1. ¿Andichisï jatsi para jorhenguarhini ánjelicheri ambe?

JEOBA uékasïndi eskachi míteaka imeri familiani. Ka ánjelichaksï imeri familiauesti. Biblia arhisïndi eskaksï Tata Diosïri uájpeska (Job 38:7). Joperu ¿ambeksï úsïni ánjelicha? ¿Nénaksï jarhuataaskia kʼuiripuechani ióntki? Ka ¿iásïjtsïni uá jarhuatani? (Exe je nota 8).

2. ¿Né kuerauaski ánjelichani? b) ¿Namuni ánjelichaksï jarhaski?

² Para uénani, uétarhisïndi míteni né kuerauaski ánjelichani. Kolosasi 1:16, TNM uandasïndi eska Jeoba orheta Jesusini kueraaska ka tátsekua “iámindu máteru ambe enga auandarhu jaka ka enga echerirhu jaka”. Enga arhijka “iámindu máteru ambe” ístu arhikuekaaxati ánjelichani. ¿Namuni ánjelichani uáski Jeoba? Biblia arhisïndi eskaksï uánikua ánjelicha jarhaska (Salmo 103:20; Jaŋaskuecha 5:11).

3. ¿Ambe arhisïni Job 38:4-7 ánjelicheri ambe?

³ Biblia ístu arhisïndi eska Tata Diosï orheta ánjelichani uáska ante de Echerini úni. ¿Nénaksï pʼikuarheraspi ánjelicha enga Jeoba Echerini úpka? Libru enga arhinhajka Job arhisïndi eskaksï kánikua tsípispka. Iámindu ánjelichaksï májku kʼéri familia máespti engaksï Jeobani kómarhienga (Job 38:4-7).

4. ¿Nénachi míteski eskaksï ánjelicha jukaparharaasïnga kʼuiripuechani?

⁴ Ánjelichaksï méntkisï pendienti jarhasïndi kʼuiripuechani jimbo ka ambe enga Jeoba uéjka úni kʼuiripuni jimbo ka Echeri (Proverbios 8:30, 31; 1 Pedru 1:11, 12). Uákachi seguru jarhani eskaksï ánjelicha kánikua kómu pʼikuarherapka engaksï Adani ka Eba nóteru uékapkia kurhajchani Jeobani. Joperu iásïksï sánderu no sési pʼikuarherajtia engaksï exejka eskaksï  sáno iámindu kʼuiripuecha no kurhajchasïnga Tata Diosïni. Peruksï ánjelicha tsípisïndi enga kʼuiripu ma móantajka ka Tata Diosïni andarhentani (Lukasʌ 15:10). Ánjelichaksï kánikua jukaparharaasïndi imechani engaksï Tata Diosïni marhuakujka, ka Tata Diosï ánjelichani úraasïndi para jarhuataani ka kuájchakuani (Ebreu 1:7, 14). Ju je exeani máru ejempluechani.

5. ¿Nénaksï jarhuataskia ánjelicha Tata Diosïri marhuatspirichani ióntki?

⁵ Jeoba tsimani ánjelichani axaaspti paraksï jarhuatani Lotini  ka imeri familiani sïpakuarhini jiáni engaksï kʼamajkunhapka iretecha Sodoma ka Gomorra (Génesis 19:15, 16). Uánikua uéxurhini ísï tátsekua, profeta Danieli posurhu ma kʼuaninhanhaspti engaksï leonicha japka. Peru no ma ambe úkuarhinchaspti jimboka Tata Diosï ánjelini ma axaspka ka ánjeli mímukuaspti leonichani (Daniel 6:22). Primeru sigluni jimbo, Tata Diosï ístu ánjelini ma axaspti para petantani apostuli Pedruni enga ónhakuarhitini japka (Ukuecha 12:6-11). Ánjelichaksï ístu jarhuataspti Jesusini enga Echerirhu japka. Enga na itsï atakuarhipkia, máteru ánjelichaksï jarhuataspti (Markusʌ 1:13). Ka ima jurhiatikua ante de uarhini, ánjeli ma uinhaperantaspti (Lukasʌ 22:43).

6. a) ¿Nénachi míteski eskaksï iásï ánjelicha jarhuataasïnga Tata Diosïri marhuatspirichani? b) ¿Náki kurhamarhikuechanchi mókuantaua?

⁶ Kʼuiripuechaksï nóteru úsïndia exeani ánjelichani iásï. Peru Tata Diosï seguirixati úraani para jarhuataani imeri marhuatspirichani. ¿Nénachi míteski? Biblia arhisïndi: “Jeobaeri ánjili uirhipandaasïndi imechani engaksï janhanharhijka imani ka kuájpiasïndi” (Salmo 34:7). Jucha engachi Tata Diosïni marhuakujka, uétarhinchasïngachi eskachi kuájchakunhaaka, jimbochi enemiguechani máru jatsiaska engaksï uinhapitiika ka engajtsïni uéjka no sési ambe úcheni. ¿Néskiksï? ¿Naniksï uératini jurhaski? ¿Nénajtsïni uékasïni no sési úcheni? Parachi míteni, ju je exeni ambe enga úkuarhipka ísï tátsekua engaksï Adani ka Eba kueraanhapka.

7. ¿Ambe niáraskia úni Noambakiti sáno iámindu kʼuiripuechani jingoni?

⁷ Kapitulu 3 jimbo, jorhenguarhiskachi eska ánjeli ma nóteru uékaspkia kurhajchani Tata Diosïni ka uékaspti juramuti ma úkuarhini. Biblia uandasïndi eska ima “Noambakiti ka Satanasi” arhinhasïnga (Jaŋaskuecha 12:9). Noambakiti ístu uékasïrendi eskaksï kʼuiripuechajtu nóteru kurhandirapiringuia. Úspti támisï jánhastani Ebani ka jimajkani uératini sáno iámindu kʼuiripuechani ústia támisï jánhastaani. Peru máru kʼuiripuechaksï  kʼóru no méni jurajkuspti Jeobani komu Abeli, Enoki ka Noe (Ebreu 11:4, 5, 7).

8. a) ¿Nénaksï niáraspi demoniu úkuarhini máru ánjelicha? b) ¿Ambeksï úspi demoniuecha paraksï tsípiti pakarani Kʼéri janikuarhu?

⁸ Noeri jurhiatikuechani jimbo, máru ánjelichaksï nóteru uékasptia kurhajchani Tata Diosïni ka jurajkusptiksï auandani paraksï Echerirhu jurhani kʼuiripu úkuarhintani. ¿Andi? Biblia arhisïndi eskaksï uékasïrenga tembuchani (arhinta je Génesis 6:2). Peruksï no jatsispti para ini ambe úni (Judasʌ 6). Májkueni eskaksï ima ánjelicha engaksï no kurhandirapka, sáno iámindu ima tiempu anapu kʼuiripuechaksï niáraspti no jurhimbikua jingoni jámani ka uarhipeni. Jeoba kʼamajkuaspti kʼuiripu no sési úrichani kʼéri janikua ma jingoni enga itsï interu parhakpini uinintapka. Peru pʼímutantaaspti imechani engaksï no jurajkupka (Génesis 7:17, 23). Paraksï úni tsípiti pakarani Kʼéri janikua jimbo, ánjeli no kurhandirechaksï auandarhu níntaspti. Biblia arhiasïndi demoniuecha ini ánjeli no sési úrichani. Íksï ánjelicha erakuspti Satanasini jingoni úkuarhini enga niárapka imecheri juramuti úkuarhini (Mateu 9:34).

9. a) ¿Ambeksï úkuarhinchaspi demoniuecha engaksï auandarhu níntapkia? b) ¿Ambechi exeni jaua?

⁹ Engaksï demoniuecha auandarhu níntapkia, Jeoba nóteru sésikua íntsaasptia paraksï ménderu imeri familia jingoni kuenta úkuarhini (2 Pedru 2:4). Demoniuechaksï nóteru úsïndia kʼuiripu úkuarhintani, peruksï seguirixati támisï jánhastaani “iámindu parhakpini anapuechani” (Jaŋaskuecha 12:9; 1 Juanu 5:19). Ju je exeni nénaksï úsïni tsïjpaani o támisï jánhastaani xáni uánikua kʼuiripuechani (arhinta je 2 Korintu 2:11).

10. ¿Nénaksï úsïni demoniuecha támisï jánhastaani kʼuiripuechani?

¹⁰ Demoniuechaksï mámaru ambe úsïndi para támisï jánhastaani kʼuiripuechani. Máru kʼuiripuechaksï brujuecha o sïkuamicha jingoni nirasïndi. Ka íchaksï uandontskuarhesïndi demoniuecha jingoni. Tata Diosïjtsïni juramuchesïndi eskachi méntku no jámaaka niátani imani ambe enga demoniuecheri  ambeka (Galasia 5:19-21). Májkueni eska kʼuiripu ma enga trampechani úraajka para animalichani jupiani, demoniuechaksï chkuanderakua ambe úrasïndi para jupiani ka juramukuani kʼuiripuechani.

11. a) ¿Ambe arhikuekasïni exerkuarhini? b) ¿Andichisï no jatsi para indeni ambe niátani?

¹¹ Ambe ma engaksï demoniuecha úrajka paraksï chkuanderakuni kʼuiripuni jindesti exerkuarhini, enga jindeka demoniuecheri uinhapikua úrani para míteni ambe enga úkuarhiaka sánderu orhepani. Por ejemplu, nema jamberi uékaati i ambe úni jóskuechani exepariani, kʼuiripueri jájkini arhintaparini o enga eratiaka nemani aianguparini ambe enga úkuarhinchaaka. Uánikuaksï ísï exesïndi eska i ambe no no sési jarhaska peru i ambe kánikua no sési útspisïndi. Biblia arhisïndi eskaksï demoniuecha ima kʼuiripuechani jingoni ánchikuarhisïnga engaksï indeni ambe niátajka. Por ejemplu, Ukuecha 16:16-18 demoniueri ma uandasïndi enga jorhenapka “adibinarini” ka enga jarhuatenga nanakani ma para uandani sánderu orhepani anapu ambe. Enga apostuli Pablu úpka eska demoniu uérhintapiringa, nanaka nóteru úsïrendia imani ambe úni.

12. a) ¿Andisï no sési jaki uékani uarhiricha jingoni uandontskuarheni? b) ¿Andichisï méntku no jatsi para imani ambe kámani enga demoniuecheri ambeka?

¹² Máteru ambe engaksï újka demoniuecha parajtsïni támisï jánhastani jindesti eskachi ísï exeaka eskachi úsïnga uarhiricha jingoni uandontskuarheni. I ambe ísï mítekatesti komueska sïkuamikua ambe. Imaksï uékasïndi eskachi ísï exeaka eskaksï uarhiricha seguirini jarhasïnga irekani máteru nanisï ka eskaksï úsïnga uandontskuarheni juchantsïni jingoni, jarhuatani o no sési ambe úchini. Enga amigu ma uarhijka o familiari ma, jamberi nema niárajti jirinhani kʼuiripuni ma enga uandajka eska úsïnga uandontskuarheni uarhirichani jingoni, komu sïkuamini ma. Jamberi sïkuami uáti ambe ma uandani enga kʼuiripu uéjka míteni uarhiriri ambe o asta ísï mintsirani eska ima na uandenga. Jamberi kʼuiripu ísï exeati  eska uarhiri jingonisï uandontskuarheni jaka peru demoniuecha jingonisï uandontskuarheni jarhajti (1 Samuel 28:3-19). Uánikua pʼindekuecha engaksï únhajka enga nema uarhijka jindesti jimbokaksï ísï exenhasïnga eskaksï uarhiricha máteru nani irekani jarhasïnguia. Máru pʼindekuechaksï jindesti, misa úkuani uarhirichani, nobenariu, kéjtsïtakuani uarhirichani ka máteru pʼindekuecha engaksï demoniuecheri ambeka enga beloriuecharhu únhajka. Engaksï Jesusiri chúxapaticha no uékajka i ambe úni, jamberiksï imecheri familiaricha o besinuecha niárajti no sési ambe uandani imecheri ambe, no sési arhiani oksï nóteru uandajpaania. Peruksï Jesusiri chúxapaticha mítesti eskaksï uarhiricha nóteru nani seguirini jarhasïnguia irekani. Nóchi úsïnga uandontskuarheni imecha jingoni ka nijtsïni imecha uá jarhuani o no sési ambe úchini (Salmo 115:17). Ísï jimbo, jingontku jáma je. Asï jáma je uékani uarhiricha jingoni uandontskuarheni o demoniuecha jingoni, ka asï káma je imani ambe enga demoniuecheri ambeka (arhinta je Deuteronomio 18:10, 11; Isaías 8:19). (Exe je nota 26).

13. ¿Ambeksï úskia uánikua kʼuiripuecha engaksï antesi chériauenga demoniuechani?

¹³ Demoniuechaksï no solu támisï jánhastaasïndi kʼuiripuechani, sino ístuksï chéraasïndi. Iásï, Satanasi ka demoniuechaksï mítesti eskaksï “nóteru ióni” pakarakuasïnguia paraksï no sési ambe úni parhakpinirhu, jimboka Tata Diosï nóteru sésikua íntsauakia. Jimboksïsï sánderu no sési jámani jatia (Jaŋaskuecha 12:12, 17). Peru uánikua kʼuiripuecha engaksï antesi chériauenga demoniuechani nóteruksï chériasïndia. ¿Ambeksï úski?

14. ¿Nénachi uá jurajkuni iámindu ambe enga demoniuecheri ambeka?

¹⁴ Bibliajtsïni arhisïndi néna kuájchakukuarhini ka jurajkuni iámindu ambe enga demoniuecheri ambeka. Por ejemplu, primeru sigluni jimbo, máru kʼuiripuecha engaksï ireta Éfesu anapuepka demoniuecha jingonksï uandontskuarhesïrendi  ante deksï Jesusiri chúxapati úkuarhini. ¿Nénaksï úspi jurajkuni demoniuecheri ambe? Biblia uandasïndi: “Uánikua engaksï ikichakueni jásï ambe uénga sïkuamikueri ambe, juaasptiksï imecheri libruechani ka kurhiraanksï iámindu kʼuiripuechani japarini” (Ukuecha 19:19). Jimbokaksï ima kʼuiripuecha uékasïrenga Jesusiri chúxapati úkuarhini, kurhiraasptiksï iámindu libruechani engaksï majiaueri ambepka. Iásïchi jatsiska para májkueni úni. Parachi úni Jeobani marhuakuni, jatsiskachi para jurajkuni iámindu ambe enga demoniuecheri ambeka. Por ejemplu libruechani, rebistechani, pelikulechani, kústakua o máteru ambe enga sïkuamikueri ambeka. Nájkiruka ísï xarharaaka eska ambakiti ambeska, i ambe demoniuecheri ambesti, jimbochisï no jatsika para i ambe kámani. Ístu no sési jarhasti ima ambe enga kʼuiripu úrajka para seguni kuájchakukuarheni no sési jásï amberi, komu amuletu ambe (1 Korintu 10:21).

15. ¿Ambe máteru ambechi jatsiski para úni parachi kuájchakukuarhini Satanasiri ka demoniuecheri?

¹⁵ Máru uéxurhinicha ísï tátsekua engaksï Éfesu anapuecha kurhiraapkia libru majiecheri, apostuli Pablu karaspti eskaksï útasï ‘uarhiperaxapka’ “Noambakitiri espirituechani jingoni” engaksï no sési úriika (Efesu 6:12). Nájkirukaksï kurhiraapkia imecheri libruechani, demoniuechaksï útasï uékasïrendi no sési ambe úkuani. Ísï jimbo, ¿ambeteruksï jatsispi para úni? Pablu arhiaspti: “Eskajtsï sési jimbo mintsikaaka Diosïni enga ísï terukuntajka eska tarhatakuarhini ma kuájpikuarhitarakua [o eskudu] engajtsï jimbo uáka párhukuani Noambakitiri lansechani engaksï chpiririka” (Efesu 6:16). Májkueni eska eskudu ma na kuájchakujka soldaduni ma enga uarhipeni jarhajka, mintsikani Tata Diosïni, uátijtsïni kuájchakuni demoniuecheri. Engachi kʼamakʼamasï mintsikaska eskajtsïni Jeoba uáka kuájchakuni, uákachi orhepani uérakuni imani ambe engajtsïni Satanasi ka demoniuecha uékaaka úchini (Mateu 17:20).

16. ¿ Ambe uétarhisïni úni parachi sánderu mintsikani Jeobani?

¹⁶ ¿Ambe uétarhisïni úni parachi sánderu mintsikani Jeobani? Pauani pauani arhintani Bibliani ka jorhenguarhini mintsikani  eskajtsïni Jeoba uáka kuájchakuni. Engachi kʼamakʼamasï mintsikaska eskajtsïni Jeoba uáka kuájchakuni, Satanasi ka demoniuechajtsïni no uáti no sési ambe úchini (1 Juanu 5:5).

17. ¿Ambe máteru ambechi jatsiski para úni parachi kuájchakukuarhini demoniuecheri?

¹⁷ Éfesu anapu Jesusiri chúxapatichaksï jatsispti para ístu úni máteru ambe. Iretarhuksï ma anapuespti enga kánikua sïkuamikua ambe japka. Jimbosï Pablu arhiapti eskaksï “méntkisï kómarhiparini” jámani japiringa (Efesu 6:18). Jatsisptiksï para méntku kurhakuni jarhani Jeobani eska kuájchakuapiringa. Juchajtuchi ini tiempu jimbo irekaxaka enga kánikua sïkuamikua ambe jaka. Ísï jimbo, ju je kurhakuni Jeobani eskajtsïni kuájchakuaka ka ju je úrani imeri nombrini engachi kómarhini jauaka (arhinta je Proverbios 18:10). Engachi méntku úndaska kurhakuni Jeobani eskajtsïni kuájchakuaka Sanatanasiri, ima mókuantauati juchari kómarhikuechani (Salmo 145:19; Mateu 6:13).

18, 19. a) ¿Nénachi uá andani uarhiperakuarhu engachi jatsika Satanasi ka demoniuecha jingoni? b) ¿Náki kurhamarhikua mókukuarhintaa máteru kapitulu jimbo?

¹⁸ Engachi jurajkuska iámindu ambe enga demoniuecheri ambeka ka engachi mintsikaska eskajtsïni Jeoba kuájchakuaka, Satanasi ka demoniuechajtsïni no uáti no sési ambe úchini. Nóchi jatsiska para chériani (arhinta je Santiagu 4:7, 8). Jeoba kánikua sánderu uinhapitisti eskaksï demoniuecha. Exeskachia eska Jeoba kastigariuaspka jiáni enga Noe irekani japka, ka míteskachi eska kʼamajkuauaka sánderu orhepani (Judasʌ 6). Miá je eskachi no jandiajku jarhaska ini uarhiperakua jimbo. Jeobajtsïni kuájchakusïndi imeri ánjelicha jingoni (2 Reyes 6:15-17). Jeobaeri jarhuajperata jingoni, uákachi andaani Satanasini ka demoniuechani (1 Pedru 5:6, 7; 2 Pedru 2:9).

¹⁹ Exeskachia eskaksï Satanasi ka demoniuecha kánikua no sési ambe úkuaxaka kʼuiripuechani. Jiájkani, ¿andisï Tata Diosï nótki kʼamajkuani jaki? I kurhamarhikua máteru kapitulu jimbo mókukuarhintaati.