Titu 3:1-15
3 Tʼu méntku miátaantani ja eskaksï jatsiska para janhanharhiani ka kurhajchaani gobiernuechani ka ístu juramutiichani ka eskaksï méntkisï listu jauaka para ambakiti ambe úni,
2 ka eskaksï no jámaaka no sési ambe uandani máteruecheeri, eskaksï no jámaaka úrhutani máteruecha jingoni, eskaksï kurhangutspiaka ka eskaksï no jámaaka inchandimeni ka eskaksï jatsiska para méntkisï iatsitakuarhu jámani* iámindu kʼuiripuecha jingoni.
3 Jimbokachi juchajtu ióntki no sáni jánhaskasïreenga ka nóchi kurhajchasïreenga Tata Diosïni, kʼuiripuechajtsïni támisï jánhastasptia ka imani ambejkuchisï úncheenga ambe engachi xáni tsitienga ka tsípikuarhinkuchisï uékeenga, kánikuachi no sési ambe niátasïreenga ka enbidiariuasïreengachi máteruechani, ikichakueni jásï ambeespkachi ka kánikuachi ikiatsperasïreenga.
4 Joperu Tata Diosï, ima engajtsïni pʼímutantaka, xarhatasti na enga xáni sési kámpijka ka ístu na enga xáni xénchaajka kʼuiripuechani
5 engajtsïni ísï pʼímutantaka; jimbokajtsïni juparhintaska jimbochisï iásï tsípikua jatsikia ka ístu jimbokajtsïni jimbanherantaska imeeri espiritu santu jimbo —imajtsïni pʼímutantasti jimbokajtsïni pʼamojkusïnga ka no jimbokachi jucha xáni sési jámapiringa—.*
6 Imajtsïni kánikua espiritu santu íntskusti tata Jesukristuni jimbo, ima engajtsïni pʼímutantaka,
7 parakachi juchajtu úpiringa pʼirani indeni erensiani engachi erokuarhini jaka, enga jindeeka tsípikua para méntkisï, ka juchachi jiáni niáraaka indeni ambe intsïnhani engajtsïni Tata Diosï ísï exeaka komueska kʼuiripuecha engachi sési jámajka indeni jimbo engajtsïni ima kánikua kóndentajka.
8 I ambe meru ísïisti ka ji uékasïnga eskari méntku úndaaka indeni ambe arhiani parakaksï imeecha engaksï niárakia jakajkuni Tata Diosïni, seguiriini jauaka jánguarhintani ambakiti ambe úni. I ambe kánikua sési jarhasti ka kánikua marhuakuasïndi kʼuiripuechani.
9 Joperu tʼu asï jáma ísku ambe ma jimbo arhirperani jarhani, nijtu ióntki anapu parienticheeri ambe jimbo, ka ístu asï jáma Leini jimbo arhirperani jarhani, jimboka ískueska inde ambe ka méntku no sáni marhuasïndi.
10 Ka enga jaka achamasï ma enga chkuanderakua ambe jorhentpini jaka ka tʼu tsimani xanhari arhinia* eska no jámaaka indeni ambe úni ka ima no kurhandini, jiájkani méntku ásteru jámia kúrhini
11 jimbokari míteskia eska inde achamasï támisï niraskia ka eska nóteru mintsikasïngia, ka ístu eska no sési ambe niátaxaka ka jandiajkusï jirinhakuarhini jati para kastigarinhani.
12 Jamberikeni Ártemasini o Tíkikuni axacheaka, ka engaksï na niáraakia tʼu jánguarhinta kókuani jurhani Nikópolisi parachi jima exejperantani, jimbokani uandaskia eskani jima pakaraaka enga na ueenaakia iauani.*
13 Jarhuata Senasini, indeni achamasïni enga sési mítekuka Leiiri ambe, ka ístu jarhuata Apolosini ka exe eskaksï no ma ambe kueratanchaaka xanharu jimbo.
14 Joperu eskaksï juchaari erachiicha* méntku jánguarhintani jauaka ambakiti ambe úni, paraksï jarhuajpeni jiáni enga sóntku uétarhini jauaka ambe ma, ka engaksï ísï uaaka, méntkuksï no jurajkuati ambakiti ambe úni.*
15 Iáminduecha engaksï xáni jíndeni jingoni jaka, indeechaksïni uandajperata ma axachexati. Ístu, aiangua sáni imani erachiichani engajtsïni xénchajka eskani uandajperata ma axakuaxaka jimbokaksï imeechajtu mintsikasïnga Tata Diosïni.
Eskaksïni Tata Diosï kánikua kóndentaaka.
Notecha
^ O “iatsitakuarhu eratseni”, “iatsitakuarhu uandani”.
^ O “xáni ambakiti ambe úpiringa”.
^ O “ma o tsimani xanhari uandontskuarhekunia”.
^ O “iéstani”.
^ O “ermanuecha”.
^ Griegu jimbo: “nóksï jámaati no jukani frutu”.
