1. ¿Kʼuiripuechaksï na xáni jakajkusïni majiani ka sïkuamikua ambeni?

 “JINI África ískuesti kurhanguarhini sini jarhaski brujecha o nómbe”, ísï uandasïndi libru ma enga África anapu relijioniiri ambe exejka African Traditional Religion (La religión tradicional africana), ístu uandasïndi eska para “iámindu África anapuecha, sïkuamikua ambe meru jarhaska”. Uánikua kʼuiripuechaksï jakajkusïndi majiani ka sïkuamikua ambeni, komu imeecha engaksï no jorhenaka arhintani peru ístu imeecha engaksï kánikua ambe jorhenaka, ístu orhejtsïkutiicha relijioni islamiiri anapuecha ka imeecha engaksï kristianu arhikuarhijka jakajkusïndiksï majiani ka sïkuamikua ambeni.

2. Seguni ambe engaksï jakajkujka Áfrika anapuecha, ¿nani uéraski majia?

² Áfrikaksï jakajkusïndi eska jarhaska uinhapikua ma enga no újka xarharani ka enga Tata Diosïirika. Uandasïndiksï eska ini uinhapikuani úrasïngaksï espirituecha ka imeecha engaksï ióntki uarhikia. Ka ístu eskaksï máru kʼuiripuecha úrasïnga ini ambe paraksï sési ambe úni (majia blanka) o paraksï no sési ambe niátani (majia negra).

3. ¿Para ambe úranhasïni majia negra ka ambe jakajkunhasïni eska úsïnga úni?

³ Majia negra, úranhasïndi para enemiguechani no sési úkuani. Uandanhasïndi eska imeecha engaksï jorhenaka majia negrani, úrasïngaksï uasïsïichani, pájaruechani, tíndiichani ka máteru animaliichani paraksï no sési úkuani kʼuiripuechani. Ka uánikua kʼuiripuechaksï jakajkusïndi eska majia negra úsïnga eskaksï kʼuiripuecha arhirperaka, eskaksï no uaaka kánguarhiani sapiichani, eskaksï pʼamenchaaka ka asta uándikuani kʼuiripuechani.

4. ¿Ambe jakajkunhasïni brujecheri ambe, ka ambeksï uandantaskia máru kʼuiripuecha engaksï sïkuamikua ambe niáteenga?

⁴ Sïkuamikua sáno májkueniisti eska majia negra. Uandanhasïndi eskaksï brujecha chúrikuechani uérhiantasïnga imeecheeri kuerpuechani ka eskaksï nirasïnga máteru nanisï kárapani paraksï máteru brujecha jingoni exejperantani o paraksï sánhani arhini uándikuani imeecheeri enemiguechani. Jimbokaksï brujecheri kuerpuecha útasï kamarhu kʼuíni jarhasïnga, ini ambeksï ima kʼuiripuecha uandasïndi engaksï sïkuamipka. Pori ejemplu, África anapu rebista ma arhisïndi ambe engaksï uandapka máru nanakeecha (ka sáno iáminduecha iurhitskiriicha) engaksï sïkuamikua ambe ueenga, imeechaksï uandaspti: “Uándikuaskia sientu sinkuenta kʼuiripuechani úparini eskaksï aksidenti ma jatsiaka”; “sinko sapiichani uándikuaskia imeecheeri iurhiri itsurhipariani”; “tanimu juchiiti nobiuechani uándikuaska jimbokajtsïni jurajkuspka”.

5. ¿Para ambe úranhasïndi majia blanka, ka nénaksï úranhasïndi kʼuiripuecha?

⁵ Majia blanka úranhasïndi para kuájchakurinhani para no sési jásï ambeeri. Imeecha engaksï indeni ambe kámajka jukaasïndiksï pulserechani o aniiuechani engaksï majieri ambeeka, ístuksï itsïmasïndi sïpiata ambe oksï indeni ambe atarhikuarheni. Ístuksï jískasïndi imeecho imani ambe engaksï uandajka eska uaaka kuájchakuani ka kaasïndiksï amuletuechani engaksï Koraniri tekstuechani jukajka o Biblieri.

6. ¿Ióntki ambeksï úski úni Satanási ka imeeri demoniuechaksï, ka nénachi jatsiski para exeni imeecheeri uinhapikuani?

⁶ Ísïisti eska Satanási ka demoniuechaksï uaaka kánikua no sési úkuani kʼuiripuechani. Úsïndiksï eratsetarani ka úkuani ambe ma, ióntki asta incharhiasptiksï animaliichani ka kʼuiripuechani (Mateu 12:​43-​45). Nájkiruka no sési japiringa eskachi uandapiringa eskaksï no xáni uinhapikua jatsiska, nójtu sési japirindi eskachi uandapiringa eskaksï jukarimindu uinhapitiiska.

7. ¿Ambe uékasïni Satanási eskachi jucha jakajkuaka, ka náki ejemplujtsïni jarhuatasïni kurhanguni ini ambe?

⁷ Satanási sési mítekusti néna támisï jánhastani. Jakajkutaraasïndi kʼuiripuechani eska sánderu uinhapikua jatsiska eska enga meru jatsika. Sáno ísïisti komu ambe enga úkuarhipka guerra ma jimbo jini África: sondaduechaksï kʼérati bosinechani úraspti para chérani imeecheeri enemiguechani. Ante de uarhipeni imeecha jingoni, kánikuaksï karhatakuspti bolumeni grabasioniri ma engaksï kurhakuarhienga kʼérati armecha parakaksï enemiguecha eratsepiringa eskaksï kʼérati armechani kaasïreenga. Májkueni, Satanási uékasïndi eska kʼuiripu eratseaka eska ima sánderu uinhapikua jatsika. Uékasïndi chérani kʼuiripuechani parakaksï uaaka ambe enga ima uékajka ka no ambe enga Tata Diosï Jeoba uékajka. Ju je exeani tanimu chkuanderakuechani enga Satanási uékajka eskachi jucha jakajkuaka.

8. ¿Nákiiski chkuanderakua ma enga Satanási uéjka eska kʼuiripu jakajkuaka?

⁸ Chkuanderakua ma enga Satanási uéjka eska kʼuiripu jakajkuaka jindeesti, eska no ísku jatinisï no sési ambe úkuarhijka, eska enga no jarhajka nema enga újka eska no sési ambe úkuarhiaka, jiájkani Noambakitiiri uinhapikua jimboesïnga. Pori ejemplu, enga tataka sapichu ma malaria jimbo uarhipiringa. Jamberi amamba mítetia eska inde pʼamenchakua kupuecha jimbo kéritperanhasïnga. Joperu jamberi ístu jakajkujti eska nema úraska sïkuamikua ambe paraka úpiringa eska inde kupu atapiringa tataka sapichuni.

9. ¿Néna xarhatasïni Biblia eskaksï no iámindu problemecha Satanásini jimboesïnga?

⁹ Nájkiruka Satanási újka eskaksï jauaka máru problemecha, nóchi uaaka uandani eska iámu ambe enga no sési úkuarhijka imani jimboesïndi. Biblia uandasïndi: “Eska ima enga sánderu uiriijka, no méntkisï andasïnga, ka níjtu enga sánderu uinhapika, andajki guerrani, ka niksï mímixeticha jatsijki méntkisï tʼirekua, ka niksï jánhaskatiicha jatsijki méntkisï tumina, ka niksï méntkisï sési exenhani imeecha engaksï jorhenaka, jimboka méntkisï úkuarhisïnga o jarhasïnga ambe ma enga ma no erokuarhijka” (Eclesiastés 9:​11). Ísï jimbo, nema úpirindi sánderu uiriini eska máteruecha, joperu no andani karrerani. Jimboka úpiringa úkuarhini “ambe ma enga ma no erokuarhijka”: komu téksarhutani, no sési pʼikuarherani o sïngueri ma pʼirani. Ka né uéjki úpirindi ini ambe úkuarhinchani, ka no jimboka Satanási o sïkuamicha jimboeuaka. Solu niárasïndiksï úkuarhini.

10. ¿Ambe uandanhasïni sïkuamicheri ambe, ka nénachi jimbo míteski eska chkuanderakueska?

¹⁰ Máteru chkuanderakua enga Satanási uéjki eska kʼuiripu jakajkuaka jindeesti eskaksï sïkuamicha uérhiantasïnga imeecheeri kuerpuechani ka eskaksï nirasïnga máteru sïkuamicha jingoni tánguarhintani paraksï uándikpini. Joperu kurhamarhikuarhi je: “Engaksï sïkuamicha úpiringa inde ambe úni, ¿ambesï meru uérhintani japirini kuerpuni? ”. Eskachi na exekia, alma kʼuiripu máesti, no ambe ma enga újka uérhintani. Ístu, espiritu uinhapikuesti enga újka eska kuerpu uaaka manakuarhini, joperu no ma ambe úsïndi úni enga no kuerpuni jimboeuaka.

11. ¿Nénachi jimbo míteski eskaksï sïkuamicha no úsïnga uérhiantani imeecheeri kuerpuechani? ¿Chá jakajkusïni indeni ambe?

¹¹ Ni alma ni espirituksï úsïndi uérhintani kuerpuni paraksï sési o no sési ambe úni. Ísï jimbo, sïkuamichaksï no uérhiantasïndi imeecheeri kuerpuechani. Ka nóksï úsïndi ambe engaksï imeecha uandajka ka jakajkujka.

12. ¿Néna jámasïni Satanási parakaksï kʼuiripuecha eratseaka eskaksï úska ambe ma engaksï no meru ísï úka?

¹² ¿Andiksïsï imeecha engaksï sïkuamika jiájkani uandakuarhintajka eskaksï niáraska indeni ambe úni? Satanási úsïndi jakajkutarani kʼuiripuechani eskaksï niáraska indeni ambe nitamakuarhini nájkirukaksï no meru ísï úpka. Jánhaskuecha jimbo jakajkutaraasïndi kʼuiripuechani parakaksï eratseaka eskaksï exeska, kurhaaska o úska ambe ma enga no meru ísï úkuarhipka. Ísï úparini jánguarhintasïndi parakaksï kʼuiripuecha jarhariaka Tata Diosï Jeobani ka eratsetaraasïndi eska no ísïiska ambe enga Biblia uandajka.

13. a) ¿Sési jarhaski úrani majia blanka? b) ¿Ambe uandasïni Biblia majieri ambe?

¹³ Terseru chkuanderakua jindeesti eska majia blanka sési jarhaska jimboka kénditasïnga majia negrani. Joperu Biblia uandasïndi eska iámindu jásï majia no sési jarhaska. Exe je arini juramukuechani enga Tata Diosï Jeoba íntsaapka Israeli anapu iretani enga majieri ambe uandajka ka ístu imeecheeri engaksï majia ambe kámapiringa:

•   “Nóksï jatsisti para majia úrani.” (Levítico 19:26.)

•   “Enga achamasï ma o uarhiiti ma uaaka eska uarhiriicha jingoni uandontskuarhinhaaka o engaksï adibinarijka, jatsistiksï para uarhini.” (Levítico 20:27.)

•   “No jatsisti para jarhani nema tʼungini jingoni enga [...] majia újka, ni nema enga uékaaka míteni ambe úkuarhia sánderu orhepatini, ni sïkuami, ni nema enga no sési úkuauaka máteruechani sïkuamikua jingoni, ni nema enga sïkuamini ma úraaka para uarhiriichani jingoni uandontskuarheni.” (Deuteronomio 18:​10-​14.)

14. ¿Andisï Tata Diosï Jeoba íntspiapi leichani para no úranhani majia?

¹⁴ I leichaksï sési xarhataspti eska Tata Diosï no uékasïreenga eskaksï imeeri marhuariicha úrapiringa majiani. Tata Diosï Jeoba íntsaaspti imeeri iretani ini leichani jimboka xénchasïreenga ka no uékasïreendi eskaksï chéni pʼikuarherapiringa o jakajkukuechani ambe jatsiani indeeri ambe ka nijtu eskaksï demoniuecha no sési úkuapiringa.

15. ¿Néna xarhatasïni Biblia eska Jeoba sánderu uinhapitiiska eska Satanási?

¹⁵ Nájkiruka Biblia no iámindu ambe uandantajka ambe engaksï újka ka ambe engaksï no újka úni demoniuecha, xarhatasïndi eska Tata Diosï Jeoba sánderu uinhapitiiska eska Satanási ka imeeri demoniuecha. Jeoba petantaspti Satanásini auandarhu uératini (Apokalipsisi 12:⁠9). Ístu ju je exeni eska Satanási sésikua kurhakuspka Tata Diosï Jeobani paraka tsʼéjkupiringa Jobuni ka kurhajchaspti enga Tata Diosï arhipka eska no uándikupiringa (Job 2:​4-6).

16. ¿Nénchi uaa andarhierani parajtsïni kuájchakuni?

¹⁶ Proverbios 18:10 arhisïndi: “Jeobaeri arhinhakua uiuinhasï torre máesti. Jima nirasïndi ima enga jurhimbitiika, ka kuájchakunhasïndi”. Ísï jimbo, paraka ma uaaka kuájchakuarhini jatsisti para andarhierani Tata Diosï Jeobani. Tata Diosï marhuariichaksï no úrasïndi amuletuechani ni itsïmani ambe ma enga majia jukaraaka para kuájchakukuarhini Noambakitiiri ka demoniuecheri, níjtuksï chéjki eskaksï sïkuamicha no sési úkuauaka. Sánderu sési jakajkusïndiksï arini ambe enga Biblia uandajka: “Jimbokaksï Tata Diosï Jeobaeri éskuecha iápurisï exexaka echerirhu para uinhapikua xarhatakuani imeechani engaksï iámu mintsita jingoni marhuakujka” (2 Crónicas 16:⁠9).

17. Eska na arhijka Santiagu 4:​7, ¿ambeerichi uaa seguru jarhani, joperu ambechi jatsiski para úni jucha?

¹⁷ Engajtsï marhuakuska Tata Diosï Jeobani uaakajtsï mintsikani ambe enga Santiagu 4:7 uandajka: “Ísï jimbo, kurhajcha je Tata Diosïni, joperu uinhamu anhaxurhiku je Noambakitini ka imaksïni sïpakuarhichiati”. Engajtsï marhuakuska Tata Diosï jurhimbitiini Jeobani ka kurhajchantsï, uaakajtsï seguru jarhani eskaksïni ima kuájchakuaka.