Ireta Siria jimbo, nanaka sapichu israelita ma jarhaspti enga iauani japka imeri familiaeri ka imeri kʼumanchikuarhu. Siria anapu ejersitu pákuarhespti ka niáraspti jántspiri máeni para Naamaniri témba, Naamani jefe máespti ejersitueri. Nanaka sapichu Jeobani kómarhisïrendi, nájkirukaksï kʼuiripuecha enga jingoni japka, nóksï kómarhiaenga Jeobani.

Naamani no sési jásï ma pʼamenchakua jukarhekuarhespti enga kánikua pʼamenga. Ima nanaka sapichu uékasïrendi jarhuatani Naamanini, jimbosï arhipti témbani: “Mítiska nemani enga uáka úni eska chíti achati sési pʼikuarherantaaka. Israeli, jarhasti Jeobaeri profeta ma enga Eliseu arhinhajka. Ima uáti tsinani chíti achatini”.

Naamaniri témba eianguspti Naamanini ambe enga nanaka sapichu arhipka. Naamani uékasïrendi tsʼéjkuni iámu ambe para tsinakuarhini, jimbosï nípti Eliseueri kʼumanchikuarhu jini Israeli. Naamani eratsispti eska Eliseu ísï erokapiringa komueska kʼuiripu ma enga kʼéri  ambeka. Peru enbesi de Eliseu uérani para Naamani jingoni uandontskuarhini, imeri jántspirini axaspti para erokani ka arhini: “Ní ka siete uelta inchame ríu Jordanirhu. Ka tsinakuarhiakari”.

Naamani no jiókuarhispti imani ambe ka uandaspti: “Eratsispka eskarini i profeta tsinapiringa uandajpaparini imeri Tata Diosïni ka kʼéri ambe úparini pararini tsinani. Peru ambe engarini arhika jindesti eskani niuaka ríurhu enga Israeli jaka. Siriachi sánderu ambakiti ríuechani jatsiaska. ¿Andisïni no uá imani ríuecharhu nirani?”. Naamani ikiaspti ka kéndikuspti Eliseueri kʼumanchikuarhu.

Naamaniri jántspirichaksï jarhuataspti sési eratsintani ka arhisptiksï: “¿A no eskari ambe uéjki úpiringa parari tsinakuarhini? Ambe engakini kurhachijka i profeta no difisilisti. ¿Andirisï no ísï újki?”. Naamani kurhajchaaspti, jimbosï nípti ríu Jordanirhu ka siete uelta inchamespti. Ka últimu uelta jimbo, tsinakuarhetini uémintaspti. Kánikua tsípixapti ka kʼuanhatsintaspti para agradeserikuni Eliseuni. Arhispti: “Iásï kʼóruni mítiskia eska Jeoba jindeska Tata Diosï enga jurhimbitiika”. Naamani tsinakuarhetini niántaspti imeri kʼumanchikuarhu. ¿Néna pʼikuarherapi nanaka sapichu israelita enga exepka Naamanini?