1. ¿Nanichi uá jorhenguarhini ambe enga úkuarhiaka sánderu orhepani?

JAMBERI engajtsï exejka notisia ambe niárajkajtsï kurhamarhikuarhini: “¿Ambe úkuarhia sánderu orhepani i parhakpini jingoni?”. Xáni no sési ambe úkuarhixati ka no sési kámberanhani engaksï máru kʼuiripuecha eratsejka eska i parhakpini nóteru ióndani kʼamajkunhaakia. ¿Ísïski i ambe? ¿Uáchi míteni ambe úkuarhia sánderu orhepani? Jo. Nájkirukachi kʼuiripuecha no újka uandani ambe enga úkuarhiaka sánderu orhepani, Jeoba kʼóru úsïndi. Bibliarhu, Jeobajtsïni arhisïndi ambe enga úkuarhiaka sánderu orhepani para jucha ka para Echeri (Isaías 46:10; Santiagu 4:14).

2, 3. a) ¿Ambeksï uékasïreni míteni Jesusiri chúxapaticha? b) ¿Ambe mókukuaspi Jesusi?

² Enga Biblia uandajka eska parhakpini kʼamajkunhaaka, no arhikuekasïndi eska Echerisï kʼamajkunhaaka, sino no sési jásï ambe. Peru ¿néna úkuarhia i ambe? Jesusi jorhentpispti eska Tata Diosïri Juramukua niárapiringa juramuni parhakpinirhu (Lukasʌ 4:43). Imeri chúxapatichaksï uékasïrendi míteni káni jupirini i Juramukua, jimboksïsï kurhamarhipti: “¿Kánisï úkuarhia i ambe? ka ¿ambe mínda jaua engari tʼu junguakuekani jauaka, ka enga kʼamarani jámaaka i tiempu?” (Mateu 24:3). Jesusi no arhiaspti káni meru jupirini, peru arhiaspti ambe enga úkuarhipiringa ante de kʼamajkunhani no sési jásï ambe. Ka ambe enga Jesusi uandapka, iásï úkuarhixatiia. (Exe je nota 24).

³ Ini kapitulu jimbo, exeakachi máru ambe enga xarhatajka eskachi imani jurhiatikuecha jimbo irekaxaka enga nóteru ióndani kʼamajkunhaakia no sési jásï ambe. Peru engachi uékajka kurhanguni andisï parhakpinirhu xáni no sési jánhaskuarhini jaki, orhetachi jatsiska para míteni uarhiperakueri ma enga auandarhu úkuarhipka.

4, 5. a) ¿Ambe úkuarhispi auandarhu ísï tátsekua enga Jesusi uénapka juramuni? b) Seguni Jaŋaskuecha 12:12, ¿ambe úkuarhispi enga Jesusi auandarhu uératini Echerirhu kʼuanijpapka Satanasini?

⁴ Kapitulu 8 jimbo, jorhenguarhiskachi eska Jesusi 1914 jimbo uénaska juramuni auandarhu (Daniel 7:13, 14). Libru enga arhinhajka Jaŋaskuecha arhisïndijtsïni ambe enga úkuarhipka ísï tátsekua: “Jarhaspti ma kʼéri guerra auandarhu, ánjeli Migueli ka imeri ánjelicha uarhiperaxaptiksï dragonini jingoni, ka dragoni ka imeri ánjelicha Miguelini jingoni”. Migueli, Jesusisti, ka dragoni Satanasi. * Satanasi ka demoniuechaksï tsïtaspti ini uarhiperakuani ka Echerirhuksï kʼuanijpanhasti. ¡Kánikuaksï tsípini japti ánjelicha! Peru ¿ambe úkuarhipirini kʼuiripuecha jingoni ixú parhakpinirhu? Biblia uandasïndi eskaksï kánikua kómu nitamapiringa jimboka Noambakiti kánikua ikiaxaka. Ima mítesti eska “nóteru ióni pakaraaka” o irekani (Jaŋaskuecha 12:7, 9, 12).

⁵ Noambakiti jánguarhintaxati no sési jásï ambe úni parhakpinirhu xáni eska na xáni uáka. Kánikua ikiaxati jimboka no ióndani Jeoba nóteru jurajkuakia paraka seguiriuaka no sési ambe úni Echerirhu. Ju je exeni ambe enga uandapka Jesusi eska úkuarhipiringa últimu jurhiatikuechani jimbo.

6, 7. ¿Ambechi uá uandani uarhiperakuecheri ka engaksï uánikua no jatsika tʼirekua?

⁶ Uarhiperakuecha. Jesusi uandaspti: “Jimbokaksï ma nasioni anapuecha jauaraaka paraksï uarhiperani máteru nasioni anapuechani jingoni, ka ístu ma juramukuarhu anapuecha máteru juramukuarhu anapuechani jingoni” (Mateu 24:7). No méni xáni uánikua kʼuiripu uarhixapti uarhiperakuecha jimbo eska iásï. Seguni grupu ma enga kánikua mítekateka enga exejka ambe enga úkuarhijka interu parhakpinirhu, uandasïndi  eskaksï jukari 100 miioni kʼuiripuecha uarhiskia uarhiperakuecha jimbo uéxurhini 1914 uératini. Ka 100 uéxurhini jimbo, entre 1900 a 2000, tanimu xanhariksï sánderu uánikua kʼuiripuecha uarhisti uarhiperakuecha jimbo ka eska ima uéxurhinicha engaksï nitamapka engaksï jindeka 1,900. Eranhaska je na engaksï xáni no sési jásï ambe nitamanchaka uánikua kʼuiripuecha.

⁷ No jatsini tʼirekua. Jesusi uandaspti eska no japiringa kánikua tʼirekua (Mateu 24:7). Nájkiruka iásï uánikua ambe jaka para arhani, uánikua kʼuiripuechaksï pauani pauani no jatsikuarhisïndi ambe tʼireni. ¿Andi? Jimbokaksï no jatsisïnga tumina para tʼirekua piáni o echeri ma para júskani. Jukari 1,000 miioni kʼuiripuechaksï kánikua pobristi ka imantku tʼirekuaksï úsïndi piákuarhini engaksï uétarhinchajka. Ka uánikua sapiichaksï uarhisïndi mándani uéxurhini jimbokaksï no jatsisïnga kánikua tʼirekua.

8, 9. a) ¿Úkuarhixaki ambe enga Jesusi uandapka eska niárapiringa jencheni? b) ¿Ambechi uá uandani pʼamenchakuecheri ambe?

⁸ Jenchekuecha. Jesusi uandaspti eskaksï “kʼérati jenchekuecha” japiringa (Lukasʌ 21:11). Mándani uéxurhini mítetinchi jarhasïnga eskaksï kʼérati jenchekuecha úkuarhiaka. Desde 1900 uératini, jukari dosi  miioni kʼuiripuechaksï uarhisti jenchekuecha jimbo. Nájkirukaksï iásï máru aparatuecha újka uandantani enga jenchekua ma úkuarhiaka, útasïksï uánikua kʼuiripuecha uarhisïndi jiáni enga jenchejka.

⁹ Pʼamenchakuecha. Jesusi uandaspti eskaksï “pʼamenchakuecha” japiringa, arhikuekani, kʼérati pʼamenchakuecha engaksï sóntku etsakuarhipiringa iápurisï ka engaksï uándikpipiringa (Lukasʌ 21:11). Nájkirukaksï doktoricha újka tsinani kʼuiripuni uánikua pʼamenchakuecheri, útasïksï no jatsisti sïpiati para iámindu jásï pʼamenchakua. Mándani uéxurhini, uánikua kʼuiripuechaksï uarhisïndi pʼamenchakuecha jimbo komu kánseri, diabetesi, pakua ka jiuakua (cólera) ka máteru jásï pʼamenchakua ambe jimbo.

10. Seguni 2 Timoteo 3:1-5, ¿nénaksï jámapirini kʼuiripuecha últimu jurhiatikuechani jimbo?

¹⁰ Biblia uandasïndi ixú 2 Timoteo 3:1-5 eska “últimu jurhiatikuechani jimbo” úkua jukapiringa. Apostuli Pablu uandaspti eska últimu jurhiatikuechani jimbo, kʼuiripu ari ambe úpiringa:

• No uandanhiani máteruecha jimbo.

•   Jukari jatsikuarhikuekani.

• Nóksï janhanharhiani táti jembechani.

• Nóksï sési arhini Tata Diosïni.

• Nóksï uékaani kʼumanchikuarhu anapuechani.

• No ma ambe jimboksï pʼíngukuarhini.

• Nóksï sési kámpini.

• Sánderuksï uékani tsípikuarhini ka eska Tata Diosïni uékani.

• Ísïksï jámani enajkiksï janhanharhia Tata Diosïni, peruksï mintsitarhu nómindu janhanharhini.

11. Seguni Salmo 92:7, ¿ambeksï úkuarhinchaa kʼuiripu no sési úricha?

¹¹ ¿Ísïksï jámasïni kʼuiripuecha jima engajtsï cha irekaka? Interu parhakpinirhuksï jarhasti xárati kʼuiripuecha. Peru Tata Diosï uáti ambe ma para sési peentani i ambe. Ima aiatspisïndi: “Engaksï no sési úricha niárajka ísï tsikini komueska uitsakua ambe ka iámindu imecha engaksï no sési ambe niátajka niárajka uánini, jindesti paraksï méntku kʼamajkunhani”. I ambe arhikuekasïndi eskaksï kʼuiripu no sési úricha méntku kʼamajkunhaaka (Salmo 92:7).

12, 13. ¿Ambejtsïni jorhendaskia Jeoba ini últimu jurhiatikuechani jimbo?

¹² Biblia uandaspti eska últimu jurhiatikuechani jimbo kánikua kómu nitamakua ambe japiringa ka no sési jánhaskuarhini parhakpinirhu. Peru ístu uandaspti eska ambakiti ambe úkuarhipiringa.

¹³ Biblia sánderu sési kurhangukuaripirindi. Enga profeta Danieli karapka últimu jurhiatikuecheri ambe, uandaspti: “Jurhimbiti jánhaskakua kánikua úkuarhintaati” (Daniel 12:4). I ambe arhikuekasïndi eska Tata Diosï jarhuatapiringa imeri iretani sánderu sési kurhanguni Bibliani. Ka i ambe úkuarhisti sánderumindu 1914 para orhepatini. Por ejemplu, Tata Diosïjtsïni jorhendasti na enga xáni jukaparhakueka imeri nombri ka ambe enga uéjka úni Echerirhu. Ístujtsïni jorhendasti ambe jimbojtsïni marhuachisïni euajpintskua, ambechi úkuarhinchasïni engachi uarhijka ka eskaksï uarhiricha tsíntaaka. Jorhenguarhiskachia eska solu Tata Diosïri Juramukua uáka sési peentani iámindu uandanhiatechani engachi jatsiaka. Ka ístuchi jorhenguarhiskia nénachi uá tsípikua jingoni irekani ka imani ambe úni enga Tata Diosï jaiapanhintajka. Peru ¿ambeksï úsïni Tata Diosïri marhuatspiricha imani ambe jingoni engaksï jorhenguarhijka? Máteru Bibliaeri karakatajtsïni aiangusïndi i ambe. (Exe je nota 21 ka 25).

14. ¿Nani ka nani aianhpinhaxaki Tata Diosïri Juramukueri ambe, ka néksï úxaki ini ambe?

¹⁴ Interu parhakpinirhu aianhpinhapirindi. Jesusi ari ambe uandaspti últimu jurhiatikuecheri ambe: “Ka i ambakiti aianhperakua Diosïri juramukueri, aianhpinhaati iápuru parhakpinirhu” (Mateu 24:3, 14). Ambakiti aianhperakua Tata Diosïri Juramukueri ambe, aianhpinhaxati ma 240 paisicha ka territoriuecha jimbo ka ma 1,000 idiomecha jimbo. Interu parhakpinirhu, Jeobaeri testiguechaksï “iámindu nasionicharhu ka iámindu tribuecharhu ka iretecharhu anapuecha” jarhuataxati kʼuiripuni kurhanguni ambeski Tata Diosïri  Juramukua ka ambe enga uáka kʼuiripuni jimbo (Jaŋaskuecha 7:9). Jeobaeri testiguechachi tsípikua jingoni úsïnga i ambe, no ma tumina euajpiparini. Ka ísï eska na uandapka Jesusi, uánikua kʼuiripuechajtsïni ikiachisïndi ka no sési kámani. Peru no ma ambe uáti pʼínguni aianhpikuani (Lukasʌ 21:17).

15. a) ¿Jakajkusïntsï cha eskachi últimu jurhiatikuechani jimbo irekaxaka, ka andijtsï ísï uandajki? b) ¿Ambeksï úkuarhinchaa ima kʼuiripuecha engaksï no kurhajchajka Jeobani, ka imecha engaksï kurhajchajka?

¹⁵ ¿Jakajkusïntsï cha eskachi últimu jurhiatikuechani jimbo irekaxaka? Uánikua Bibliaeri karakatechaksï úkuarhixati engaksï últimu jurhiatikuecheri ambe uandajka. Nóteru ióndani, Jeoba uandaati eska nóteru aianhpinhaakia ambakiti aianhperakua ka “jimajkani kʼamaraati i tiempu” (Mateu 24:14). ¿Ambe arhikuekasïni i ambe? Eska guerra ma úkuarhiaka enga Armajedoni arhinhajka, nani enga Tata Diosï kʼamajkuaka iámindu no sési jásï ambe. Jesusini úraparini ka ánjelichani, Jeoba kʼamajkuauati iámindu imechani engaksï no kurhajchajka imani ni Jesusini (2 Tesalonika 1:6-9). Enga kʼamaraakia Armajedoni, Satanasi ka demoniuechaksï nóteru uátia chkuanderakuani kʼuiripuechani. Iámindu engaksï kurhajchajka Tata Diosïni ka engaksï jiókuarhijka imeri Juramukuani, exeatiksï na enga Tata Diosï uáka iámindu ambe enga xáni aiatspika (Jaŋaskuecha 20:1-3; 21:3-5).

16. Míteparini eska i parhakpini no ióni jimbo kʼamajkunhaakia, ¿ambejtsï jatsiski para úni cha?

¹⁶ Nóteru ióndani kʼamajkunhaatia i parhakpini enga Noambakiti juramuni jaka. Ísï jimbo, kánikua jukaparhakuesti eskajtsï exeaka ambejtsï jatsiski para úni. Jeoba uékasïndi eskajtsï jorhenguarhiaka xáni eskajtsï xáni uáka Bibliaeri ambe. Ísï jimbo, kánikua jukaparhara je ini jorhenguarhikuani (Juanu 17:3). Ístu, Jeobaeri testiguechaksï mándani semana tánguarhisïndi. Ini tánguarhikuecha jimbo, jarhuataasïndiksï kʼuiripuechani kurhanguni Bibliani. Jánguarhinta je méntkisï nirani ini tánguarhikuecharhu (arhinta je Ebreu 10:24, 25). Engajtsï  exejka eskajtsï jatsiska para mójtakuni máru ambe engajtsï úni jaka, jánguarhinta je ísï úni. Engajtsï sánhani arhiaka mójtakurhini, sánderujtsï sési pájperaaka Jeoba jingoni (Santiagu 4:8).

17. ¿Andiksïsï uánikua kʼuiripuecha no erokuarhini jaua enga parhakpini kʼamajkunhaaka?

¹⁷ Apostuli Pablu uandaspti eska jiáni enga kʼuiripu no sési úri kʼamajkunhaaka, ísï juuaka “komueska ma kuarhukpiti enga chúrikua jimbo inchatspijka” enga no nema erokuarhini jarhajka (1 Tesalonika 5:2). Jesusi uandaspti eskaksï uánikuecha no jakajkupiringa eskachi últimu jurhiatikuechani jimbo irekaxaka. Ari ambe uandaspti: “Jimboka eska na úkuarhipka jimajkanisï enga Noe irekani japka, ístu úkuarhiaka enga Uájpa Acheetiri junguaka. Jimboka enga nótki janoenga kʼéri janikua, tʼirenhaxapka ka itsïmanhani. Tembuchanhaxapti ka uambuchanhani asta imani jurhiatikua jimbo enga Noe jatapka barkurhu. Ka útasï nótkiksï jánhaskasïrendi [oksï no kasu úspti] astaka úndapka janini, ka iáminduecha ogarinksï. Ka ístu úkuarhiati enga Uájpa Acheetiri junguaka” (Mateu 24:37-39).

18. ¿Ambejtsïni arhispi Jesusi eskachi úpiringa?

¹⁸ Jesusijtsïni arhispti eska engachi “puru tʼirekueri ambe tantiarini jauaka o kauini jámani, o sánderu tsitini iásï anapu ambe” i ambejtsïni uáka ójkutani. Uandaspti eska jiáni enga kʼamajkunhaaka ambe ma, ma repentkueuaka ka eskaksï kʼuiripuecha no erokuarhini japiringa, ísïpirindi komueska trampa ma. Tátsekua pʼímarpispti: “Jimajkani jingontku je, ka méntku jauenani kómarhini para eskajtsï exenhaaka eskajtsï jukanchaska kuájpinhani para iámindu indeni no sési jásï ambe jingoni enga jatsika para úkuarhini, ka para eskajtsï méntku jauaka anhaxurhitini Uájpa Acheetirini japarini” (Lukasʌ 21:34-36). ¿Andisï xáni jukaparhakue úni ambe engajtsïni arhika Jesusi? Jimboka nóteru ióndani kʼamajkunhaakia Noambakitiri parhakpini. Solu imecha engaksï Jeoba ka Jesusi jaiapanhiantauaka tsípitiksï pakaraati ka irekaatiksï para méntkisï jimbanhi parhakpinirhu (Juanu 3:16; 2 Pedru 3:13).