Ambakiti kʼuiripuechaksï jarhasti iámindu religionichani jimbo. Ambakiti ambesti mítini eska Tata Diosï exesïnga ini kʼuiripuni ka eska uandanhiasïnga ichani jimbo. Peru uánikuaksï úrasïndi religionini paraksï no sési ambe úni (2 Korintu 4:3, 4; 11:13-15). Notisiechaksï uandantasïndi eskaksï máru religionicha inchamukusïnga guerrecharhu, ka jimesïsï engaksï ísku uénajka uándikpini ka jimesïsï engaksï kʼamajkuajka ma nani ísï anapuechani ka jimesïsï engaksï no sési káuajka sapiichani ka ísku ambeksï úkuani. ¡I ambe no sési pʼikuastasïndi imechani engaksï uékajka marhuakuni Tata Diosïni! Arhinta je Mateu 24:3-5, 11, 12.

Religioni jurhimbiti sési pʼikuastasïndi Tata Diosïni, peru religioni no jurhimbiti ikiatasïndi. Religioni no jurhimbiti uánikua ambe jorhentpesïndi enga no jataka Bibliarhu, máru ambe enga no jurhimbiti jorhentpijka, jindesti Tata Diosïri ka uarhiricheri ambe. Peru Jeoba uékasïndi eska kʼuiripu mítiaka jurhimbikua imeri ambe. Arhinta je Ezequiel 18:4 ka 1 Timoteo 2:3-5.

Tata Diosï no jaiapanhiantasïndi imechani engaksï uandajka eskaksï uékasïnga, peru engaksï ístu újka ambe enga Satanasiri parhakpini uéjka (Santiagu 4:4). Biblia uandasïndi eska iámindu ima religionicha engaksï no jurhimbitika, jindeskaksï “Kʼéri Babilonia”. Religioni no jurhimbitichaksï Babilonia uérasti jiáni enga na nitamapkia Dilubiu, Noeri jurhiatikuechani jimbo. No ióni jimbo, Tata Diosï kʼamajkuauati religionichani engaksï xáni enganiarpijka ka engaksï no sési úkuajka kʼuiripuechani. Arhinta je Jaŋaskuecha (Apocalipsis) 17:1, 2, 5, 16, 17 ka 18:8.

Jeoba no mirikurhiasïndi imechani engaksï religioni no jurhimbitirhu jaka ka engaksï ambakiti kʼuiripueka. Tata Diosï tánantaaxati iáminduechani parakaksï májku jorhenguarhikua jatsiaka enga jurhimbikueka. Arhinta je Miqueas 4:2, 5.

Jeoba uandanhiasïndi imechani jimbo engaksï tsitijka jurhimbikuani ka engaksï uéjka ambakiti kʼuiripueni. Jimbosï arhiajti eskaksï jurajkuaka religioni no jurhimbitini. Engaksï i kʼuiripuecha uékaaka Jeobani, kurhajchaatiksï paraksï sési pʼikuastani. Arhinta je Jaŋaskuecha 18:4.

Primeru sigluni jimbo, uánikua kʼuiripuecha engaksï ambakiti mintsita jatapka, sésiksï jiókuarhispti ambe engaksï apostulicha eianhpiaenga. Ka Jeoba jorhendaaspti imani kʼuiripuechani parakaksï úpiringa sési irekani ka paraksï úni ambakiti erokuarhikua ma jatsini. Ísï eska imecha, juchajtuchi úni jauaka ambe enga Biblia uandajka engachi méntkisï orheta peeraska Jeobani. Arhinta je 1 Tesalonika 1:8, 9 ka 2:13.

Jeoba tsípikua jingoni jiókuarhiasïndi imechani engaksï jurajkujka religioni no jurhimbitini. Íksï uáti ambakiti pájperakua ma jatsini imani jingoni ka uátiksï uánikua erachichani jatsiani engaksï ísïuaka eska imecheri familia ka sánderu orhepatini, uátiksï jatsini tsípikua para méntkisï. Arhinta je Markusʌ 10:29, 30 ka 2 Korintu 6:17, 18.

Enga Jeoba kʼamajkuaka no jurhimbiti religionichani, úndaati sési irekanhani. Religioni no jurhimbitichaksï nóteru uátia támu ísï jánhastaani kʼuiripuechani, iáminduksï sési pájperaati. Ka Jeobantkuksï kómarhiati. I ambe, ambakiti ambesti, ¿no ísïski? Arhinta je Jaŋaskuecha 18:20, 21 ka 21:3, 4.