1. ¿Náki kómarhikueri ambechi exea ini kapitulu jimbo?

UÁNIKUA kʼuiripuechaksï mítesti kómarhikua padrenuestrueri. Tata Jesukristu ini xáni ambakiti kómarhikuani úraspti para jorhendaani imeri chúxapatichani kómarhini. ¿Ambe kurhajkuarhispi Jesusi ini kómarhikua jimbo? ¿Andisï xáni jukaparhakue eskachi kurhanguaka ambe enga arhikuekajka?

2. ¿Ambe tanimu ambe enga jukaparhakueka uandaspi Jesusi eskachi kurhajkuarhiaka kómarhikuarhu?

² Jesusi uandaspti: “Jimajkani ísï kómarhi je: ‘Juchari Táti engari auandarhu jaka, kómarhisïngaksïni eska mítenhaaka chíti nombri eska pímbinhasïtiska. Jaue ixú parhakpinirhu chíti juramukua. Úkuarhie eska tʼu na uékajka ixú parhakpinirhu, májku jásï eska na úkuarhijka auandarhu’” (arhinta je Mateu 6:9-13). ¿Andijtsïnisï tata Jesukristu jorhenda ini tanimu ambe kurhajkuarhini? (Exe je nota 20).

3. ¿Ambechi exea ini kapitulu jimbo?

³ Jorhenguarhiskachia eska Tata Diosï, Jeoba arhinhasïnga. Ístuchi exeskia ambe enga uékajka úni Tata Diosï para kʼuiripuecha ka Echeri. Peru ¿ambe arhikuekaxapi Jesusi enga uandapka: “Jaue ixú parhakpinirhu chíti juramukua”? Ini kapitulu jimbochi exeaka ambeski Tata Diosïri Juramukua, ambe uá ka néna uá paraka Tata Diosïri nombri pímbinhajkunhantaaka.

4. ¿Ambeski Tata Diosï Juramukua, ka néski Juramuti?

⁴ Jeoba auandarhu uaxastasti juramukua ma ka Jesusini erakusti para Juramutini. Biblia uandasïndi eska i juramukua Tata Diosïriska. Jesusi jindesti “Rei reicheri ka Juramuti  juramuticheri” (1 Timoteo 6:15). Jesusijtsïni uáti sánderu jarhuatani ka eska náki uéjki kʼuiripueri juramukua ma. Ka ístu, ima sánderu uinhapisti ka eska iámindu parhakpinirhu anapu juramuticha engaksï májku kʼéri úkuarhintapiringa.

5. ¿Nani juramua Tata Diosïri Juramukua ka nani uératini?

⁵ Jesusi auandarhu níntaspti 40 jurhiatikua ísï tátsekua enga na tsítanhantapkia. Tiempu jingoni, Jeoba imani erakusti para Reini imeri Juramukuarhu (Ukuecha 2:33). Tata Diosïri Juramukua, auandarhu uératini juramuati ixú Echerirhu (Jaŋaskuecha 11:15). Jimbosï Biblia arhijti eska Tata Diosïri Juramukua auandarhu anapueska (2 Timoteo 4:18, TNM).

6, 7. ¿Andisï Jesusi sánderu ambakiti juramuti máe ka eska náki uéjki kʼuiripu ma enga juramutika?

⁶ Biblia uandasïndi eska Jesusi jindeska sánderu ambakiti juramuti ka eska náki uéjki kʼuiripu ma enga juramutika, jimboka imajkusï jatsikuarhika “tsípikua enga no méni kʼamarajka” (1 Timoteo 6:16). Iámindu juramutichaksï niárasïndi uarhini, peru Jesusi no méni uarhiati. Ísï jimbo, iámindu ima xáni ambakiti ambe enga Jesusi uáka juchantsïni jimbo, no méni kʼamakurhiati.

⁷ Biblia ístu uandasïndi eska Jesusi Juramuti máeuaka enga jurhimbitku jámaaka ka pʼamojpitini. Ari ambe uandasptia Biblia Jesusiri ambe: “Jeobaeri espiritu imani jingoni jauati, espiritu mímixekueri ka jánhaskakueri, espiritu para arhistatspini ka para uinhapikua jatsini, espiritu para jánhaskakua jatsini ka janhanharhini Jeobani. Ka ima kánikua sési pʼikuarheraati janhanharhini Jeobani. No jusgarpiati seguni eska na jáxeaka ma kʼuiripu, ni seguni eska na kurhajchpiaka. Ka jurhimbikua jingoni jusgariauati pobrichani” (Isaías 11:2-4). ¿Uékapirintsï xásï juramutini ma jatsini?

8. ¿Nénachi míteski eska Jesusi no jandiajku juramuaka?

⁸ Biblia arhisïndi eska Tata Diosï kʼuiripuechani máru erakuaska paraksï Jesusini jingoni juramuni auandarhu. Por  ejemplu, apostuli Pablu arhispti Timoteuni: “Engachi tekaantaaka, ístuchi juramuaka imani jingoni” (2 Timoteo 2:12). ¿Namuni kʼuiripuechaksï juramua Jesusini jingoni?

9. a) ¿Namuni kʼuiripuechaksï juramua Jesusini jingoni? b) Jeoba, ¿káni uénaski erakuani ini 144,000 kʼuiripuechani?

⁹ Eskachi na jorhenguarhika kapitulu 7 jimbo, apostuli Juanu jánhaskakua ma jimbo, exespti Jesusini komu Juramuti ma jini auandarhu máteru 144,000 kʼuiripuecha jingoni. ¿Néskiksï i 144,000 kʼuiripuecha? Apostuli Juanu mismujtsïni mókuchintasïndi: “Jindestiksï engaksï chúxapajka Karichi sapichuni naninterkisï enga ima nirajka, ka engaksï ísï piántskata jaka para Diosï” (arhinta je Jaŋaskuecha 14:1, 4). Karichi sapichu, Jesusisti. Ka 144,000 kʼuiripuecha, jindestiksï ambakiti tata Jesukristueri chúxapaticha enga Tata Diosï erakuaka parakaksï “juramuaka parhakpinirhu” Jesusini jingoni. Engaksï imecha uarhijka, tsíntasïndiksï paraksï auandarhu irekani (Jaŋaskuecha 5:10). Jeoba, primeru sigluni jimbo uénasti erakuani ini 144,000 kʼuiripuechani.

10. ¿Andichisï uandajki eskajtsïni Jeoba uékperakua xarhatachiska enga uékaka eska Jesusi ka 144,000 kʼuiripuechaksï juramuaka?

¹⁰ Jeobajtsïni xáni xénchasïndi enga uékaka erakuani kʼuiripuechani máru paraksï Jesusini jingoni juramuni. Ma parti jimbo, Jesusi ambakiti juramuti máeuati jimboka imajtu niáraspka kʼuiripu máeni ka kánikua no sési ambe nitamanchaspti. Apostuli Pablu uandaspti eska Jesusi míteska na engachi pʼikuarherajka ka eskajtsïni úsïnga “pʼamojkuni juchantsïni engachi xáni debiliika” jimboka imajtu “iámindu ambe jimbo tsʼéjkunha[s]ka májku jásï eska jucha” (Ebreu 4:15; 5:8). Ka máteru ambe, ima 144,000 kʼuiripuechajtuksï kurhangusïndi ambe engachi pʼikuarherajka, jimbokaksï imajtu niáraska tsʼéjkukuechani jatsiani ka pʼamenchani. Ísï jimbo, uákachi seguru jarhani eska Jesusi ka 144,000 kʼuiripuecha, kurhanguaka na engachi pʼikuarherajka ka ambe engachi uandanhiani jauaka.

11. ¿Andisï Jesusi jorhentpipi kurhajkuarhini eska jini auandarhu úkuarhipiringa ambe enga Tata Diosï uéjka?

¹¹ Jesusi jorhendaaspti imeri chúxapatichani eskaksï kurhajkuarhipiringa kómarhikua jimbo eska úkuarhipiringa ambe enga uéjka Tata Diosï ixú parhakpinirhu ka auandarhu. ¿Andiksïsï jatsipi para kurhajkuarhini eska jini auandarhu úkuarhipiringa ambe enga Tata Diosï uéjka? Kapitulu 3 jimbochi jorhenguarhiska eska Noambakiti nóteru uékaspkia kurhajchani Tata Diosïni. Jeoba jurajkuspti eska Noambakiti ka ánjelicha engaksï no kurhandirapka o demoniuecha, auandarhu pakarapiringa ma tiempu. Ísï jimbo, nóksï iáminduecha engaksï auandarhu irekapka úxapti imani ambe Jeoba uékajka. Kapitulu 10 jimbo, jorhenguarhiakachi sánderu Noambakitiri ambe ka demoniuecheri.

12. ¿Ambe tsimani ambe enga jukaparhakueka uandasïni Jaŋaskuecha 12:10?

¹² Biblia uandasptia eska Jesusi ísï no ióni jimbo enga erakunhapiringuia para Juramutini Tata Diosïri Juramukuarhu, Noambakiti jingoni uarhiperapiringa (arhinta je Jaŋaskuecha 12:7-10). Ixú Jaŋaskuecha 12:10, tsimani ambe uandasïndi engaksï jukaparhakueka. Orheta, tata Jesukristu uénasïndi juramuni. Ka tátsekua, Echerirhu kʼuanijpanhasïndi Noambakiti o Satanasi. Eskachi na exeni jauaka, i tsimani ambe úkuarhistia.

13. ¿Ambe úkuarhispi enga Satanasi auandarhu uératini petanhantapka?

¹³ Ánjelicha engaksï no jurajkupka Tata Diosïni, kánikuaksï tsípispti enga Satanasi ka imeri demoniuechaksï petanhantapka auandarhu. Biblia uandasïndi: “Tsípi je iámindu cha engajtsï auandarhu anapueka” (Jaŋaskuecha 12:12). Jo, iásï kʼóruksï auandarhu májku kʼéri jarhastia ka pínandikua jingoni jimbokaksï iáminduecha úsïnga ambe enga Tata Diosï uéjka.

14. ¿Ambe úkuarhixaki parhakpinirhu desdeka Satanasi petanhantaka auandarhu uératini?

 ¹⁴ Peru ixú Echerirhu kánikua ménderueni jánhaskuarhisti. Parhakpinirhu kómu nitamakua ambe jarhasti jimboka “Noambakiti jurhaska andarheraani” kʼuiripuechani “kánikua ikiaparini, jimboka míteska eska nóteru ióni pakaraaka” (Jaŋaskuecha 12:12). Satanasi kánikua ikiaxati jimboka auandarhu uératini petanhantaska ka mítesti eska no ióni jimbo kʼamajkunhaaka. Ísï jimbo, mámaru ambe úsïndi paraksï kʼuiripuecha no sési nitamakuarhini ka no sési pʼikuarherani.

15. ¿Ambe uékasïni Tata Diosï para Echeri?

¹⁵ Peru ambe enga uékajka úni Tata Diosï para Echeri no mójtakurhixati. Ima uékasïndi eska Echeri paraisu máeuaka, eskachi ambakiti tsípikua ma jatsiaka ka eskachi para méntkisï irekaaka (Salmo 37:29). ¿Néna uá iámindu i ambe Tata Diosïri Juramukua?

16, 17. ¿Ambejtsïni jorhendasïni Daniel 2:44 Tata Diosïri juramukueri ambe?

¹⁶ Bibliaeri karakata ixú Daniel 2:44 arhisïndi: “Ima juramuticheri jurhiatikuechani jimbo, Tata Diosï auandarhu anapu, gobiernu ma uaxastaati enga no méni kʼamajkunhaaka. Ka i gobiernu no jindeuati para máteru ireta. Purundurhiauati ka kʼamajkuauati iámindu ini gobiernuechani, ka imajkusï jauati para méntkisï”. ¿Ambejtsïni jorhendasïni i Karakata Tata Diosïri Juramukueri ambe?

¹⁷ Primeru, jorhendasïndijtsïni eska Tata Diosïri juramukua uénaaka juramuni “ima juramuticheri jurhiatikuechani jimbo”. I ambe arhikuekasïndi eskaksï útasï jauaka juramuticha Echerirhu enga Tata Diosïri Juramukua uénapiringuia juramuni. Segundu, jorhendasïndijtsïni eska Tata Diosïri Juramukua no méni kʼamakurhiaka ka eska no ma gobiernu uáka kénditani. Ka terseru, jorhendasïndijtsïni eskaksï parhakpini anapu juramuticha uarhiperaaka Tata Diosïri Juramukua jingoni. Eska Tata Diosïri Juramukua andaaka ka eska  imajku juramuaka Echerirhu. Enga úkuarhiakia i Bibliaeri karakata, kʼuiripuechaksï niáraati jatsini sánderu ambakiti juramukua ma eska no méni.

18. ¿Néna arhinhasïni uarhiperakua enga úkuarhiaka Tata Diosïri Juramukua parhakpinirhu anapu juramukuecha jingoni?

¹⁸ ¿Ambe úkuarhia jiáni engaksï uénani jámaakia uarhiperani parhakpinirhu anapu juramukuecha Tata Diosïri Juramukua jingoni? Demoniuechaksï niáraati tánantaani parhakpini anapu juramutichani, “paraksï uarhiperani imani kʼéri jurhiatikua jimbo Diosïni jingoni enga Iámindu ambe Újka úni”. I uarhiperakua Armajedoni arhinhasïndi, parhakpini anapu juramutichaksï uarhiperaati Tata Diosïri Juramukua jingoni (Jaŋaskuecha 16:14, 16). (Exe je nota 10).

19, 20. ¿Andichisï uétarhinchajki Tata Diosïri Juramukuani?

¹⁹ ¿Andichisï uétarhinchajki Tata Diosïri Juramukuani? Uánikua ambe jimbo, ju je exeni solu tanimu ambe. Uénani jámani, iásïchi iáminduecha pʼamenchasïnga ka uarhini jimbokachi kʼamanharhintstiska. Peru enga Tata Diosï juramuni jauakia, nóteruchi méni uarhiakia. Biblia uandasïndi: “Diosï xáni uéasti parhakpini anapuechani, ísï jimbosï íntspiti imeri máechakua Uájpani paraka nákinterku nema enga imani jakajkuaka, no tsïnchiaka sino jatsini tsípikua para méntkisï” (Juanu 3:16).

²⁰ Tsimani úni jámani, jimbokachi parhakpinirhu ma irekaxaka engaksï uinintaka kʼuiripu no sési úricha. Uánikuaksï chkuanderasïndi, no sési kámpini ka ísku jándikua ambe niátani, ka juchachi no úsïnga pʼínguani. Peru Jeoba kʼóru uáti. Engaksï no mójtakurhiaka, ima kʼamajkuauati Armajedoni jimbo (arhinta je Salmo 37:10). Tanimu úni jámani engachi jimbo uétarhinchajka Tata Diosïri Juramukuani, jindesti jimbokaksï parhakpini anapu juramuticha no pʼamojpisïnga, nóksï jurhimbitku jámani ka nóksï úsïndi sési peentani kʼuiripuecheri uandanhiatechani. Ístuksï no uékasïndi jarhuatani kʼuiripuni paraksï kurhajchani Tata Diosïni. Jimbosï Biblia  uandajti eska kʼuiripu juramukusïnga máteru kʼuiripuni solu para no sési ambe úkuni (Eclesiastés 8:9).

21. ¿Néna uá Tata Diosïri Juramukua úni eska úkuarhiaka ambe enga Jeoba uéjka ixú Echerirhu?

²¹ Enga na kʼamaraakia Armajedoni, Tata Diosïri Juramukua uáti eska úkuarhiaka ambe enga Jeoba uéjka ixú Echerirhu. Por ejemplu, Satanasi ka demoniuechaksï ónhanhaati (Jaŋaskuecha 20:1-3). Tiempu jingoni, nóteru nema pʼamenchaatia ni uarhini. Tata Jesukristueri uarhikua jimbo, iámindu kʼuiripuecha engaksï kurhandiraaka, Paraisurhuksï irekaati para méntkisï (Jaŋaskuecha 22:1-3, TNM). Ístu, Tata Diosïri Juramukua uáti eska Tata Diosïri nombri pʼímbinhajkunhantaaka. ¿Ambe arhikuekasïni i ambe? Eska jiáni enga Tata Diosïri Juramukua Echerirhu juramuni jauakia, iámindu kʼuiripuechaksï janhanharhiaka Tata Diosïri nombrini. (Exe je nota 21).

22. ¿Nénachi míteski eska Jesusi no uénaspka juramuni ni enga Echerirhu japka ni enga auandarhu níntapkia?

²² Enga Jesusi Echerirhu japka, jorhendaaspti imeri chúxapatichani eskaksï kurhajkuarhipiringa kómarhikuarhu: “Jaue ixú parhakpinirhu chíti juramukua”. I ambe arhikuekasïrendi eska inde juramukua nótki janosïrenga. Orheta, Jeoba jatsispti para uaxastani indeni juramukuani ka erakuni Jesusini para Juramutini. Enga Jesusi na níntapkia auandarhu, ¿jirejiresï erakunhaspi para Juramutini? Nómbe. Jesusi jatsispti  para erokuarhini. Ísï no ióni jimbo enga na tsíntapkia, apostuli Pedru ka Pablu uandaspti eska Jesusini jimbo úkuarhisïrenga ambe enga Salmo 110:1 arhijka. Ini karakata jimbo, Jeoba uandaspti: “Uaxaka juchiti jurhijkandani ladu jimbo astakakini ji jatsichiauaka chíti ikiatspitichani eska ma chíti jatandukua” (Ukuecha 2:32-35; Ebreu 10:12, 13). I ambe arhikuekasïrendi eska Jesusi jatsispka para erokuarhini astaka Jeoba Juramuti úpiringa.

23. a) ¿Káni uénaski juramuni Jesusi Tata Diosïri Juramukuarhu? b) ¿Ambechi exea máteru kapitulu jimbo?

²³ Jiájkani, ¿káni uénaski juramuni Jesusi? Uéxurhini 1914 jimbo. Uánikua uéxurhini antesi, grupu ma ambakiti tata Jesukristueri chúxapatichaksï kurhanguspti eska 1914 jimbo, uéxurhini máepiringa enga kánikua jukaparhakuepka para Bibliaeri karakatecha. Ambe enga úkuarhini jaka parhakpinirhu 1914 jimbo uératini, xarhatasïndi eskaksï ima tata Jesukristueri chúxapaticha jurhimbitku uandasïrenga. Jesusi ima uéxurhini uénasti juramuni (Salmo 110:2). Ísï no ióni jimbo, Satanasi Echerirhu kʼuanijpanhaspti, ka iásï mítesti eska “nóteru ióni” pakarakusïnguia (Jaŋaskuecha 12:12). Máteru kapitulu jimbo, exeakachi eskachi ini tiempu jimbo irekaxaka enga “nóteru ióni” pakarajkia. Ístuchi jorhenguarhiaka eska Tata Diosïri Juramukua, no ióndani, uáka eska úkuarhiaka ambe enga Jeoba uéjka ixú Echerirhu. (Exe je nota 22).