Josiasi ochu uéxurhini jatiri uénaspti juramuni Juda. Imani tiempuni jimbo, kʼuiripu majia ambe úrasïrendi ka idoluechani kómarhiani. Enga Josiasi 16 jatiripkia, uékaspti jorhenguarhini néna sési marhuakuni Jeobani. Tátsekua, enga 20 jatiripkia, uénaspti kʼamajkuani idoluechani ka altarichani engaksï iámu paisirhu japka. Ka enga 26 jatiripkia, iámu ambe prepararispti para Jeobaeri templuni arreglarini.

Kʼéri saserdoti Ilkiasi, templurhu exentaspti roiuni enga Tata Diosïri Lei karakata japka. Jamberi ima roiuepti enga Moisesi karapka. Safáni, reiri sekretariu, pákuspti Josiasini ini roiu ka uénaspti arhikuntani. Josiasi kurhajchaspti ka kuenta íntskukuarhispti eska ireta uánikua uéxurhini no kurhajchaspkia Jeobani. Jimajkani rei Josiasi arhispti Ilkiasini: “Jeoba kánikua ikiaxati juchantsïni jingoni. Uandontskuarhi imani jingoni parajtsïni arhini ambechi jatsiski para úni”. Ka Jeoba arini ambe arhispti profetisa Uldáni: “Juda anapuechajtsïni jurajkusti. Kastigariuauaka, peru asta jiáni enga nóteru Josiasi reiuakia, jimboka ima kaxumbitiska”.

Enga Josiasi kurhaapka ini mensajeni, templurhu niraspti ka tánantaaspti Juda anapuechani. Tátsekua, arhintaspti Jeobaeri Leini parakaksï iámindu Juda anapuecha kurhaapiringa. Josiasi ka kʼuiripuechaksï aiakuarhispti kurhajchani Tata Diosïni iámu mintsita jingoni.

Uánikua uéxurhinisptia engaksï Juda anapuecha no úntaenga Paskuani. Peru enga Josiasi arhintapka Leirhu eska Paskua jatsispka  para mándani uéxurhini úkuarhini, arhispti iretani: “Paskueri kʼuínchikuachi ma úntaaka para Jeoba”. Tátsekua, Josiasi juramuspti eskaksï prepararipiringa kéjtsïtakua ambe ka eska koru ma japiringa para templurhu pireni. Jimajkanksï úntaspti Paskuani ka tátsekua, Kʼuínchikuani Kurhindecheri No Lebadura jukari enga siete jurhiatikua duraripka. Nóksï úntaxapti xásï ma Paskua desde Samueliri jurhiatikuechani jimbo. Josiasi meru jukaparharasïrendi Tata Diosïri Leini. ¿Ka tʼuia? ¿Tʼujturi tsitisïni jorhenguarhini Jeobaeri ambe?