Israelitechaksï sáno 40 uéxurhini jámasptia desierturhu. Kʼamajkuasptiksïa uánikua iretechani. Iásïksï Moabiri pákuarhu akamparixaptia enga ríu Jordaniri esterhu ísï japka ka sánderkusï kueratendia paraksï inchani Echerirhu engaksï Aiaminhapka. Balaki, Moabi anapu rei, chéxapti eskaksï israelitecha euakuarhipiringa imeri echerini. Jimbosï kurhakupti achatini ma enga Balaami arhinhaenga, eska nipiringa Moabi para uandani eska israelitechani no sési nikuapiringa.

Peru Jeoba arhispti Balaamini: “Nori jatsiska para uandani eska israelitechani no sési nikuauaka”. Jimbosï Balaami no uékapti nirani Moabi. Rei Balaki ménderu pʼímarhispti ka aiakuspti eska íntskupiringa ambe enga uékapiringa, peru Balaami ménderu no jiókuarhispti. Jimajkani, Tata Diosï arhispti: “Jurajkuakakini parari nirani. Peru imani ambejkuri uandaaka engakini ji arhiaka”.

Balaami imeri burrani jatapaspti Moabi. Ima eratsispti uandani eska israelitechani no sési nikuapiringa, nájkiruka Jeoba arhipka eska no ísï úpiringa. Jeobaeri ánjili tanimu uelta xarharaspti xanharu jimbo. Balaami no exesïrendi ánjilini, peru imeri burra kʼóru jo. Primeru, burra máteru nanisï niraspti ka kampurhu ma inchaakuspti. Tátsekua, burra xáni andandikueraspti paredirhu ma tsakapueri enga uénapka puchandukuni Balaamini. Ka últimu, burra terujkani xanharu apondispti. Méntkisï enga burra ini ambe uénga, Balaami chkari ma jimbo atasïrendi.

Tátsekua, Jeoba úspti eska burra uandapiringa. Ka burra kurhamarhispti Balaamini: “¿Andirinisï atajki?”. Balaami arhispti: “Jimbokarini tontueni kámaxaka. Engani kámani japiringa espada ma, uándikupiringakini”. Burra arhispti: “Ióndini jataskia. ¿Ménisïkini ísï kámaspia?”.

Jimajkani Jeoba úspti eska Balaami exepiringa ánjilini. Ka ánjili arhispti: “Jeobakini arhispti eskari no nipiringa uandani eska israelitechani no sési nikuapiringa”. Balaami uandaspti: “No sési úska.  Kʼuanhatsintaaka juchini”. Peru ánjili arhispti: “Uákari nirani Moabi, peru imani ambejkuri uáka uandani engakini Jeoba arhiaka”.

¿Exesïniri eska Balaami mójtakurhipka? Nómbe, jimboka tátsekua tanimu uelta uékaspka uandani eska israelitechani no sési nikuapiringa. Peru imani tanimu uelta, Jeoba úspti eska uandapiringa eska sési nikuapiringa israelitechani enbesi de no sési. Últimu jámani, israelitechaksï kʼamajkuspti Moabini ka Balaami uarhispti. Sánderu sésipirindi eska Balaami kasu úkupiringa Jeobani desde uénakuarhu, ¿a no?