Saulu, Tarsu andajpenuspti ireta ma enga Roma japka. Fariseu máespti enga mítiapka judiuecheri leichani ka kurhunhiasïrendi kristianuechani. Antsikuparini petaasïrendi kʼumanchikuecharhu achatichani ka uarhiitichani, ka ónhasïrendi. Anhandetini pakaraspti exeni, na enga kʼuiripu enga xáni ikiani japka, tsakapkuerapka disipulu Estebanini asta uándikuni.

Peru Saulu no solu uékasïrendi Jerusaleni anapu kristianuechani jupikaani. Jimbosï kurhakupti kʼéri saserdotini eska axapiringa Damasku, para jimajtu no sési kaani kristianuechani. Enga Saulu niárani japkia Damasku, kʼéri ma tʼíntskua xarharaspti imeri uirhipandani ka ima kuarhatsespti. Jimajkani bosi ma kurhaaspti: “Saulu, ¿andirinisï xáni no sési kámajki?”. Saulu arhispti: “¿Néskiri?”. Ka bosi arhispti: “Jesusiska. Ní Damasku ka jimaksïni arhiati amberisï uá”. Jimajkani Saulu siegu pakaraspti ka jupijtatinksï páspti asta kʼéri iretarhu.

Jini Damasku, ambakiti kristianu ma jarhaspti, Ananiasi. Jesusi arhispti bisionirhu ma: “Ní Judasïri kʼumanchikuarhu, xanharurhu ma enga Rekta arhinhajka ka Sauluni jirinhanta”. Ananiasi arhispti: “Tata, uánikua ambe kurhaaska ima achatiri. Ima ónhaaxati chíti chúxapatichani”. Peru Jesusi arhispti: “Ní imani jingoni, jimbokani Sauluni erakuska para uánikua nasionicharhu eianhpini ambakiti ambe Tata Diosïri”.

Jimbosï Ananiasi nípti nani enga Saulu japka ka arhispti: “Saulu, ermanu, Jesusirini axasti parari úni éskantani”. Ka Saulu seguirispti eskantani. Jorhenguarhispti Jesusiri ambe ka imeri chúxapati úkuarhispti. Itsï atakuarhispti ka uénaspti aianhpini sinagogaecharhu máteru kristianuecha jingoni. ¿Eranhaskasïndi na engaksï ísku pakarapka judiuecha?  Iásïksï exesïrendia Sauluni, Jesusiri ambe jorhentpini jarhani. Judiuechaksï kurhamarhikuarhisïrendi: “¿No indesï no sési káueni Jesusiri chúxapatichani?”.

Saulu, tanimu uéxurhini eianhpispti Damasku. Judiuechaksï kurhunhisïrendi ka eratsisptiksï uándikuni. Peru erachichaksï kuenta íntskukuarhispti ka jarhuatasptiksï sïpakuarhini. Xundiini jásï ma jimboksï késkuspti ireteri bardarhu uératini, jimesï enga jarhanharhikupka.

Enga Saulu Jerusaleni nípka, uékasïrendi nirani exeani erachichani. Peruksï ima chérhisïrendi. Jimajkani, Bernabe, ambakiti disipulu ma, páspti Sauluni apostulicha jingoni ka arhiaspti eska Saulu meru mójtakurhispkia. Saulu, májku kʼéri úkuarhispti Jerusaleniri kúnguarhikua jingoni ka uénaspti tsípikua jingoni aianhpini Tata Diosïri ambakiti aianhperakuani. Tátsekuaksï uénaspti arhini Pablu.