1, 2. ¿Andichisï uá uandani eska Biblia ambakiti regalu máeska?

ENGAKSÏNI chári amigu ma regalu ma íntskujka engajtsï no erokuarhini jarhajka, ¿nájtsï pʼikuarherasïni? Seguru eskajtsï uékani jarhajkia exeni ambeski. Kánikuajtsï tsípisïnga engaksïni chári amigu miáka ka diosmaiamukuajtsï arhisïnga.

² Biblia, Tata Diosïri ambakiti regalu máesti. Imani ambe arhisïndi engachi no uáka máteru nani exentani. Por ejemplu, arhisïndijtsïni eska Tata Diosï kueraaska auandani ka Echerini, ka eska ístu kueraaska orheta acheetini ka orheta uarhiitini. Bibliarhuksï jarhasti konsejuecha engajtsïni jarhuatajka engachi uandanhiatechani jatsiajka. Ístu, arhisïndi eska Tata Diosï uékasïnga eska Echeri, ambakiti lugari máeuaka ka aiangusïndijtsïni néna ísï uá.

3. ¿Ambejtsï exea engajtsï Bibliaeri ambe jorhenguarhiaka?

³ Engajtsï jorhenguarhiaka Bibliaeri ambe, exeakajtsï eska Tata Diosï uékasïnga chári amigueni. Engajtsï sánderu míteska, sánderujtsï andarheraaka.

4. Arhijtsïni je ambeksïni ísku pakatasïni Bibliaueri ambe.

⁴ Biblia, tradusirikuarhistia iámu o ma partijku jukari 3,000 idiomecha jimbo, ka uánikua kopiechaksï únhastia. Sáno iámindu kʼuiripuechaksï úsïndi arhintani Bibliani imecheri idioma jimbo. Ka jukari ma miioni Bibliaechaksï etsakuarhisïndi mándani semana. Xarharasïndi eska Biblia no ísïska eska máteru libruecha.

5. ¿Ambe arhikuekasïni eska Biblia Tata ‘Diosïni jimboeska’?

⁵ Biblia, Tata “Diosïni jimboesti” (arhinta je 2 Timoteo 3:16). Peru jamberi nema uandaati: “¿Néna Biblia Tata Diosïni jimboeua ka jiniksï acheeticha karani?”. Biblia  mókuntasïndi: “Ima pímbinharhati acheeticha Diosïni jimboksïsï uandendi ka eska Espiritu Santu na uandarauenga” (2 Pedru 1:21). ¿Néna? Uákachi ísï terukutantani komu patronini ma enga imeri ánchikuarhirini kurhakujka eska karta ma karaaka. ¿Nériski karta? Patroniri, no imeri enga ánchikuarhikujka. Májkueni, Biblia Tata Diosïni jimbo jurhasïndi, no ima kʼuiripuecheri enga ima úraaka paraksï karani. Tata Diosï jarhuataasti paraksï imeri eratsekuechani karani. Jimbochisï uáka uandani eska Biblia meru Tata Diosïri uandakueska (1 Tesalonika 2:13; exe je nota 2).

6, 7. ¿Andichisï uá uandani eska Bibliarhu iámu ambe terukuntasïnga?

⁶ Desdeka uénaka karanhani Biblia astaka kʼamaranhaka,  jukari 1,600 uéxurhini nitamasti. Imecha engaksï karaka, nóksï májku tiempu jimbo irekaspti. Máruksï úspti estudiarini eskuela ka máteruecha nómbe. Por ejemplu, ma, doktorispti. Máteruechaksï animalichani jatsiaspti ka echerichani ánchitaani, kurucha pʼitamaticha, karichi eranguticha, profetecha, juesicha o reicha. Nájkirukaksï mámaru jásï ambe uénga, Bibliarhu iámindu ambe terukuntasïndi, desde uénakuarhu asta kʼamarani, ma temeri ambejku jorhentpesïndi. *

⁷ Bibliaeri primeru kapituluechajtsïni arhisïndi nénaksï uénakuarhiski uandanhiatecha parhakpinirhu. Ka últimu kapituluechajtsïni arhisïndi na enga Tata Diosï sési peentaka uandanhiatechani ka Echerini paraisu ma úntani. Biblia uandantasïndi ambe enga xáni úkuarhikia kʼuiripuecha jingoni ka xarhatasïndi eska Tata Diosï méntkisï úsïnga ambe enga uandajka.

8. ¿Náki ejempluechaksï xarhatasïni eska Biblia jurhimbitku ambe uandantasïnga?

⁸ Biblia no karanhasti para Echeriri ambe jorhentpini eskuela ni animalicheri ambe joperu ambe enga uandajka i temecheri ambe méntkisï jurhimbitku ambe uandantasïndi. Jo, i ambechisï erokuarhipiringa librueri ma enga Tata Diosïni jimboeka. Por ejemplu, libru Levítico arhisïndi ambe enga Tata Diosï arhiapka israelitechani eskaksï úpiringa paraka pʼamenchakua ambe no etsakuarhipiringa. I ambe tʼuini ióni karanhasptia ante de kʼuiripu míteni na enga úkuarhenga pʼamenchakua ambe. Biblia ístu jurhimbitku uandasïndi enga arhijka eska Echeri “no ma ambe jimbo” tirhipakata jarhaska (Job 26:7). Ka enga ma tiempu sáno iámindu kʼuiripuecha ísï eratsenga eska Echeri pareju jáxespka, Biblia tʼuini arhisïrendia eska Echeri uirhipitiska (Isaías 40:22).

9. ¿Ambe xarhatasïni engaksï Bibliaeri kararicha iámindu ambe uandantaka?

 ⁹ Enga Biblia uandantajka ambe enga úkuarhipka ióntki, méntkisï iámindu ambe uandantasïndi. Peru uánikua máteru libruecha, nóksï ísï úsïndi jimbokaksï kararicha no iámindu ambe jurhimbikua jingoni uandantasïnga. Por ejemplu, nóksï méntkisï uandantasïndi ima uarhiperakuecheri engaksï imecheri nasionicha tsïtaka. Peru imecha engaksï Bibliani karaka, iámindu ambeksï uandantasti, asta enga ireta Israeli tsïtaenga uarhiperakua ma. Ístuksï karasti imani ambe engaksï imecha mismu no uénga sési ambe úni. Por ejemplu, librurhu de Números, Moisesi karaspti eska kánikua no sési ambe úspka ka eska imani ambe jimbo Tata Diosï kastigarispka (Números 20:2-12). Engaksï ísï iámindu ambe uandantaka, xarhatasïndi eska Biblia Tata Diosïni jimboeska ka eskachi uáka mintsikani.

10. ¿Andiksïsï seguirini jaki marhuani Bibliaeri konsejuecha iásï?

¹⁰ Biblia, Tata Diosïni jimboesti “marhuasïndi para jorhentpini, para jánhastpini, ka para arhistatspini” (2 Timoteo 3:16). Bibliarhu anapu konsejuechaksï seguirixati marhuani iásï jimbokaksï Jeobani jimbo jurhasïnga. Jimbokajtsïni ima kueraaska, sési mítesti ambe engachi eratsejka ka pʼikuarherani. Sánderujtsïni sési mítesti ka eska jucha mismu, ka uékasïndi eskachi sési irekaaka. Jeoba mítesti ambe engajtsïni marhuachiaka ka ambe nómbe.

11, 12. a) ¿Náki ambakiti konsejuechanchi exeantasïni Mateu 5 asta 7? b) ¿Náki máteru konsejuechanchi exeantasïni Bibliarhu?

¹¹ Ambakiti konsejuechanchi exeantaasïnga Mateu 5 asta 7 jamberi. Jimini, Jesusijtsïni arhisïndi nénachi uá sési irekani, sési pájperani máteruechani jingoni, nénachi kómarhia ka nénachi jatsiski para exeni tuminani. Nájkiruka 2,000 uéxurhini nitamakia enga Jesusi íntspiaka ini konsejuechani,  imeri uandakuechaksï seguirixati mintsitarhu niáratspeni ka marhuachisïndijtsïni iásï.

¹² Bibliarhuchi ístu exeantaasïnga konsejuechani engajtsïni jarhuatajka parachi sánderu sési pájperani juchari familia jingoni, parachi ambakiti ánchikuarhirini ka eskachi pínandikua jingoni irekaaka máteruecha jingoni. Bibliaeri konsejuechajtsïni méntkisï uáti jarhuatani, no arhiparini néskichi, náchi irekaski ni náki uandanhiatechanchi jatsiaski (arhinta je Isaías 48:17; exe je nota 3).

13. ¿Ambe uandaspi Isaiasi eska úkuarhinchapiringa Babilonia?

¹³ Uánikua Bibliaeri profesiauechaksï úkuarhistia. Por ejemplu, profeta Isaiasi uandaspti eska Babilonia kʼamajkunhapiringa ka na enga úkuarhipiringa (Isaías 13:19). Babilonia kuájchakukata jarhaspti kʼérati puertecha jimbo ka ríu ma jimbo enga uirhipandani japka. Isaiasi uandaspti eska ríu kétsipiringa ka eskaksï puertecha mítakuarhitini pakarapiringa. Ístu uandaspti eska imecha engaksï kʼamajkupiringa iretani, nóksï jatsipiringa para uarhipeni. Isaiasi asta uandaspti eska ima enga kʼamajkupiringa Babiloniani, Siru arhinhapiringa (arhinta je Isaías 44:27–45:2). (Exe je nota 4).

14, 15. ¿Néna úkuarhiski ambe enga Isaiasi uandapka?

¹⁴ Ma 200 uéxurhini ísï tátsekua enga Isaiasi karapka profesiani, ejersitu ma niáraspti Babilonia para kʼamajkuni. Ka ¿né orhekupaxapi ejersituni? Rei Persia anapu. Ka ¿na arhinhasïreni? Siru, ísïmindu eska na uandapka profesia. Iámindu ambe listu jarhasptia paraka úkuarhipiringa máteru ambe ima profesiaueri.

¹⁵ Ima chúrikua enga kʼamajkunhapka, Babilonia anapuechaksï kʼuínchikua ma úntaxapti. Seguruksï pʼikuarherasïrendi ríu jimbo ka kʼérati bardecha jimbo enga kuájchakuenga  iretani. Iretarhu uéramanisï, Siru ka imeri ejersitu úspti eska ríu máteru nanisï nipiringa paraka kétsipiringa itsï. Enga itsï kánikua kétsepkia, Persia anapu soldaduechaksï úspti parhikuni ríuni. Peru ¿nénaksï úpirini parhikuani bardechani? Eska na uandapka profesia, ireteri puertechaksï mítakuarhitini pakaraspti. Jimboksïsï soldaduecha no jatsipti para uarhipeni paraksï kʼamajkuni iretani.

16. a) ¿Ambe uandaspi Isaiasi eska na pakarapiringa Babilonia? b) ¿Andichisï uá uandani eska úkuarhiska ambe enga Isaiasi uandapka?

 ¹⁶ Isaiasi uandaspti eska tiempu jingoni nóteru nema irekapiringa Babilonia. Karaspti: “Nóteru méni irekanhaati jima” (Isaías 13:20). ¿Úkuarhiskiksï i uandakuecha? Jo. Lugari enga Babilonia japka, kʼamajkukata pakarasti. I lugari jini Irak jarhasti kʼéri ireta Bagdad no iauani. No nema irekasti jima. Ísï eska na arhijka Biblia, Jeoba ísï ústi enajki eskoba ma jingoni kʼaratanta Babiloniani para kʼamajkuni (Isaías 14:22, 23).

17. ¿Andichisï uá mintsikani eska Tata Diosï uáka ambe enga xáni aiatspijka?

¹⁷ Uánikua Bibliaeri profesiauechaksï úkuarhistia. Jimbochisï uáka mintsikani imani ambe enga Biblia uandajka para sánderu orhepani. Uákachi seguru jarhani eska Jeoba Echerini paraisu ma úntaaka ísï eska na aiatspika (arhinta je Números 23:19). Tata Diosïjtsïni aiachisïndi eskachi  uáka irekani para méntkisï, ima Tata “Diosï enga no újka chkuanderani” (Titu 1:2). *

18. ¿Ambe uandaspi apostuli Pablu ‘Tata Diosïri uandakueri’?

¹⁸ Asta ixú jamberi, chájtsï exeskia eska nóteru ma libru jarhaska ísï eska Biblia. Iámu Biblia sési terukuntasïndi ka enga imeri ambe uandajka engaksï kʼuiripuecha inbestigarijka o ambe enga úkuarhika ióntki, méntkisï jurhimbitku ambe uandantasïndi. Ístujtsïni ambakiti konsejuechani íntsaasïndi ka uánikua profesiauechaksï jarhasti engaksï úkuarhikia. Peru jarhasti sánderu ambe. Apostuli Pablu karaspti: ‘Tata Diosïri uandakua tsípitisti ka uinhapitini’ (arhinta je Ebreu 4:12).

19, 20. a) ¿Nénaksïni jarhuataa Biblia parajtsï míteni na engajtsï jásïka? b) ¿Nénajtsï uá agradeserikuni Tata Diosïni engajtsïni íntskuka Bibliani?

¹⁹ Biblia uáti mójtakuni chári irekua. Jarhuataatiksïni parajtsï míteni na engajtsï jásïka. ¿Néna? Bibliaksïni uáti jarhuatani parajtsï kurhanguani chári eratsekuechani ka ambe engajtsï mintsitarhu pʼikuarhinhijka. Por ejemplu, jamberichi eratsejka eskachi xénchasïnga Tata Diosïni. Peru parachi xarhatani, jatsiskachi para úni ambe enga Biblia uandajka.

²⁰ Míteskachia eska Biblia Tata Diosïni jimboeska. Tata Diosï uékasïndi eskajtsï cha arhintaaka, jorhenguarhiaka ka eskajtsï tsitiaka míteni ambe enga Biblia arhijka. Agradeseriku je Tata Diosïni ini regaluni jimbo. ¿Nénajtsï uá ísï úni? Seguirini jorhenguarhini Bibliaeri ambe. Ísïjtsï uáka kurhanguni néna uékasïni Tata Diosï eskachi irekaaka sánderu orhepani. Máteru kapitulu jimbo, jorhenguarhiakachi sánderu íri ambe.