KAPITULU 3
Ambe enga uékajka Tata Diosï para kʼuiripuecha
1. ¿Néna uékasïni Tata Diosï eskaksï irekaaka kʼuiripuecha?
ENGA Tata Diosï kueraapka orheta temungurhirini, uékasïrendi eskaksï kánikua sési irekapiringa. Uékasïrendi eskaksï Adani ka Eba sési jásï jardini ma jimbo irekapiringa, kánguarhiapiringa sapiichani, eskaksï iámu Echerini paraisu ma úpiringa ka eskaksï kuidariuapiringa animalichani. Ka Tata Diosï útasï uékasïndi inde ambe úni. Uékasïndi eska kʼuiripu ísï irekaaka (Génesis 1:28; 2:8, 9, 15). (Exe je nota 6).
2. a) ¿Nénachi míteski eska Tata Diosï uáka ambe enga aiatspeka? b) ¿Na járhati kʼuiripuechaksï irekaa Echerirhu ka na xáni ióni?
2 ¿Exesïntsï cha eskachi ma jurhiani paraisurhu ma irekaaka? Jeobajtsïni arhisïndi: “Eratseskia ambe engani uáka ka ísï uáka” (Isaías 46:9-11; 55:11). Tata Diosï uáti ambe enga xáni aiatspeka ka no ma ambe jarhasti enga uáka ójkutani. Jeoba kueraasti Echerini para ambe ma. “No ísku kueraa[sti]” (Isaías 45:18). Tata Diosï uékasïndi eska kʼuiripu interu parhakpinirhu irekaaka. ¿Peru na járhati kʼuiripuechani uékasïni Tata Diosï eskaksï irekaaka Echerirhu ka na xáni ióni? Biblia arhisïndi eskaksï ima kʼuiripuecha engaksï ambakitika ka kurhandirani, niáraaka intsïnhani Echerini ka eskaksï jima irekaaka para méntkisï (Salmo 37:29; Jaŋaskuecha 21:3, 4).
3. Exeparini eska kʼuiripu pʼamenchasïnga ka uarhini, ¿ambechi úpirini kurhamarhikuarhini?
3 Ini tiempu jimbo, kʼuiripuechaksï pʼamenchasïndi ka uarhini. Uánikua lugaricharhuksï uarhiperasïndi ka uándikperanhani. Joperu Tata Diosï no inde ambesï uékendi. Jiájkani, ¿ambe úkuarhiski? ¿Andisï no úkuarhini jaki ambe enga Tata Diosï uékajka? Solu Biblia uáti mókuntani.
TATA DIOSÏRI ENEMIGU MA
4, 5. a) ¿Né akuitsini ma úraspi para Ebani jingoni uandontskuarheni? b) ¿Néna úsïni ambakiti kʼuiripu ma sïpari úkuarhini?
4 Biblia uandasïndi eska ima enga arhinhajka “Noambakiti ka Satanasi”, ikiakusïnga Tata Diosïni. Jardini de Edenirhu, Noambakiti, akuitsini ma úraspti para Ebani jingoni uandontskuarheni (Jaŋaskuecha 12:9; Génesis 3:1). Satanasi ísï eratsetaraspti Ebani eska akuitsisï uandani japka. (Exe je nota 7).
5 Jiájkani, ¿Tata Diosï kueraaki Satanasini? Nómbe. Enga Tata Diosï kueraapka Echerini para Adani ka Eba, uánikua ánjelichaksï jarhaspti auandarhu. Tiempu jingoni, ánjeli ma mójtakurhispti ka Noambakiti úkuarhini (Job 38:4, 7). ¿Néna úkuarhiski inde ambe? Buenu, ¿néna úsïni ambakiti kʼuiripu ma mójtakurhini ka sïpari úkuarhini? No nema sïpari andajpenusïndi. Peru enga nema tsitini jauaka ambe ma enga no imeriuaka ka enga méntku imani ambe eratseni jauaka, sánhani arhisïndi sánderu tsitini. Ka jiáni enga modu jatsiaka, niárasïndi sïpani. Ísï niárasïndi ambakiti kʼuiripu ma sïpari úkuarhini (arhinta je Santiagu 1:13-15). (Exe je nota 8).
6. ¿Néna ánjeli ma Tata Diosïri enemigu úkuarhiski?
6 I ambesï úkuarhinchapti ima ánjeli. Enga Jeoba, Adani ka Ebani kueraapka, arhiaspti eskaksï kánguarhiapiringa sapiichani ka eskaksï uinirapiringa Echerini (Génesis 1:27, 28). Jamberi inde ánjeli arini ambe eratsepti: “Iámindu inde kʼuiripuechajtsïni úpirindi jíndeni kómarhini ka no Jeobani”. Ka jimboka seguirixapka inde ambe eratseni, niáraspti sánhani arhini sánderu tsitini ambe ma enga solu Jeoba jukanchaka: kómarhinhani. Ísï jimbo, chkuanderakuspti Ebani ka támisï jánhastani (arhinta je Génesis 3:1-5). Inde ambe úparini, niáraspti Satanasi ka Noambakiti úkuarhini, Tata Diosïri enemigu ma.
7. a) ¿Andiksïsï uarhi Adani ka Eba? b) ¿Andichisï tʼarhepijki ka uarhini?
7 Tata Diosï arhispti Adani ka Ebani eskaksï no apiringa anhatapueri frutani ma enga jardinirhu japka. Arhiaspti eskaksï uarhipiringa engaksï akupiringa. Peruksï ima no kurhandiraspti ka arhasptiksï (Génesis 2:17; 3:6). Adani ka Ebaksï no sési ambe úspti ka tiempu jingoni, uarhisptiksï ísï eska Jeoba na arhiapka (Génesis 3:17-19). Engaksï Adani ka Eba kánguarhiapka sapiichani, kʼamanharhintskua jingonksï andajpenuspti ka jimboksïsï ístu niárapti uarhini (arhinta je Roma 5:12). ¿Nénaksï niáraski Adani ka Ebaeri uájpecha kʼamanharhintskua jingoni andajpenuni? Exe je arini ejempluni: eranhaska je eskajtsï kurhinda úxaka ka kurhinda úrakua taiarhekata jarhani. Kurhinda ísï uéraati eska na jáxeka kurhinda úrakua. Enga Adani no kurhajchapka Tata Diosïni, kʼamanharhintsti úkuarhispti. Ka jimbokachi iámindu Adaniri uájpecheska, iáminduchi ísï andajpenusïnga eska Adani, o sea iáminduchi kʼamanharhintstiska. Jimbochisï iáminduecha tʼarhepijka ka uarhini (Roma 3:23). (Exe je nota 9).
8, 9. a) ¿Ambe uékasïreni Satanasi eskaksï jakajkupiringa Adani ka Eba? b) ¿Andisï Jeoba no jirejiresï uándikuapi no kurhandirechani?
8 Enga Satanasi úpka eska Adani ka Eba no kurhajchapiringa Tata Diosïni, uénaspti tájpanharhikuni Jeobani. Satanasi uékasïrendi eska Adani ka Eba ísï jakajkupiringa eska Tata Diosï chkuandera máespka, eska no úsïrenga sési juramuni jimboka no uékasïrenga eskaksï sési irekapiringa. Satanasi ísï xarhataspti eskaksï kʼuiripuecha no uétarhinchasïnga eska Tata Diosï arhiauaka ambe engaksï uáka. Ístu arhikuekaxapti eskaksï Adani ka Eba úpiringa jandiajku exeni ambe enga sésika ka ambe nómbe. ¿Ambe úpirini Jeoba? Úpirindi kʼamajkuani no kurhandirechani ka jirejiresï úni ambe ma engaksï ísï no kurhajchani japka. Peru ísï úparini no xarhatani japirindi eska Satanasi chkuandera máeska.
9 Jeoba no jirejiresï uándikuaspti imechani engaksï nóteru uékapkia kurhajchani, sino jurajkuspti eskaksï kʼuiripuecha jandiajku juramukuarhipiringa ma tiempu. ¿Andi? Jimboka ísï úpiringa xarharani eska Satanasi chkuandera máeska ka eska Jeobasï míteka ambe enga sánderu sésika para jucha. Jorhenguarhiakachi sánderu iri ambe kapitulu 11 jimbo. Ka cha, ¿ambe eratsesïni ima amberi engaksï Adani ka Eba úka? ¿Sésiksï úski engaksï ísï jakajkukuka Satanasini ka engaksï no kurhajchaka Tata Diosïni? Iámindu ambe engaksï jatsipka, Jeoba íntsaaspti: ambakiti tsípikua ma, sési jásï lugari ma paraksï irekani ka ánchikuarhita ma enga sési pʼikuastauenga. Peru Satanasi no ma ambe íntskuspti Adani ka Ebani. Engajtsï cha jima japiringa, ¿ambejtsï erakupirini úni?
10. ¿Ambe jukaparhakua ambechi jatsiski para erakuni úni?
10 Májkueni eska Adani ka Eba, iásïchi juchajtu jatsiska para erakuni ambe ma ka ima ambe jingoni engachi erakuaka úni, uákachi tsípikua jatsini o nómbe. Jatsiskachi para erakuni sinchi uékasïni eska Jeoba juchari juramutiuaka o Satanasi. Engachi erakuska Jeobani kurhajchani, jarhuataakachi xarhatani eska Satanasi chkuandera máeska (Salmo 73:28; arhinta je Proverbios 27:11). Nóksï uánisti kʼuiripuecha engaksï kurhajchajka Tata Diosïni ixú parhakpinirhu. Ka máteru ambe, no Tata Diosï juramuxati parhakpinirhu, jiájkani, ¿né juramuxaki?
¿NÉ JURAMUXAKI PARHAKPINIRHU?
Engaksï parhakpinirhu anapu juramukuecha no Satanasiripiringa, ¿úpirini aiakuani Jesusini?
11, 12. a) ¿Ambechi jorhenguarhisïni enga Satanasi ísï aiakuapka juramukuechani Jesusini? b) ¿Náki karakatechaksï xarhatasïni eska Satanasi juramuxaka parhakpinirhu?
11 Jesusi mítespti nésï juramuni jaki parhakpinirhu. Ma jurhiatikua, Noambakiti exeraspti Jesusini “iámindu parhakpini anapu nasionichani, ka exerani imecheri tʼíntskuani”. Ka aiakuspti: “Jíkini tʼunguini íntskuaka iámindu ini ambe engarini tinguixurhichiska ka kʼéri ambe arhindini” (Mateu 4:8, 9; Lukasʌ 4:5, 6). ¿Ambechi jorhenguarhisïni i ambe jingoni? Engaksï i juramukuecha no Satanasiripiringa, no úpirindi Jesusini aiakuani. I ambe xarhatasïndi eskaksï iámindu juramukuecha Satanasiriska.
12 Jamberijtsï cha eratsejka: “¿Néna jimbo Satanasi juramuxaki parhakpinirhu? ¿Andi no Jeoba jindeski ima enga kueraaka iámindu ambe?” (Jaŋaskuecha 4:11). Jo, ísïsti. Peru Jesusi xarhataspti eska Noambakitisï jindeka “i parhakpini anapu juramuti” (Juanu 12:31; 14:30; 16:11). Apostuli Pablu uandaspti eska Noambakiti jindeska “diosï i parhakpiniri” (2 Korintu 4:3, 4). Ka apostuli Juanu karaspti “eskaksï iámindu parhakpini anapuecha Noambakitiri juramukua jimbo jarhaska” (1 Juanu 5:19).
SATANASIRI PARHAKPINI KʼAMAJKUNHAATI
13. ¿Andichisï uétarhinchani jaki jimbanhi parhakpini ma?
13 Sánhani arhixati sánderu no sési jánhaskuarhini parhakpinirhu. Iápurisï uarhiperakua ambe jarhasti, no sési ambe únhasïndi, ísku aparinksï ka atajperanhani. Kʼuiripuechaksï no úsïndi kénditaani i járhati uandanhiatechani, na uéjki engaksï xáni jánguarhintani jauaka. Peru nóteru ióndani, Tata Diosï kʼamajkuati ini xáni no ambakiti parhakpinini Armajedoniri uarhiperakuarhu, ka uáti eska parhakpini sési jándintaaka ka eska jurhimbikua jingoni jánhaaka (Jaŋaskuecha 16:14-16). (Exe je nota 10).
14. a) Tata Diosï, ¿néni erakuski paraka Reiuaka imeri Juramukuarhu? b) ¿Biblia ambe uandaspia Jesusiri ambe?
14 Jeoba, auandarhu anapu gobiernu ma úraati para úni eska parhakpinirhu jurhimbitku jánhaaka. I gobiernu arhinhasïndi Tata Diosïri Juramukua. Tata Diosï, Jesusini erakusti paraka Reiuaka imani Juramukua jimbo. Ióntki, Biblia uandasptia eska Jesusi ísï juramupiringa komu “Juramuti Pínandikueri” ka eska imeri juramukua no méni kʼamakurhipiringa (Isaías 9:6, 7). Jesusi jorhendaaspti imeri chúxapatichani eskaksï kurhajkuarhipiringa kómarhikua jimbo imani juramukuani enga uandapka: “Jaue ixú parhakpinirhu chíti juramukua. Úkuarhie eska tʼu na uékajka ixú parhakpinirhu, májku jásï eska na úkuarhijka auandarhu” (Mateu 6:10). Kapitulu 8 jimbo, jorhenguarhiakachi eska Tata Diosïri Juramukua kʼamajkuauaka parhakpinirhu anapu gobiernuechani (arhinta je Daniel 2:44). Tátsekua, Tata Diosïri Reinu paraisu ma úntaati Echerini. (Exe je nota 11).
NO IÓNDANCHI JIMBANHI PARHAKPINIRHU IREKAAKIA
15. ¿Néksï irekaa ‘jimbanhi parhakpini’ jimbo?
15 Biblia, aiatspesïndi eska jarhaska ‘jimbanhi auanda ka jimbanhi parhakpini’ ma nani enga “jurhimbitku jánhaaka” (2 Pedru 3:13; Isaías 65:17). Ménisï, Biblia ini uandakuani úrasïndi “parhakpini” para kʼuiripuechani arhikuekaani (Génesis 11:1). Ísï jimbo, ‘jimbanhi parhakpini’ nani enga jurhimbitku jánhaaka, ima kʼuiripuechaksï irekaati engaksï kurhajchajka Tata Diosïni ka enga ima jaiapanhiantajka. Iámindu i kʼuiripuechaksï Paraisurhu ma irekaati ixú Echerirhu.
16. a) ¿Ambe intsïkuarhiaua Tata Diosï imechani engaksï jimbanhi parhakpinirhu irekaaka? b) ¿Ambechi jatsiski para úni parachi pʼirani ini intsïmperakuani?
16 Jesusi aiatspesïndi eska Tata Diosï íntsauaka “tsípikua para méntkisï” iámindu imechani engaksï jimbanhi parhakpinirhu irekaaka (Markusʌ 10:30). ¿Ambechi jatsiski para úni parachi pʼirani ini intsïmperakuani? Parachi míteni, ju je arhintani Juanu 3:16 ka 17:3. Peru iásï, ambe uandasïni Biblia na enga irekaaka kʼuiripu Paraisurhu, ju je exeni.
17, 18. ¿Nénachi míteski eska Paraisurhu pínandikua jauaka ka eskachi seguru pʼikuarheraaka?
17 No sési jásï ambe, uarhiperakua, uándikperakua ka atajperakua ambe, kʼamakurhiati. No ma kʼuiripu no sési úri pakaraati Echerirhu (Salmo 37:10, 11). Solu ima kʼuiripuechaksï jauati engaksï xénchajka ka kurhajchani Tata Diosïni. Méntkisï pínandikua jauati (Salmo 72:7). Tata Diosï kʼamajkuauati iámindu guerrechani (Salmo 46:9; Isaías 2:4).
18 Jeobaeri ireta no chéparini jámaati. Bibliaeri jurhiatikuecha jimbo, engaksï israelitecha kurhajchenga Tata Diosïni, ima kuájchakuasïrendi ka seguruksï pʼikuarherasïrendi (Levítico 25:18, 19). Paraisurhu, juchajtuchi no ma ambe ma jimbo chéaka ni nemani chérhini. Méntkisïchi seguru pʼikuarheraaka (arhinta je Isaías 32:18; Miqueas 4:4).
19. ¿Andichisï uá seguru jarhani eska jimbanhi parhakpinirhu kánikua tʼirekua jauaka?
19 Kánikua tʼirekua jauati. Biblia uandasïndi: “Kánikua tʼirekua jauati echerirhu; juátecharhu karhakua, kánikua tʼirekua jauati” (Salmo 72:16). Jeobajtsïni újchakuraati ka Echeri uánikua ambe íntspiati (Salmo 67:6).
20. ¿Nénachi míteski eska Echeri paraisu máeuaka?
20 Iámu Echeri paraisu máeuati. Jatsiauakachi sési járhati kʼumanchikuechani ka jardinichani (arhinta je Isaías 65:21-24; Jaŋaskuecha 11:18). Iámu Echeri sési jándentaati ísï eska jardini de Edeni. Jeobajtsïni iámindu ambe íntskuati engachi xáni uétarhinchaaka. Biblia ari ambe uandasïndi Tata Diosïri: “Mítasïngari chíti jájkini ka íntsaasïngari ambe engaksï uétarhinchajka imechani engaksï tsípiti jaka” (Salmo 145:16).
21. ¿Nénachi míteski eskaksï kʼuiripuecha ka animalicha uáka májku kʼéri irekani?
21 Kʼuiripuecha ka animalichaksï uáti májku kʼéri irekani. Animalichaksï nóteru ambe ma úkuauatia kʼuiripuechani. Ka sapiichanksï no ma ambe úkuauati ima animalicha engaksï iásï no sési útspijka (arhinta je Isaías 11:6-9; 65:25).
22. ¿Ambe uá Jesusi pʼamenchatichani jimbo?
22 Nóteru nema pʼamenchaati. Enga Jesusi Echerirhu japka, tsinaaspti uánikua kʼuiripuechani (Mateu 9:35; Markusʌ 1:40-42; Juanu 5:5-9). Peru komu Rei Tata Diosïri Juramukuarhu, tsinauati iámindu pʼamenchatichani. No nema uandaati: “Pʼamenchaxaka” (Isaías 33:24; 35:5, 6).
23. ¿Ambe uá Tata Diosï imechani jimbo engaksï uarhikia?
23 Uarhirichaksï tsíntaati. Tata Diosï aiatspesïndi eska uánikua kʼuiripuechani tsítantauaka. “Tsíntaa[tiksï] uarhiricha imecha engaksï ambarhatika” ka ístu imecha engaksï no úka míteni Jeobani (arhinta je Juanu 5:28, 29; Ukuecha 24:15).
24. ¿Uékapirintsï cha Paraisurhu irekani?
24 Iáminduchi uáka erakuni: jorhenguarhini Jeobaeri ambe ka kurhajchani, o imani ambe úni engachi jucha uékaaka. Engachi kurhajchaska Jeobani, kánikuachi sési irekaaka sánderu orhepani. Ju je sánderu jorhenguarhini tata Jesukristueri ambe ka na enga uáka imani ambe enga Tata Diosï aiatspeka.
