ambakiti ambe jorhentpini,
4 parakaksï uaaka arhistakuani* imani uarhiitiichani engaksï sánderu sapichku jaka, parakaksï indeecha xénchauaka uámbeechani ka uájpeechani,
5 parakaksï sési eratseaka, parakaksï pímbinhasï jauaka, parakaksï ánchikuarhiaka kʼumanchikuarhu* ka ambakiti kʼuiripuenksï, ka ístu parakaksï méntkisï kurhajchauaka uámbeechani paraka no nema no sési uandaaka Tata Diosïiri uandakueri ambe.
6 Ka ístu, seguiriini ja arhistakuani imani tatakeechani engaksï sánderu sapichku jaka, parakaksï sési eratseaka,
7 ka tʼu ueena ambakiti ambe úni ka méntkisï sési jáma parakaksïni máteruecha exeaka ka májkuenksï úni. Ka jánguarhinta sési jorhentpini imani ambe enga pímbinhasïika*
8 ka méntkisï sési uanda* paraka no nema no sési exeaka ambe engari uandaaka, parakaksï kʼuratsetanhaaka imeecha engajtsïni ikiachejka, jimbokaksï no uaaka no sési ambe uandani juchaari ambe.
9 Imeecha engaksï jántspini jámajka jatsistiksï para méntkisï kurhajchaani patroni jémbeechani: jatsistiksï para jánguarhintani úni ambe engaksï imeecha arhiauaka, ka nóksï jatsisti para no sési mókukuarhini
10 ka nijtuksï jámani sïpakuani, sánderu sési, jatsistiksï para xarhatani eskaksï kánikua mintsinharhikueska, paraka indeecha jimbo, méntkisï sési exenhaaka ambe engajtsïni juchaari Tata Diosï jorhendajka, ima Tata Diosï engajtsïni pʼímutantaka.
11 Jimboka enga Tata Diosï ísï pʼímutaantaka iámindu jásï kʼuiripuechani, xarhatasti na enga xáni kóntpintajka.
12 Jiájkani, Tata Diosïiri kóntperatani jimbo, jucha jorhenguarhisïnga eskachi no jatsiska para jiókuarhini ambe enga no terukuntajka imani ambe jingoni enga Tata Diosï uéjka, nijtuchi imani ambe úni enga i parhakpini tsitijka ka ístuchi jorhenguarhiska eskachi jatsiska para sési eratseni, sési jámani ka janhanharhini Tata Diosïni* ini parhakpini jimbo*
13 engachi jamberi erokuarhini jauaka imani xáni ambakiti kóntperatani engachi jatsiaka, ka ístu ima jurhiatikuani enga juchaari Tata Diosï, ima enga xáni uinhapitiika, ka ístu tata Jesukristu, ima engajtsïni pʼímutantaka, xarhataaka na engaksï xáni kʼéri ambeeka.
14 Ima íntspisti imeeri tsípikuani juchantsïni jimbo parajtsïni pʼímutantani* ka nóteruchi no sési ambe niátania* ka pímbinhajkuntastijtsïni parachi imeeri ireteeni ka mínguarhisti ini iretani jimboka kánikua ambakiti ambeeska* para ima. Ka i ireta tsípikua jingoni uékaxatiia ambakiti ambe úni.
15 Seguiriini ja iiri ambe uandani ka arhistatspini* ka xukajpi jimbokari jatsiska juramukua para ísï úni. Asï jurajkutakuarhi paraksïni máteruecha ísku exeni.
Notecha
^ O “indeni jorhentperakua jingoni enga kánikua marhuajka”, “indeni jorhentperakua jingoni enga sési útspijka”.
^ O “jánhastaantani”, “jorhendaani”.
^ O “parakaksï úkua ambe úni jauaka kʼumanchikuarhu”.
^ O jamberi “jánguarhinta pímbinhasï jorhentpini”.
^ O “imani ambe uanda enga kánikua marhuajka”, “imani ambe uanda enga sési útspijka”.
^ O “ka kómarhini Tata Diosïni”, “ka no jurajkuni Tata Diosïni”.
^ O “ini tiempu jimbo”. Exe je Glosario, tiempu.
^ Griegu jimbo: “euajpintani”.
^ O “nóteruchi únia imani ambe enga no terukuntajka lei jingoni”.
^ O “kánikua jukaparhakueska”.
^ O “ka uinhaperpentani”.
