1. ¿Ambejtsï uá kurhamarhikuarhini engajtsï na jorhenguarhikia ambe enga i libru arhijka?

INI LIBRU jimbo, chájtsï niáraskia míteni jurhimbikua ambe enga Biblia jorhentpijka, por ejemplu, eskajtsïni Tata Diosï aiachisïnga eskachi irekaaka para méntkisï, ambechi úkuarhinchasïni engachi uarhijka ka eskachi uáka tsíntani (Eclesiastés 9:5; Juanu 5:28, 29; Jaŋaskuecha 21:3, 4). Jamberijtsï nirani jakaia Jeobaeri testiguecheri tánguarhikuecharhu ka jakajkuntsï eskaksï ima jindeska jurhimbiti relijioni (Juanu 13:35). Ístujtsï jamberi kánikua sési pájperajkia Jeobani jingoni ka exentsï eskajtsï uékasïnga marhuakuni. Ini ambe jimbo, jamberijtsï  kurhamarhikuarhijka: “Parani úni Tata Diosïni marhuakuni, ¿ambeteruni jatsiski para úni?”.

2. ¿Andisï achamasï ma enga Etiopia anapuepka uékapi itsï atakuarhini?

² I ambesï kurhamarhikuarhipti Etiopia anapu achamasï ma enga primeru sigluni irekapka. Ísï ma tiempu jimbo enga Jesusi tsíntapkia, Felipi, enga Jesusiri chúxapati máepka, Bibliaeri ambe aianguspti ini achamasïni ka exeraspti eska Jesusi jindespka Tata Diosïri Erakukata. Etiopia anapu achamasï kánikua ísku pakaraspti enga jorhenguarhipka indeni ambe ka jirejiresï uandaspti: “Era, ixú jarhasti itsï, ¿andisïni ji no uá bautisarikuarhini?” (Ukuecha 8:26-36).

3. a) ¿Ambe juramukuaspti Jesusi imeri chúxapatichani? b) ¿Néna jatsiski para itsï atakuarhini kʼuiripu ma?

³ Biblia sési xarhatasïndi eskajtsï jatsiska para itsï atakuarhini engajtsï uéjka Jeobani marhuakuni. Jesusi juramukuaspti imeri chúxapatichani: “Ní je jorhendaani iámindu kʼuiripuechani ka bautisaria je” o itsï ataani (Mateu 28:19). Jesusi mismu íntsaaspti ejemplu enga itsï atakuarhipka. Ka para itsï atakuarhini, nóksï sánititu itsï atajtsïkuspti, sinoksï iámu imeri kuerpuni inchamaspti itsïarhu (Mateu 3:16). Ini jurhiatikuecha jimbo, enga Jesusiri chúxapati ma itsï atakuarhijka, ístuksï jatsisti para méntku iámu inchamani itsïarhu.

4. ¿Ambe xarhatasïni enga nema itsï atakuarhijka?

⁴ Enga nema itsï atakuarhijka, xarhatakuasïndi máteruechani eska uékasïnga Tata Diosïri amigueni ka imani marhuakuni (Salmo 40:7, 8). Ísï jimbo, jamberijtsï cha kurhamarhikuarhijka: “¿Ambe uétarhinchasïni úni parani itsï atakuarhini?”.

5. a) ¿Ambejtsï jatsiski para úni ante dejtsï itsï atakuarhini? b) ¿Andiksïsï xáni jukaparhakue tánguarhikuecha?

⁵ Ante dejtsï itsï atakuarhini, chájtsï jatsiska para míteni Jeobani ka Jesusini. Uénaskajtsïa ísï úni engajtsï jorhenguarhini jaka Bibliaeri ambe (arhinta je Juanu 17:3). Perujtsï uétarhinchasïnga úni máteru ambe. Biblia uandasïndi eska cha jatsiska  para “sésimindu jánhaskani ambe enga Diosï uékajka” (Kolosasi 1:9). Jeobaeri testiguecheri tánguarhikuechaksïni jarhuataati parajtsï sánderu sési pájperani Jeobani jingoni. Ini ambe jimbosï xáni jukaparhakueti parajtsï jánguarhintani méntkisï nirani (Ebreu 10:24, 25).

6. ¿Nájtsï xáni jatsiski para míteni Bibliaeri ambe parajtsï úni itsï atakuarhini?

⁶ Ísïsti, Jeoba no erokuarhisïndi eskajtsï cha iámindu ambe míteaka Bibliaeri ambe parajtsï úni itsï atakuarhini. Ístu no erokuarhispti eska Etiopia anapu achamasï iámindu ambe mítepiringa ante de itsï atakuarhini (Ukuecha 8:30, 31). Ísïsti, nóchi méni niáraaka iámindu ambe jorhenguarhini Jeobaeri ambe (Eclesiastés 3:11). Joperu parajtsï úni itsï atakuarhini, chájtsï jatsiska para míteni ka jiókuarhini imani ambe enga Biblia jorhentpijka engachi jatsika para orheta míteni (Ebreu 5:12).

7. ¿Nénaksïni xáni marhuachiskia Bibliaeri ambe jorhenguarhini?

⁷ Biblia uandasïndi eska “enga nema no mintsikaska Diosïni, nómindu uá[ka] jaiapanherantani” (Ebreu 11:6). Ísï jimbo, chájtsï jatsiska para mintsikani Tata Diosïni parajtsï úni itsï atakuarhini. Ístu, Biblia uandasïndi eska engaksï na kurhajchaapkia ambe engaksï Jesusiri chúxapaticha jorhentpini japka, máru kʼuiripuecha engaksï ióntki anapu Korintu anapuepka, uénasptiksï jakajkuni ka itsï atakuarhini (Ukuecha 18:8). Májkueni, Bibliaeri ambe jorhenguarhini, jarhuatastiksïni parajtsï mintsikani imani ambe engajtsïni Tata Diosï aiachijka ka eska tata Jesukristueri uarhikua jimbo uákachi ma jurhiani nóteru kʼamanharhintstinia ni uarhini (Josué 23:14; Ukuecha 4:12; 2 Timoteo 3:16, 17).

8. ¿Ambeksïni jarhuataaka aianguani máteruechani ambe engajtsï jorhenguarhini jaka?

⁸ Sánderujtsï mintsikaaka Tata Diosïni engajtsï seguirini jauaka jorhenguarhini Bibliaeri ambe ka engajtsï exeaka na  engaksïni xáni marhuachijka. Niáraakajtsï tsitini aianguani máteruechani ambe engajtsï jorhenguarhini jaka (Jeremías 20:9; 2 Korintu 4:13). Peru ¿néntsï úpirini aianguni?

9, 10. a) ¿Néchantsï uá uénani aianguani ambe engajtsï jorhenguarhikia? b) ¿Ambejtsï jatsiski para úni cha engajtsï uéjka kúnguarhikua jingoni aianhpini?

⁹ Jamberijtsï uéjka aianguani ambe engajtsï jorhenguarhini jaka chári familiarhu anapuechani, amiguechani, besinuechani o chári ánchikuarhitarhu o eskuelarhu anapu kompanieruechani. Inde ambe kánikua sési jarhasti. Miá je méntkisï uékperakua ka janhanharhikua jingoni úni. Tiempu jingoni, uákajtsïa uénani kúnguarhikua jingoni aianhpini. Engajtsï exeaka eskajtsï listu jarhaskia para uérani aianhpini, uákajtsï imani Testiguni aianguni engaksïni Bibliaeri ambe jorhendani jaka eskajtsï uékapiringa kúnguarhikua jingoni aianhpini. Enga ima exeaka eska cha listu jarhaskia ka eskajtsï ísï irekaxakaia eska Biblia na uandajka, chájtsï tsimarhani tánguarhiaka tsimani kúnguarhikuarhu anapu orhejtsïkuticha jingoni.

¹⁰ Ini tánguarhikuarhu, orhejtsïkutichaksï chánksïni jingoni uandontskuarheati paraksï exeni sintsï kurhangusïni ka jakajkuni imani ambe enga Biblia jorhentpijka ka engachi jatsika para orheta míteni, ka sintsï ísï irekaxaki eska Biblia na uandajka. Ístuksï exeati sintsï cha uékasïni Jeobaeri testigu úkuarhini. Miá je eskaksï orhejtsïkuticha iámindu kúnguarhikuarhu anapuechani kuájchakuani jarhasïnga, ka ístu chánksïni. Ísï jimbo, asï ché je imecha jingoni uandontskuarheni (Ebreu 13:17; 1 Pedru 5:2, 3). Ísï tátsekua i tánguarhikua jimbo, orhejtsïkutichaksïni aianguati sintsï uáia uénani kúnguarhikua jingoni aianhpini.

11. ¿Andisï xáni jukaparhakue mójtakurhini ante de kúnguarhikua jingoni uérani aianhpini?

¹¹ Jamberiksïni orhejtsïkuticha arhiati eskajtsï jatsiska para mójtakuni máru ambe ante dejtsï uérani kúnguarhikua jingoni aianhpini. ¿Andisï xáni jukaparhakue i ambe? Jimboka  engachi aianhpini jarhajka, Tata Diosïri nombri jimbochi jámani jarhasïnga. Jimbochisï jatsika para imani ambe úni jarhania enga uáka eska Jeoba kʼéri ambe arhinhaaka (1 Korintu 6:9, 10; Galasia 5:19-21).

12. ¿Andichisï jatsi para iáminduecha moántani?

¹² Jarhasti máteru ambe engajtsï cha jatsika para úni ante dejtsï itsï atakuarhini. Apostuli Pedru uandaspti: “Moánta je, ka kʼuanhatsentani, parakajtsï borrariminhaaka chári pekaduechani” (Ukuecha 3:19). ¿Nénachi xarhatasïni eskachi moántasïnga? Engachi kánikua no sési pʼikuarherajka iámindu no sési jásï ambe jimbo engachi úka. Por ejemplu, engajtsï cha antesi ísku jándikua ambe niátaka, jatsiskajtsï para moántani. Asta engajtsï jánguarhintajka méntkisï ambakiti ambe úni, útasïjtsï jatsiska para moántani, jimbokachi iáminduecha kʼamanharhintskua ambe úsïnga ka uétarhinchasïngachi eskajtsïni Tata Diosï puáchintaaka (Roma 3:23; 5:12).

13. ¿Ambe arhikuekasïni “kʼuanhatsentani”?

¹³ ¿Joperu solu uétarhisïni pʼamondakuarhini imani ambe jimbo engachi úka? Nómbe. Apostuli Pedru ístu uandaspti: ‘Kʼuanhatsenta je’. I ambe arhikuekasïndi eskajtsï cha nóteru jatsiskia para jiókuarhini imani no sési jásï ambe engajtsï antesi uénga ka uénantsïa ambakiti ambe úni. Ju je ejemplu ma peerani: eranhaska je eskajtsï biajarixaka parajtsï lugari ma jimbo niárani engajtsï no miiuka. Ísï tátsekuajtsï kuenta íntskukuarhisïnga eskajtsï támisï niraxaka. ¿Ambejtsï úpirini? Seguru eskajtsï sánhani arhipiringa pʼíngukuarhini, anhaxurhipiringajtsï, kʼuanhatsentani ka uénapiringajtsï jurhimbiti xanharu jimbo nirani. Májkueni, engajtsï na jorhenguarhikia Bibliaeri ambe, jamberijtsï cha kuenta íntskukuarhikia eskajtsï útasï jatsiska para mójtakuni máru ambe chári irekuarhu. Ísï jimbo, jánguarhinta je kʼuanhatsentani o sea, mójtaku je ambe enga xáni uétarhiaka ka uéna je ambakiti ambe úni.

14. ¿Ambe uétarhisïni úni para Tata Diosïni aiakukuarheni?

¹⁴ Máteru jukaparhakua ambe engajtsï cha jatsi para úni ante dejtsï itsï atakuarhini jindesti Tata Diosïni aiakukuarheni. Enga nema uéjka aiakukuarheni, kómarhikua ma úkusïndi Jeobani enga jimbo aiakujka eska imantku kómarhiaka ka eska ambe enga ima sánderu jukaparharaaka imeri irekuarhu, jindeuaka Jeobani marhuakuni (Lukasʌ 4:8).

15, 16. ¿Ambe jarhuatasïni kʼuiripuni ma para Tata Diosïni aiakukuarheni?

¹⁵ Aiakuni Jeobani eskajtsï solu imani marhuakuaka ísïsti komu aiakuni imani kʼuiripuni engajtsï xáni xénchajka eskajtsï méntkisï imani jingoni jauaka. Eratsi je uátsïni ma ka tumbini ma engaksï nobiueka. Enga tumbi sánhani arhijka sánderu sési míteni imeri nobiani, niárasïndi xénchani ka uékani imani jingoni tembuchani. Nájkiruka i ambe no chʼanakua ambeka, tumbi tsípikua jingoni jiókuarhisïndi ini ánchikuarhitani jimboka xénchasïnga imeri nobiani.

¹⁶ Engajtsï cha sánhani arhiaka sánderu sési míteni Jeobani, niáraakajtsï xáni xénchani engajtsï uékaaka úni ambe engajtsï xáni uáka parajtsï marhuakuni. I ambeksïni jarhuataati parajtsï Tata Diosïni aiakukuarheni. Jesusi arhiaspti imeri chúxapatichani: “Enga nemarini uékajka chúxapani, ísku exekuarhie” (Markusʌ 8:34). I ambe arhikuekasïndi eska uétarhisïnga kurhajchani Jeobani ambe uéjki úkuarhini. Jo, chájtsï jatsiska para sánderu jukaparharani ambe enga Jeoba uékajka ka eska ima ambe enga cha tsitijka ka uékani úni (arhinta je 1 Pedru 4:2).

17. ¿Andiksïsï máru kʼuiripuecha no aiakukuarhejki Jeobani?

¹⁷ Máru kʼuiripuechaksï no aiakukuarhesïndi Jeobani jimbokaksï chésïnga tátsekua no úni marhuakuni ísï eskaksï na aiakupka. Jamberiksï no uéjti no sési pʼikuastani. O jamberiksï  eratsejti eska engaksï no aiakukuarheaka Jeobani, eska ima no kuenta kurhakuantauaka imani ambe jimbo engaksï uáka.

18. ¿Ambeksïni jarhuataa parajtsï nóteru chénia eratseparini eskajtsï niáraaka no sési pʼikuastani Jeobani?

¹⁸ Uékperakua Jeobani jimbo, jarhuataatiksïni parajtsï nóteru chénia eratseparini eskajtsï niáraaka no sési pʼikuastani. I uékperakua, ístuksïni jarhuataati parajtsï jánguarhintani xáni eskajtsï na xáni uáka para úni ambe engajtsï aiakuka (Eclesiastés 5:4; Kolosasi 1:10). Ka ístujtsï no xáni úkua jukanchaaka úni ambe enga ima uéjka. Apostuli Juanu uandaspti: “Jimboka para Diosïni uékani, jindeska eskachi uáka eska imajtsïni na juramuchijka, ka no kʼuetsapiti ambesti engajtsïni ima juramuchijka” (1 Juanu 5:3).

19. ¿Andijtsïsï no jatsi para chéni Jeobani aiakukuarheni?

¹⁹ Parachi Jeobani aiakukuarheni nóchi jatsiska para kʼuiripu máeni enga méntku no ma kʼamanharhintskua ambe jatsiaka. Imajtsïni no méni imani ambe kurhachisïndi engachi no uáka úni (Salmo 103:14). Ka ístu, Jeobajtsïni jarhuataati ambakiti ambe úni (Isaías 41:10). Ísï jimbo, mintsika je Jeobani iámu chári mintsita jingoni ka ima uáti eskajtsï imani ambe uáka enga jurhimbitku ambeka (Proverbios 3:5, 6).

20. ¿Ambejtsï jatsiski para úni engajtsï na aiakukuarheakia Jeobani?

²⁰ ¿Cha exesïni eskajtsï listu jarhaskia para Jeobani aiakukuarheni? Jimajkani, engajtsï aiakukuarheakia, uákajtsïa máteru ambe úni: itsï atakuarhini.

21, 22. ¿Nénajtsï uá cha “kʼuiripuechani japarini” xarhatani eskajtsï jakajkusïnga Tata Diosïni?

²¹ Arhi je chári kúnguarhikuarhu anapu orhejtsïkutini enga orhejtsïkutichani orhekupaajka eskajtsï cha aiakukuarheskia Jeobani ka eskajtsï uékasïnga itsï atakuarhini. Ima uáti eskaksï máru orhejtsïkuticha chánksïni jingoni exeauaka imani ambe  enga Biblia jorhentpijka engachi jatsika para orheta míteni. Engaksï orhejtsïkuticha exeaka eskajtsï cha listu jarhaskia, aianguatiksïni eskajtsï uákia itsï atakuarhini Jeobaeri testiguecheri kʼéri tánguarhikua ma jimbo enga no ióni jimbo úkuarhiaka. Kʼéri tánguarhikuarhu, arhijtsïkperata ma jauati enga uandanhaaka ambe arhikuekasïni itsï atakuarhini. Erachi enga arhijtsïkperatani nitamataraaka tsimani kurhamarhikua sapirhatichani úkuauati iámindu  imechani engaksï itsï atakuarhiaka. Engajtsï mókuantauaka ini kurhamarhikuechani, chájtsï “uandantaaka kʼuiripuechani japarini” eskajtsï jakajkusïnga Tata Diosïni (Mateu 10:32).

²² Ísï tátsekua, chájtsï niáraka itsï atakuarhini. Iámujtsï inchamanhaaka itsïarhu. Engajtsï itsï atakuarhiakia,  xarhatakuaguakajtsï iámindu imechani engaksï jima jauaka eskajtsï cha Tata Diosïni aiakukuarheskia ka eskajtsï jima para orhepani Jeobaeri testigueskia.

23. ¿Ambe arhikuekasïni itsï atakuarhini “Tátiri ka Uájperi ka espiritu santueri nombri jimbo”?

²³ Jesusi uandaspti eskaksï imeri chúxapaticha itsï atakuarhipiringa “Tátiri ka Uájperi ka espiritu santueri nombri jimbo” (arhinta je Mateu 28:19). ¿Ambeksï arhikuekasïni i uandakuecha? Eskachi jiókuarhisïnga Jeobaeri juramukuani, Jesusiri ánchikuarhitani paraka úkuarhiaka ambe enga Tata Diosï eratsetini jaka úni ka na enga úrajka Jeoba imeri espiritu santuni paraka úkuarhiaka ambe enga ima uéjka (Salmo 83:18; Mateu 28:18; Galasia 5:22, 23; 2 Pedru 1:21).

24. ¿Ambe arhikuekasïni itsï atakuarhini?

²⁴ Itsï atakuarhini, kánikua jukaparhakua ambe arhikuekasïndi. Enga cha iámu inchamanhajka itsïarhu, ísïsïndi enajkijtsï cha “uarhijki”, jimbokajtsï nóteru ísï irekasïnguia eska antesi. Ka engajtsï na uémintajkia itsïarhu, uénasïngajtsïa ménderueni irekani parajtsï imani ambe úni enga Jeoba uéjka. Ísïjtsï cha xarhatasïnga eskajtsï jiáni uératini Tata Diosïni marhuakusïnguia. Miá je eskajtsï no kʼuiripunisï ma aiakukuarheka, kúnguarhikuani ma o ánchikuarhitani ma. Chájtsï Jeobanisï aiakuka chári tsípikuani.

25. ¿Ambechi exea últimu kapitulu jimbo?

²⁵ Engajtsï cha aiakukuarheakia Jeobani, jarhuataatiksïni parajtsï sánderu sési pájperani imani jingoni (Salmo 25:14). Joperu i ambe no arhikuekasïndi eska kʼuiripu ma uáka tsípiti pakarani solu jimboka itsï atakuarhisïnga. Jesusi uandaspti: “Ima enga tekantaaka asta kʼamarhutani jamberi, ima jindeuati enga pʼímutantskateaka” (Mateu 24:13). Ísï jimbo, itsï atakuarhini solu ambe máesti engajtsï uénajka úni. ¿Nénajtsï uá cha seguirini jarhani Jeobaeri amigueni? Últimu kapitulu jimbo i librueri, exekuarhiati i kurhamarhikua.