Ióni jimbo, israelitechaksï ménderu jurajkuspti Jeobani ka uénasptiksï diosï úkatechani kómarhiani. Madiani siete uéxurhini sïpakuaspti animalichani ka tsïjpakuani kosecha. Paraksï kuájchakukuarhini, israelitechaksï kuebecharhu jirikuarhesïrendi ka juátecharhu. Tátsekua, israelitechaksï kómarhispti Jeobani eska salbariuapiringa. Jimbosï Jeoba ánjilini ma axapti para arhini tumbini ma enga Gedeoni arhinhaenga: “Jeobakini erakusti parari soldadu uinhapiti máeni”. Ka Gedeoni arhispti: “¿Néna uá ji engani no kʼéri ambeka salbariuani israelitechani?”.

¿Ambe úspi Gedeoni para seguru jarhani eska Jeoba meru imani erakuspka? Echerirhu péraspti sánititu lana ka arhispti Jeobani: “Enga tsípku kuakarini erandeska i lana, peru echeri nómbe, mítiaka eskarini erakuska parani salbarini Israelini”. Pauandikua, lana kánikua kuakarixapti peru echeri nómbe. Jimajkani, Gedeoni ménderu kurhakuspti Jeobani eska pauandikua, lana kʼarhiri erandepiringa ka echeri kuakarini. Ambe enga Gedeoni kurhajkuarhipka, ménderu kumplirikuarhispti. Gedeoni iásï kʼóru seguru jarhasptia eska Jeoba imani erakuspka. Jimbosï tánantaapti imeri soldaduechani paraksï nirani uarhipeni madianitecha jingoni.

 Jeoba arhispti Gedeonini: “Jarhuatauaka israelitechani paraksï andani. Peru uánikua soldaduestiksï ka úpirindiksï eratsini eskaksï jimbosï andaka. Mejori arhia imechani engaksï chéjka eskaksï níntaaka imeecho”. Ka 22,000 soldaduechaksï níntaspti ka 10,000 soldaduechaksï pakaraspti. Tátsekua, Jeoba uandaspti: “Útasïksï uánisti. Iorhekuarhu paa ka arhia eskaksï itsïmaaka. Ka imantku erakua engaksï itsïmani jauaka ka ístuksï jingontku jarhani paraka no juuaka enemigu”. Ka 300 soldaduechajkuksï ísï úspti. Jeoba aiatspespti eskaksï ima namunitu soldaduecha, andapiringa 135,000 soldadu madianitechani.

Ima chúri, Jeoba arhispti Gedeonini: “Orestia para uarhipeni madianitecha jingoni”. Gedeoni íntsaaspti imeri soldaduechani sïuanguechani ka purhechichani engaksï antorcha ma jatapka ka arhiaspti: “Exejtsïni je ka chájtu májkueni ú je”. Gedeoni kústaspti sïuanguani, kʼepekuspti purhechini, ixuani ka axuani manataspti imeri antorchani ka uinhachaspti: “¡Jeobaeri espada ka Gedeoniri!”. Ka 300 soldaduechaksï májkueni úspti. Madianitechaksï uarhixapti chéni ka uénasptiksï iápurisï uiriani. Ka komu kánikua no sési jánhaskuarheni japka, madianitechaksï úndaspti ima mísmu uándikperani. Jeoba ménderu jarhuataaspti israelitechani paraksï andaani enemiguechani.