KAPITULU 35

¿Néna uaa Tata Diosïri amigueni?

Gabrieli exespti na enga xáni jukaparhakueka ambakiti pájperakua ma jatsini Tata Diosïni jingoni jiáni enga uandanhiata ma jatsipka. Ima uandantasïndi: “Papajtsïni jurajkuspti jiáni engani ji 12 uéxurhini jatiripka. Miásïnga eska ma chúrikua enga kuarturhu japka kómarhixapka Jeobani paraka kʼuanhatsentapirindi”.

Gabrieli kánikua komu pʼikuarheraxapti ka uénaspti Bibliani arhintani. Exentaspti tekstuni nani enga karari arhijka Jeobani: “Peruri tʼu exesïnga enga no sési jásï ambe úkuarhijka ka kómu nitamakua ambe jarhani. Exesïngari ka kurhanguni ambe enga úkuarhijka. Tʼungini andarhierasïndi ima enga no sési nitamakuarhini jarhajka; tʼuri jindeeska engari jarhuatajka uerandujupindini” (Salmo 10:14). Gabrieli uandantasïndi eska inde uandakuechaksï mintsitarhu niárakuspka. Engani arhintapka ísï pʼikuarheraspka eskarini Jeoba uékasïreenga jarhuatani. Miátantastireni eska ima jindeeska juchiiti taati. ¿Jaki sánderu ambakiti taati ima?

¿MÁJKUENI nitamakuarhixaki eska Gabrieli? Jamberi jo o jamberi nómbe. Peruchi uaaka seguru jarhani eska Jeoba uékasïnga juchaari amigueni. Exe je ambe enga arhijka Biblia: “Andarhiera je Diosïni, ka imajtuksïni andarhierati chánksïni” (Santiagu 4:8). No arhiparini engachi no újka exeni imani ka engachi xáni sapichitu ambeeka. Jeobajtsïni pʼímarhisïndi parachi imeeri amigueni.

Peru para ma ambakiti pájperakua ma jatsini Tata Diosïni jingoni uétarhisïndi kánikua jánguarhintani. Jatsiskachi para uinhaperantani. Por ejemplu. ¿Ménisïjtsï jatsiski planta ma? Engajtsï uéjka eska kʼéaka ka sési jásïini, ¿ambejtsï jatsiska para úni? Jima peerani enga sési jauaka ka itsï jatsikuni. Ka no ísku exeni. Májkuenisti Tata Diosïri pájperakua jingoni. ¿Amberi jatsiski parari úni para uinhaperantani pájperakua Tata Diosïni jingoni?

Uétarhisïndi jorhenguarhini Biblieri ambe

Eskari na mítekia paraka tsimani amiguecha sési pájperani jatsistiksï para uandontskuarheni ka kurhangutsperani máteru ka máteruni jingoni. Májkueni Tata Diosïni jingoni ka né uéjki kʼuiripu jingoni enga uékaaka sési pájperakua ma jatsini imani jingoni. Joperu, ¿nénachi uaa kurhajchani Jeobani? Arhintani ka jorhenguarhini imeeri karakata, Bibliani (Salmo 1:2, 3).

Jamberi estudiarini no jindeeti ambe engachi tsitijka. Jamberiri sánderu tsitijka máteru ambe úni komu telebisioni exeni, bideojueguecha o chiiti amiguecha jingoni uérani. Peru engari uéjka Tata Diosïri amigueni: jatsiskari para kurhajchani ambe engakeni arhijka imeeri karakatarhu.

Asï eratsi eskari meru no uaaka arhintani Biblia. Uaakari niárani ísï úni nájkirukari no tsitiaka arhiantani libruechani. Joperu para uénani uétarhisïndi tiempu arhutani. ¿Néna? Uaakari ísï úni eska uátsï ma enga arhinhajka Lais. “Jatsiska orariu ma —uandantasïndi—. Engani jauarajka arhintasïnga ma kapitulu Bibliarhu. María enga 15 jatiriika ima ménderueni úsïndi: “Mándani chúri Bibliani arhintasïnga ante de apondini”.

¿Nákiua chiiti programa para estudiarini? Orheta exe  rekuadruni enga pájina 292 jimbo jaka. Tátsekua, uaakari ixú karani na jatini uarhi arhintani media ora Tata Diosïri karakatani.

․․․․․

Peru orariu ma jatsini solu jindeesti para uénani. Engari ueena Bibliani jorhenguarhini, exeakari eska no méntkisï fásilisïnga arhintani. Jamberiri májkueni pʼikuarheraka eska Jezreel enga 11 jatirika, ima uandantasïndi: “Máru particha jimbo úkua jukanchasïrhenga seguirini arhintani”. Peru asï kuatantsï. Miánta engari jorhenguarhini jarhajka Biblieri ambe kurhajchandi jarhasïnga sánderu ambakiti amiguni, Jeoba. Ka exeakari eskari tátsekua tsitiakia arhintani. Engari sánderu jánguarhintaaka, sánderuri tsitiaka ka uánikuari ambe jorhenguarhiaka.

Seguiri kómarhini

Kómarhikua jindeesti ambe enga Tata Diosï úrajka para imani jingoni uandontskuarheni. Eratsenta: uaakari uandontskuarheni imani na uéjki jandora. Jeoba méntkisï listu jauati. Ka uékasïndikeni kurhajchani. Ísï jimbo Bibliakeni arhisïndi: “Asï jukari uandanhia je. Sánderu sési, kómarhi je Tata Diosïni parajtsï aianguni ambeksïnisï uandanhiatani jaki, kómatsïkuarhi je ka ístu diosmaiamukua arhi je” (Filipusʌ 4:6).

Inde ambe arhikuekasïndi eskari uaaka aiangukuarhini ambe engakeni no sési pʼikuastajka ka uandanhiatani. Peru ístu uétarhisïndi eskachi diosmaiamukua arhiaka. Jimbokachi méntkisï diosmaiamukua arhiasïnga juchaari amiguechani engajtsïni jarhuatajka. Ka no nemakini sánderu jarhuatati eska Tata Diosï Jeoba (Salmo 106:1).

Kara máru ambe, engari jimbo agradeserikujka Tata Diosï Jeobani.

․․․․․

Engari ménisï niárajka ísï pʼikuarherani enajkiri nóteru uaaia uandanhiatecha jimbo o jimbokari chésïnga, ¿amberi uaa úni? “Jeobani jurajkuku chiiti uandanhiata, ka imakeni jarhuataati. No méni jurajkuati eska kʼuiripu jurhimbiti ma no sési nitamakuarhiaka (Salmo 55:22).

Iásïri uaaka karaani máru uandanhiatechani engari uékapiringa uandaani chiiti kómarhikuecharhu.

․․․․․

Jorhenguarhi ima ambeeri engari nitamakuarhika

Jarhasti máteru ambe engachi uaaka úni parachi úni sési pájperani Tata Diosïni jingoni engari no jatsika para mirikurhini. Dabidi karaspti pirekua ma enga arhienga: “Tsʼéjku je ka exe je eska Jeoba ambakitiska” (Salmo 34:8). Jiáni enga karapka apenasi no sési jásï ambe nitamakuarhispti. Rei Saúli sáno uándikuspti. Jatsispti para jimeesïsï jirikuarhini engaksï filisteuecha irekapka imeecha engaksï ikiakuenga ka engaksï sóntku mítentapka. Ísï xarharasïreenga enajkiksï uándikupirini. Joperu no ísï úkuarhispti. ¿Nénachi míteski? Úspti ambe ma: ísï jámaspti enajki loku úkuarhipi para úni sïpakuarhini (1 Samuel 21:10-​15).

Joperu Dabidi no eratsespti eska ima jandiajkusï salbarikuarhespka. Sánderu sési k’eri ambe arhispti Jeobani, uénani jámani pirekua arhisïndi: “Kómarhispka Jeobani, ka imarini mókuchintaspti. Imarini kuájchakuspti engani xáni chéni japka” (Salmo 34:4). Ísï jimbo, ini ambe jimbo enga nitamakuarhipka úspti ísï uandani ““Tsʼéjku je ka exe je eska Jeoba ambakitiska”. *

Eratsi je ambe máeri engari exeka eskakeni Jeoba kuidarixapka ka kara ambe enga úkuarhipka. No jatsispti para k’eri ambeni; uaati ambeni engachi ménisï no jukaparharajka nájkiruka ambakiti ambeuaka.

․․․․․

Mándani arhini jucha jatsiska para jandiajku ambakiti pájperakua ma jatsini Tata Diosïni jingoni, nájkirukachi k’eri kóntperata jatsika engajtsïni juchaari taaticha jorhendapka jurhimbikua ambe. ¿Uinhaperantaxakiri chiiti pájperakua? ¿Nótki ambe? Jiájkani i kapitulukini jarhuatati para ueenani ísï úni. Jeobakini újchakuraati engari jánguarhintaka jimboka Biblia uandasïnga “Seguiri je kurhajkuarhini ka intsïnhaakajtsï, seguiri je jirinhani ka exentaakajtsï (Mateu 7:7).

UAAKAJTSÏ SÁNDERU IIRI AMBE EXENTANI KAPITULU 38 KA 39 JIMBO PRIMERU BOLUMENI

MÁTERU KAPITULURHU

¿Úkua jukanchasïndi uandontskuarheni kʼuiripuecha jingoni Tata Diosïri ambe? ¿Nénari uaa kuájchakuni ambe engari jakajkujka?

[Nota]

KARAKATA BIBLIARHU ANAPU

“Tsípisïndiksï imeecha engaksï exejka eskaksï uétarhinchasïnga Tata Diosïni” (Mateu 5:3).

AMBE ENGARI UAAKA ÚNI

Engari pauani pauani kuatru pájina arhintaka Bibliarhu ma uéxurhini jimbori kʼamaraka.

¿MÍTESPIRI INI AMBE . . .?

T’úri arhintaxaka ini libruni ka kurhajchaxakari konsejuechani jimboka Jeoba uékasïnga eskari t’u imeeri amigueuaka (Juanu 6:44).

ARHINI AMBE U

Ini ambe uaaka parani sánderuni jorhenguarhini Biblieri ambe ․․․․․

Ini ambe uaaka parani pauani pauani kʼomarhini ․․․․․

¿Ambe uékasïni kurhamarhini papani o mamani i temeri ambe? ․․․․․

KA TʼU, ¿AMBERI ERATSESÏNI?

● ¿Amberi uaa úni parari sánderu tsitini Biblieri ambe arhintani?

● ¿Andisï Jeoba kurhauajki kʼuiripuecheri kómarhikuechani nájkirukaksï imperfektueka?

● ¿Nénari uaa sánderu sési kómarhini?

[Komentariu]

Engani nanakepka kási méntkisï imani mismu ambe kómarhisïrhenga. Iásï jánguarhintasïnga pauani pauani imeeri ambe kómarhini engari sési nichejka ka imeeri ambe engareni no sési nichejka. Jimboka mándani pauani ménderuenisïnga, nóteruni ima mismu ambe kómarhisïnguia”. (Eva)

[Rekuadruecha/Imajeni]

 Exe chiiti Bibliani

1. Eraku bibliarhu anapu relatuni ma engari sánderu tsitijka. Parari sánderu sési kurhanguni, kurhaku Tata Diosï Jeobani eskakeni íntskuaka jánhaskakua.

2. Jingontku arhinta. Iatsitakuarhu arhinta. Eranhaska ambe engari arhintani jauaka. Pori ejemplu, jánguarhinta exeni ambe enga úkuarhini jaka, kurhaani ambe engaksï kʼuiripuecha uandani jaka, sïpiruni na enga jájkundeenga, tsʼémuni tʼirekua... Engari ísï úska uaakari ísï pʼikuarherani enajkiri jima jaki.

3. Kurhamarhikuechani úkuarhia. Engari kʼamarakia arhintani kurhamarhikuarhi:

● ¿Andisï Jeoba uékapi eska i ambe karanhapiringa imeeri karakatarhu?

● ¿Náki personajichaksï ambakiti ejemplueski para ji ka nákicha nómbe?

● ¿Ambe uaa jorhenguarhini engani pauani pauani arhintaaka?

● ¿Amberini jorhendasïni Jeobaeri ambe ka na enga ima újka ambe ma?

4. U sapichitu kómarhikua ma. Aiangu Jeobani ambe engari jorhenguarhika ka nénari uékasïni ísï úni. Asï mirikurhi diosmaiamukua arhini imeeri Karakata jimbo.

[Imajeni]

“Chiiti uandakua lámpara máesti para juchiiti jantsiri, ka lusi ma para juchiiti xanharu” (Salmo 119:105).

[Rekuadruecha/Imajeni]

Ambe enga uétarhijka úni orheta

¿Nóri tiempu jatsisïni parari kómarhini ka parari Biblieri ambe jorhenguarhini? Ambe enga uétarhijka úni jindeesti, sési mítetini jarhani ambe engari uéjka úni orheta.

Ju ini ambe úni: Jirinhanita kubeta ma ka jatsira uánikua kʼérati tsakapuechani. Tátsekua kutsari jatsira astaka uiniaka. Iásïri jatsiskia kubeta ma uiniri tsakapu ka kutsari jingoni.

Iásï pʼitantsi kutsari ka tsakapuechani ka májkueni u joperu iásï orheta jatsira kutsari ka tátsekua tsakapuechani. ¿Ambe úkuarhiski? Tsakapuechaksï no jatanhesti, ¿o no? Jimbokari orheta kutsari jatsiraska.

¿Amberi jorhenguarhisïni? Engari orheta uaaka imani ambe engari sánderu tsitijka —komu dibertirikuarheni— nóri tiempu jatsiaka parari imani ambe úni enga sánderu jukaparhakueka, jorhenguarhini Biblieri ambe. Ísï jimbo Biblia arhiasïndi kristianuechani: “Eskajtsï exeaka ambesï sánderu uétarhijki úni” (Filipusʌ 1:​10). Engari ísï uaaka eska na arhijka i konseju, exeakari eskari tiempu jatsiaka parari Jeobaeri ambe jorhenguarhini ka ístu parari dibertirikuarheni. Miá: ambe enga uétarhijka orheta úni, jindeesti sánderu jukaparhakua ambe.

[Imajeni]

Sési pájperani Tata Diosï jingoni ísïisti komueska planta ma jatsiskari para kuidarini para úni kʼéni.