¿Nénaksï jásïiski ambakiti amiguecha?
KAPITULU 8
¿Nénaksï jásïiski ambakiti amiguecha?
“Engani ikiani jarhajka, uékasïnga uénhekuarhini nemani jingoni. Engani kómu pʼikuarherani jarhajka, uétarhinchasïnga kurhaani eska iámu ambe sési uéraaka. Ka engani tsípini jarhajka, tsitisïnga jatsini néni engani aianguaka. Para ji, amiguechaksï kánikua jukaparhakuesti.” (Brittany)
UANDANHASÏNDI eskaksï sapiicha uétarhinchasïnga né engaksï jingoni uaaka chʼanani, ka tumbi sapirhatiicha ka iurhitskirichaksï, amiguechani uétarhinchasïnga. Peru ¿andisï no májkueni?
Nema enga tʼungini jingoni chʼanajka, pámbetasïndikini.
Amigu ma májkueni jukaparharasïndi ambe ma eska tʼu.
Biblia uandasïndi eska ambakiti amigu ma “ambakiti amigu ma méntkisï uékpisïndi, ka ermanu máesti enga andajpenuka para jiáni enga uandanhiata jauaka” (Proverbios 17:17). Ísï jimbo, i kánikua sési pájperakua máesti sánderu eska sapiicheeri engaksï májku kʼéri chʼanajka.
Jiájkani, eskari na kʼépani jauaka uétarhinchasïngari amiguechani engaksï...
1) ... ambakiti kualidadichani jatsiauaka.
2) ... ambakiti jánguechani jatsiauaka.
3) ... engaksïni jarhuataaka parari ambakiti ambe úni.
Ísï jimbo, kurhamarhikuarhi sinksï chiiti amiguecha terukuntajki ini ambe jingoni. Ju je exeani mándani arini.
Primeru: Ambakiti kualidadicha
Ambe engari jatsika para míteni. Nóksï iáminduecha engaksï uandaaka eskaksï chiiti amigueska úni jauati ambe engari erokajka eska uaaka ambakiti amigu ma. Biblia uandasïndi eskaksï jarhaska “kompanieruecha engaksï listu jarhajka paraksï no sési útsperani máteru ka máteruni jingoni” (Proverbios 18:24). Jamberiri eratsejka eska jukari ambeeska, peru eratsi ini ambe: ¿niáraskiri jatsini ménisï “amiguni” ma engari tʼu kánikua mintsinharhienga, joperu engakeni arhinchaka ka no sési jásï ambe uandani chiiti ambeeri? ¿A no eska inde ambe úpiringa eskajtsï nóteru sési pájperapiringia? a Ísï jimbo, sánderu sésisti ambakiti amigu ma jatsini ka eska uánikua amiguechani jatsiani.
Ambe engari uaaka úni. Erakua amiguechani engaksï ambakiti kualidadichani jatsiauaka.
“Iáminduechaksï sési uandasïndi juchiiti amiga Fioneri. Tsitipiringa ísïini eska ima paraka májkueni uandanhapiringa juchiiti ambeeri. Ískurini pakatasïndi.” (Yvette, enga 17 uéxurhini jatiriika.)
Ejersisiu:
1. Arhinta Galasia 5:22, 23.
2. Kurhamarhikuarhi: “¿Jatsiaskiksï juchiiti amiguecha kualidadichani ‘enga espiritu santu úrpijka’ ? ”.
3. Karaa nombrichani imeecheri engaksï meru chiiti amiguecheka ka jima ma akandu karaa na engaksï járhati kʼuiripuecheka.
Nombri
․․․․․
Na enga jásïika
․․․․․
Konseju ma: Engari puru no sési járhati kualidadichani exekuaska, jamberi sési japirindi eskari mójtakupiringa indeni amiguni.
Segundu: Ambakiti jánguecha
Ambe engari jatsika para míteni. Engari sóntku uékani jauaka amiguechani jatsiani, sánderuri no uaaka sési erakuani. Ístu, asï méni mirikurhi ambe enga Biblia uandajka: “Ima enga no ambarhatiichani jingoni jámajka no sési nikuati” (Proverbios 13:20). Ixú uandakua “no ambarhatiichani” no imani arhikuekasïndi engaksï no újka sési jorhenguarhini eskuela o engaksï no újka sóntku eratseni ambe ma, sino imeechani engaksï no kurhandirajka ka nóksï sési jámani. Ka seguru eskari tʼu no uékapiringa indeni járhati amiguechani jatsiani, ¿a no?
Ambe engari uaaka úni. Sési erakua chiiti amiguechani; asï náki uéjki ma eraku (Salmo 26:4). Inde ambe no arhikuekasïndi eskari grupuni ma jatsiaka engaksï namunitkuecha uaaka jarhani. Sánderu sési, arhikuekasïndi eskari jatsiska para orheta exeni parari úni míteni “eska no májkueniiska jurhimbiti ma ka no sési úri ma, ima enga marhuakujka Tata Diosïni ka ima enga no marhuakujka” (Malaquías 3:18).
“Kánikua tsípisïnga engajtsïni juchiiti taatiicha jarhuataka ambakiti amiguechani jirinhaani, engaksï jini jatiriijka ka engaksï sési marhuakuni jaka Tata Diosïni.” (Christopher, enga 13 uéxurhini jatiriika.)
Mókunta arini kurhamarhikuechani:
¿Chésïniri eskaksïni chiiti amiguecha afuersa úrataraaka parari no sési niátani?
□ Jo
□ Nómbe
¿Nóri uékasïni eskaksï taatiicha míteauaka jimbokari exesïnga eskaksï no jaiapanheantauaka?
□ Jo
□ Nómbe
Konseju ma: Engari mókuantaka eska jo, sánderu sési japirindi eskari imani amiguechani jirinhaapiringa engaksï ambakiti jánguechani jatsiapiringa, jamberi kristianuechani engaksï ambakiti ejempluecheka.
Terseru: Engaksïni jarhuataka parari ambakiti ambe úni
Ambe engari jatsika para míteni. Tata Diosïiri Uandakua arhisïndi “engajtsï chá no ambarhati kʼuiripuechani kúrhiaska, chájtsï nóteru uaakia ambe engajtsï iásï jamberi sési úni jaka” (1 Korintu 15:33). Ini ambe nitamakuarhispti Lauren, ima uandantasïndi: “ Ji uékasïreenga eskuelarhu anapuechani kúrhiani. Peru para úni ísï úni jatsisïreenga para imani ambe úni engajtsïni imeecha arhienga. Ka jimbokani jandiajku pʼikuarherasïreenga, uénaspka ísï jámani eska imeecha nomasi parani úni kúrhiani.” Ísï jimbo, engari jurajkukuarhiska eskaksïni máteruecha arhiaka ambe úni, ísï eska Lauren na nitamanchapka, máteruechaksïni ísï kámaati eskaksï ajedresiri na manatajka chʼanarichani. ¿Meruri indeni ambesï uékapirini tʼujtu?
Ambe engari uaaka úni. Jurajkua imeechani engaksï uékaaka eskari afuersa ísï jámaaka ka ísï irekani eska imeecha. Jamberiri no uánikua amiguechani jatsiauaka, peruri sánderu sési pʼikuarheraaka. Ísturi uaaka jirinhani máteru amiguechani engaksïni jarhuataaka parakari ambakiti ambe uaaka (Roma 12:2).
“Juchiiti sánderu ambakiti amigu ma arhinhasïndi Clint. Ima sésku úsïndi ambe ma, kurhangutspitisti ka méntkisïrini úsïndi uinhaperantani.” (Jason, enga 21 uéxurhini jatiriika.)
Mókuanta arini kurhamarhikuechani:
¿Mójtakupiriniri na engari xukuparhajka, uandajka o jámajka nomasi parari jaiapanherantani chiiti amiguechani?
□ Jo
□ Nómbe
¿Nirasïniri imani lugarichani engaksï no xáni sési jaka nomasi jimbokaksï imeecha nirasïnga?
□ Jo
□ Nómbe
Konseju ma: Engari mókuantaka eska jo kurhamarhikuechani engaksï máteru pájinarhu jaka, arhia taatiichani o máteru kʼuiripuni enga jánhastiika eskaksïni jarhuataaka erakuni amiguechani engaksïni meru jarhuataaka. Ka engari Jeobaeri testigueka, ísturi uaaka uandontskuarheni kúnguarhikuarhu anapu orhejtsïkutini ma.
SÁNDERU INFORMASIONIRI EXENTAAKA CAPÍTULO 9 DEL SEGUNDO VOLUMEN
¿Niáraskiri arhinhani eskari úpiringa úni ambe ma o tʼu mismu uékani úni ambe ma engari míteka eska no sési jarhaska?
[Nota]
a Iáminduechachi no sési ambe úsïnga (Roma 3:23). Ísï jimbo, engakeni amigu ma no sési pʼikuastaaka, joperukeni sési jimbo arhini eskari puákuntaaka, miá eska ima “enga xénchpejka méntkisï puátspentasïnga” (1 Pedru 4:8).
KARAKATA BIBLIARHU ANAPU
“Jarhasti amigu ma enga sánderu uékpijka eska ermanu ma.” (Proverbios 18:24)
AMBE ENGARI UAAKA ÚNI
Jánguarhinta ambakiti jánguechani jatsiani. Ísï máteruechaksï uékaati májkueni úni eska t’u ka tʼungini jingoni jarhani. ¡Imeechaksï kʼóru meru ambakiti amiguecheuati!
¿MÍTESPIRI INI AMBE?
Nájkiruka Tata Diosï iáminduechani májkueni exeajka, erakusïndi né enga uéjka eska imeeri amigueuaka (Salmo 15:1-5).
¡INI AMBE Ú!
¿Ambe uaa úni para jirinhantani ambakiti amiguechani? ․․․․․
Íksï jindeesti máru kʼuiripuecha engaksï jatiriikia ka enga uékapiringa sánderu sési míteani: ․․․․․
¿Ambe uékapirini kurhamarhiani juchiiti taatiini ka naandini íri ambe? ․․․․․
KA TʼU, ¿NARI ERATSESÏNI?
● ¿Amberi sánderu jukaparharasïni amiguni ma jingoni? Uandanta andi.
● ¿Amberi uaa sánderu sési úni parari sánderu ambakiti amigu máeni?
[Komentariu]
Juchiiti taatiichajtsïni arhispti eskani jurajkuapiringa máru amiguechani. Ueenakuarhu no uékaspka ísï úni jimbokani eratsesïreenga eska imeecha jingontkusïni sési pájpereenga. Peru ambakiti konseju máespti, engani kurhanguntapkia, exespka eskaksï uánikua kʼuiripuecha jarhaska engaksï ambakitiika ka engani jingoni uaaka sési pájperani.’’ (Carlos)
[Rekuadruecha]
Máteru ambe engari uaaka úni
Uandontskuarhi íri ambe taatiicha jingoni. Kurhamarhia náksï járhati kʼuiripuespi imeecheri amiguecha engaksï tʼueni jatiripka. ¿Ménisïksï no sési erakuaspi imeeri amiguechani? ¿Andi? Ístu kurhamarhia nénari jámaa parari no uandanhiateechani jatsiani.
Mítetaraa chiiti amiguechani taatiichani. Engari no uéjka, eratsenta andiresï no uéjka ísï úni. ¿Jindee jimbokari míteska eskaksï taatiicha no jaiapanheantauaka? Enga ísïika, jamberiri jatsipiringa para sánderu sési erakuani.
Jingontku kurhajcha chiiti amiguechani. Xarhatakua eskari pendienti pásïnga ambe engaksï imeecha eratsejka ka eskari uandanhiasïnga imeecha jimbo (Filipusï 2:4).
Kurhangutspi ka puátspenta. Asï eroka eskaksï chiiti amiguecha perfektueuaka. Eska na uandajka Santiagu 3:2, “iáminduecha someni no sési ambe úsïnga”.
Asï uéka eskaksï tʼungini jingoni jauaka. Jurajkua. Engaksï sési jimbo amiguecheuaka, tʼungini jingonksï jauati engari uétarhinchauaka (Eclesiastés 4:9, 10).
[Imajeni]
Engari ísï jámaska eskaksï máteruecha na uéjka eskari jámaaka nomasi parari úni kúrhiani, ísïksïni kámaati eskaksï ajedresiri na manatajka chʼanarichani
Jamberijtsï ístu uéjka ini ambe míteni
TUMBIICHA
Tumbiichaksï kurhanguarhisïndi
Kurhamarhikuecha engaksï niárajka úkuarhiani uátsïcha ka tumbiicha ari temecheri, seksueri ambe, amiguecheri ambe, táticheri ambe ka eskueleri ka máteru ambe.
