JORHENGUARHIKUA 6
¿Ambe ambakiti erokuarhikua jarhaski para uarhiricha?
1. ¿Ambe ambakiti ambe jarhaski para uarhiricha?
Enga Jesusi Betania niárapka, Jerusaleni no iauani, imeri amigu Lasaru tʼámu jurhiatikua páxaptia enga uarhipka. Jesusi, Marta ka Maria engaksï Lasarueri pirembepka, nirasptiksï jima enga Lasaru jatsinhantapka. Sóntku uánikua kʼuiripu tánguarhispti. ¿Úsïntsï eranhaskani na engaksï xáni tsípipka Marta ka Maria enga Jesusi tsítantapka Lasaruni? Arhinta je Juanu 11:21-24, 38-44.
Marta mítisptia eska ambakiti ambe jarhaspka para uarhiricha. Mítispti eska Jeoba tsítantauaka uarhirichani paraksï ménderu irekani Echerirhu. Arhinta je Job 14:14, 15.
2. ¿Nénaksï jarhasïni uarhiricha?
Tata Diosï arhisti Adanini: “Tʼupuririskari ka tʼupurirhuri niántaaka” (GÉNESIS 3:19)
Kʼuiripuechaksï “tʼupuriri” úkatesti (Génesis 2:7; 3:19). Nochi jataska espiritu ma. Engachi uarhijka, no ma ambe tsípiti pakarasïndi juchari kuerpurhu, juchari serebrujtu uarhisïndi ka nóteruchi ambe ma eratsisïngia. Jimbosï enga Lasaru tsíntapka no ma ambe uandantapti uarhikueri ambe, jimbokaksï uarhiricha nóteru ambe ma mítisïnga ka ni pʼikuarherani. Arhinta je Eclesiastés 9:5, 6, 10.
¿Kastigariasïni Tata Diosï uarhirichani infiernurhu? Biblia uandasïndi eskaksï uarhiricha no ma ambe ma mítisïnga, jiáni infiernu, jorhenguarhikua máesti enga no jurhimbitika ka enga chikuanderakua ambe uandajka Jeobaeri ambe. Inde jorhenguarhikua kánikua ikiatasïndi Tata Diosïni. Arhinta je Jeremías 7:31.
Exe je bideuni ¿Nénaksï jarhaski uarhiricha?
3. ¿Úsïni ma uarhirichani jingoni uandontskuarhini?
Uarhirichaksï no úsïndi uandani ka ni kurhaani (Salmo 115:17). Peru jarhastiksï ánjilicha engaksï no ambarhatika, íksï uandajpaasïndi kʼuiripuechani ka uékasïndiksï jakajkutaraani eskaksï imaeska engaksï uarhikia (2 Pedru 2:4). Jeoba no sési exesïndi enga nema uékajka uarhirichani jingoni uandontskuarhini. Arhinta je Deuteronomio 18:10, 11.
4. ¿Néksï tsíntaa?
Miioni jimbo kʼuiripuecha engaksï uarhikia, tsíntaatiksï paraksï ménderu irekani Echerirhu, asta imechaksï jamberi tsíntaati engaksï no jurhimbiti jámaka, jimbokaksï no niáraska mítini Tata Diosïni. Arhinta je Salmo 37:9 ka Ukuecha 24:15.
Imecha engaksï tsíntaaka, uátiksï jorhenguarhini jurhimbikua Tata Diosïri ambe ka uátiksï xarhatani eskaksï jakajkusïnga Jesusini kurhajchaparini ambe enga ima uandajka (Revelación [Apocalipsis] 20:11-13, NM). Engaksï ísï úska, uátiksï irekani para méntkisï Echerirhu. Arhinta je Juanu 5:28, 29.
5. Tsíntskua, ¿ambejtsïni jorhendasïni Jeobaeri ambe?
Tata Diosï axasti imeri Uájpani paraka uarhipiringa juchantsïni jimbo ka ísï ústi eska japiringa i ambakiti erokuarhikua para uarhiricha. Jiájkani, tsíntskuani jimbochi úsïnga exeni eskajtsïni Jeoba pʼamojkusïnga ka eskajtsïni kánikua uékasïnga nájkirukachi no sésikua jatsika parajtsïni ísï kámani. ¿Néntsï uékapirini exeni engaksï uarhiricha tsíntaaka? Arhinta je Juanu 3:16 ka Roma 6:23.
