Jose, Jakobueri uájpa sánderu sapichu máespti. Imeri ermanu sánderu kʼératicha, kuenta íntskukuarhisptiksï eska imecheri táti, Joseni sánderu uékasïrenga. ¿Nénaksï pʼikuarheraeni? Kánikuaksï enbidiarisïrendi ka ikiakuni. Ma jurhiatikua, Jose tsánharhispti máru ambe ka aianguaspti imechani. Tsánharhikua, arhikuekasïrendi eskaksï ma jurhiani Joseri ermanuecha tinguixurhikupiringa. Jimboksïsï sánderu ikiakupti.

Ma xanhari, Joseri ermanuechaksï karichichani eranguaxapti ireta Sikemi no iauani. Jimajkani, Jakobu axaspti Joseni para exeni na nikuaxapi. Engaksï ima exepka eska jurhaxapka, uénasptiksï uandani: “Jimini jurhaxati inde enga tsánharhijka. ¡Ju je uándikuni!”. Jupikasptiksï ka kʼéri ma posurhuksï kʼuaninhaspti. Peru imecheri ermanu Juda, arhiaspti: “Asï uándiku je. Mejori ju je atarantani para jántspiri máeni”. Ka ísïksï úspti. Komersiantichanksï máru atarakuantaspti Madiani anapuechani ka engaksï Ejiptu nirani japka, 20 piesa plateri jimbo.

Tátsekua, Joseri ermanuechaksï chibueri iurhiri atarhespti imeri xukuparhakuani, pákusptiksï imecheri tátini ka arhisptiksï: “¿No chíti sapiiriski i xukuparhakua?”. Jakobu eratsispti eska animali ma uándikuspka Joseni ka kánikua kómu pʼikuarheraspti. No nema úsïrendi sési pʼikuastantani.

Ejiptu, Potifari, ofisiali ma enga kʼéri ambepka, piántaspti Joseni para imeri jántspiriini. Peru Jeoba Jose jingoni jarhaspti. Potifari exespti eska Jose sési ánchikuarhisïrenga ka eska úpiringa mintsikani. No ióni jimbo, Potifari íntskusïndi juramukua iámu amberi enga jatsipka.

 Potifariri témba, exespti eska Jose sési jáxespka ka uinhapini ka pauani pauani arhisïrendi eska apondipiringa imani jingoni. ¿Ambe úsïreni Jose? No kasu úkusïrendi ka arhisïrendi: “Nómbe, inde ambe no sési jarhasti, juchiti tatarini mintsikasïndi ka tʼuri imeri témbaeska. Engani tʼungini jingoni apondipiringa, kʼéri ma pekadu úni japiringa Tata Diosïri orhepani”.

Ma jurhiani, Potifariri témba afuersa uékasïrendi eska Jose imani jingoni apondipiringa. Xukuparhakua jupikuspti, peru Jose sïpakuarhikuspti. Enga Potifari niántapkia, témba chkuanderakuspti ka arhispti eska Jose no sési ambe úkuspka. Potifari kánikua ikiaspti ka ónhatarkuarhespti. Peru Jeoba no mirikurhispti Joseni.