JORHENGUARHIKUA 74
Jesusi niárasïndi jindeeni Mesiasi
Juanu aianhpixapti arini ambe: “Nema enga sánderu uinhapitiika eska ji, juuati no ióndani”. Enga Jesusi 30 uéxurhinisï jatiripkia, ríu Jordanirhu niraspti Galilea uératini. Jima, Juanu itsï atajpexapti. Jesusi uékasïrendi eska Juanu imantu itsï atapiringa, peru Juanu arhispti: “Nókini jísï itsï atapiringa. Tʼurinisï itsï atapiringa”. Jesusi arhispti: “Jeoba uékasïndi eskarini tʼu itsï ataaka”. Jimbosïksï ríu Jordanirhu inchamepti ka Juanu iámu inchamaspti Jesusini.
Enga Jesusi uémintapkia itsïirhu, kómarhispti Jeobani. Imani ratu jimbo, auanda mítakuarhispti, ka Tata Diosïri espiritu kétsispti komueska palomasï ma. Jimajkani Jeoba auandarhu uératini arhispti: “Tʼuri jindeska juchiti Sapi engani xáni uékajka. Jíkini jaiapanhintaska”.
Ísï intsïnhaspti Jesusi Jeobaeri espiritu ka desde jiáni uénaspti Kristueni o Mesiasi. Iásï kʼóru úpirindia uénani imani ánchikuarhitani enga Jeoba arhipka eska úpiringa echerirhu.
Enga Jesusi itsï atakuarhipkia, niraspti desierturhu ka 40 jurhiatikua pakaraspti jini. Enga kʼuanhatsintapka, niraspti Juanuni exeni. Ima exespti eska Jesusi andarheraxapka ka uandaspti: “I jindesti Tata Diosïri Karichi enga kénditauaka parhakpiniri pekaduechani”. Inde ambe uandaspti para kʼuiripu mítini eska Jesusi Mesiasispka. ¿Mítiskiri ambe nitamanchaspi Jesusi enga desierturhu japka? Ju exeni.
“Kurhaakuarhispti ma uandakua auandarhu uératini enga arhienga: ‘Tʼu jindeska juchiti Uátsï engani ji xáni uékajka, ka ji tʼungini jimbosïni xáni tsípini pʼikuarherajka’” (Markusʌ 1:11).
Jamberijtsï ístu uéjka ini ambe míteni
KURHAMARHIKUECHA ENGA BIBLIA MÓKUANTAAJKA
¿Ambeeski itsï atakuarhini?
¿Káni ka néna jatsiski para kʼuiripu ma itsï atanhani? ¿Enga ma itsï atakuarhijkia nóteru pekadu jukarasïnia? ¿Jorhentpisïni Biblia eskaksï charhakuecha jatsiska para itsï atanhani?
