1, 2. ¿Nanichi uá kuájchakukuarhini ini jurhiatikuecha jimbo?

ERANHASKA je eskajtsï xanharu ma jimbo niraxaka ka ma repentku auanda turhinturhinchentani. Piritakuechaksï xarharasïndi, charanchini ka uénasïndi uinhamu janini. Ísï jimbo, chájtsï jirinhasïnga lugari ma parajtsï kuájchakukuarhini. ¡Seguru eskajtsï sési pʼikuarherasïnga engajtsï exentajkia lugari ma para kuájchakukuarhini!

² Ini jurhiatikuecha jimbo, sánochi májkueni irekaxaka. Parhakpinirhu sánhani arhixati sánderu no sési jánhaskuarhini. Jamberijtsï cha kurhamarhikuarhijka: “¿Nanichi uá kuájchakukuarhini?”. Bibliaeri karari ma uandaspti: “Arhiaka Jeobani: ‘Tʼuri jindeska juchiti kuájchakukua ka juchiti uinhapikua, juchiti Tata Diosï engani ji mintsikajka’” (Salmo 91:2). Jo, Jeobajtsïni uáti jarhuatani juchari uandanhiatecha jingoni iásï ka aiachisïndijtsïni eskachi kánikua sési irekaaka sánderu orhepani.

3. ¿Ambechi jatsiski para úni parajtsïni Jeoba jarhuatani?

³ ¿Nénajtsïni kuájchakusïni Jeoba? Jeobajtsïni uáti jarhuatani orhepani uérakuni náki uéjki uandanhiata ma engachi jatsiaka. Ístu, kánikua sánderu uinhapisti ka eska náki uéjki kʼuiripu ma engajtsïni uékaaka no sési ambe úchini. Nájkirukachi iásï no sési jásï ambe nitamakuarhiaka, uákachi seguru jarhani eska Jeoba niáraaka sési peentani ini no sési jásï ambe. Biblia arhisïndi eskachi jatsiska para Tata “Diosïri xénchperakuarhu” jarhani (Judasʌ 21, TDU). Parakajtsïni Jeoba jarhuataaka orhepani uérakuani uandanhiatechani, jatsiskachi para seguirini jarhani imeri amigueni. Peru ¿ambechi jatsiski para úni?

4, 5. ¿Nénajtsïni xarhatachiskia Jeoba eskajtsïni xénchasïnga?

⁴ Parachi seguirini jarhani Jeobaeri amigueni, jatsiskachi para  kurhanguni eskajtsïni ima kánikua xénchasïnga. Eratsi je ambe enga xáni úkia Jeoba juchantsïni jimbo. Íntskustijtsïni ini Echerini enga xáni sési jáxeka, uánikua plantechaksï jarhasti ka sési járhati animalicha. Ístujtsïni íntskusti tʼirekua ambe enga kánikua áspika ka kánikua itsï. Ka Bibliani jimbo, Jeobajtsïni jorhendasti na enga arhinhajka ka na enga jásï Tata Diosï máeka. Joperu enga axaka imeri Uájpa Jesusini para juchantsïni jimbo uarhini, xarhatachestijtsïni eskajtsïni kánikua xénchasïnga (Juanu 3:16). Jesusiri uarhikua jimbo, uákachi kánikua sési irekani sánderu orhepani.

⁵ Jeoba uaxastastia Juramukua ma auandarhu. I juramukua no ióndani kʼamajkuati kómu nitamakua ambe ka Echerini paraisu ma úntaati, nani engachi para méntkisï irekaaka, tsípikua ka pínandikua jingoni (Salmo 37:29). Máteru ambe jimbo engajtsïni Jeoba xarhatachijka eskajtsïni xénchasïnga jindesti engajtsïni jorhendajka nénachi uá sánderu sési irekani. Ístujtsïni pʼímarhisïndi parachi kómarhini ka aiachisïndijtsïni eskajtsïni méntkisï kurhauaka. Eskachi na exejka, Jeobajtsïni mintsita jingoni xénchasïndi iáminduechani.

6. Engajtsï exejka na engaksïni xáni xénchajka Jeoba, ¿ambejtsï jatsiski para úni?

⁶ Engajtsï exejka ambe enga xáni úkia Jeoba chánksïni jimbo ka na engaksïni xáni xénchajka, ¿nájtsï pʼikuarherasïni? ¿No ísïski eskajtsï kánikua jukaparharasïnga ini ambe? Jiájkani, jatsiskajtsï para xarhatakuni. Xáni no sési enga ini jurhiatikuecha jimbo, sáno iámindu kʼuiripuechaksï méntku no sáni jukaparharajka ini ambe. Májkueni úkuarhispti Jesusiri jurhiatikuechani jimbo. Ma xanhari, Jesusi 10 kʼuiripuechani tsinaaspti engaksï lepra pʼamenchani japka, joperu solu májku diosmaiamukua arhispti (Lukasʌ 17:12-17). Juchachi uékasïnga ísïini eska ima achamasï ka méntkisï xarhatakuni Jeobani eskachi agradesidu jarhaska.

7. ¿Nénachi jatsiski para xénchani Jeobani?

⁷ Ístuchi jatsiska para xénchani Jeobani. Jesusi arhiaspti imeri chúxapatichani eskaksï jatsispka para xénchani Jeobani iámu  imecheri mintsita jingoni, tsípikua ka eratsekua jingoni (arhinta je Mateu 22:37). ¿Ambe arhikuekasïni i ambe?

8, 9. ¿Nénachi xarhatakusïni Jeobani eskachi xénchasïnga?

⁸ No solu uétarhisïndi uandani eskachi xénchasïnga Jeobani. Engachi xénchajka Jeobani iámu juchari mintsita jingoni, tsípikua ka eratsekua jingoni, juchari úkuecha jingonchi xarhataaka (Mateu 7:16-20). Biblia méntkumindu sési xarhatasïndi eska engachi xénchajka Tata Diosïni, kurhajchauakachi imeri juramukuechani. ¿Úkua jukaski i ambe? Nómbe, jimbokaksï Jeobaeri juramukuecha no úkua jukaska para kurhajchaani (arhinta je 1 Juanu 5:3).

⁹ Engachi kurhajchajka Jeobani, kánikuachi sési irekasïnga ka sési pʼikuarherani (Isaías 48:17, 18). Peru ¿ambejtsïni jarhuataa parachi seguirini jarhani Jeobaeri amigueni? Ju je exeni.

10. ¿Andichisï jatsi para seguirini jarhani Jeobaeri ambe jorhenguarhini?

¹⁰ ¿Nénajtsï niáraski cha Jeobaeri amigu úkuarhini? Engajtsï Bibliaeri ambe jorhenguarhika, niáraskajtsï sánderu sési míteni Jeobani ka imeri amigu úkuarhini. Jeobaeri amigueni, ísïsti komueska chpiri. Ísï eska chpiri na chkari uétarhinchajka para no patakuarhini, juchajtuchi jatsiska para seguirini jarhani Jeobaeri ambe jorhenguarhini parachi seguirini jarhani imeri amigueni (Proverbios 2:1-5).

11. ¿Nénaksïni pʼikuastaa ima ambe engajtsï Bibliarhu jorhenguarhiaka?

¹¹ Engajtsï seguirini jauaka Bibliaeri ambe jorhenguarhini, chájtsï niáraaka imani ambe míteni engaksïni mintsitarhu niárachiaka. Exe je na engaksï pʼikuarherapka tsimani Jesusiri chúxapaticha enga ima arhiapka ambe engaksï arhikuekenga máru profesiauecha. Imechaksï uandaspti: “Jimbochisï mintsitarhu tixanheni japka engajtsïni uandaxechepunguani japka, ka jimbojtsïnisï karakata jánhastapunguani japti ¡a no!” (Lukasʌ 24:32, TDU).

12, 13. a) ¿Ambe úpirini úkuarhini uékperakua jingoni engachi Jeobani jimbo pʼikuarherajka? b) ¿Ambechi uá úni parachi seguirini jarhani xénchani Jeobani?

 ¹² Ambe enga Jesusi jorhendaapka imeri tsimani chúxapatichani, mintsitarhu niárakuaspti. Jamberijtsï chájtu niárapka kánikua tsípini engajtsï uénapka kurhanguni Bibliani. Ini ambe jimbo, chájtsï úska míteni Jeobani ka niárani xénchani. Seguru eskajtsï no uékasïnga eska inde xénchperakua sánhani arhiaka kʼamakurhini (Mateu 24:12).

¹³ Iásï engajtsï cha Tata Diosïri amiguekia, uétarhisïndi eskajtsï jánguarhintaaka parajtsï seguirini jarhani sési pájperani imani jingoni. Parajtsï i ambe úni, jatsiskajtsï para seguirini jarhani Jeobaeri ka Jesusiri ambe jorhenguarhini. Ístu, jatsiskajtsï para eratsentani ambe engajtsï jorhenguarhijka ka nénajtsï uá úrani chári irekuarhu (Juanu 17:3). Engajtsï arhintaaka o Bibliaeri ambe jorhenguarhini, eratsenta je ambe engajtsï jorhenguarhijka Tata Diosïri ambe. Tátsekua, exe je nénaksïni jarhuataa ima ambe engajtsï jorhenguarhiaka parajtsï sánderu xénchani Jeobani (1 Timoteo 4:15).

14. ¿Nénajtsïni jarhuatasïni kómarhikua parachi seguirini jarhani kánikua xénchani Jeobani?

 ¹⁴ Engajtsï cha jatsika ambakiti amiguni ma, seguru eskajtsï someni uandontskuarheni jarhajka imani jingoni. I ambe úsïndi eskajtsï sési pájperaaka imani jingoni. Májkueni, seguirinchi jauaka kánikua xénchani Jeobani engachi someni kómarhini jauaka (arhinta je 1 Tesalonika 5:17). Úni kómarhini juchari Táti auandarhu anapuni, kʼéri intsïmperata máesti. Jatsiskachi para méntkisï mintsitarhu uératini uandajpani (Salmo 62:8). Nóchi jatsiska para memoria jimbo uáni kómarhikuechani, sino imani ambe uandani ambe engachi pʼikuarherajka. Engachi seguirini jauaka jorhenguarhini Bibliaeri ambe ka mintsita jingoni kómarhini, seguirinchi jauaka kánikua xénchani Jeobani.

15, 16. ¿Na xáni jukaparhakueski Tata Diosïri ambe aianhpini?

¹⁵ Parachi seguirini jarhani Jeobaeri amigueni, ístuchi jatsiska para aianguani máteruechani ambe engachi jakajkujka. Kʼéri kóntperata máesti para jucha Jeobaeri ambe aianguani máteruechani. Ka ístu, ánchikuarhita máesti enga Jesusi jurajkukuaka iámindu imeri ambakiti chúxapatichani. Ísï jimbo, iáminduechachi jatsiska para aianhpini Tata Diosïri Juramukueri ambe. ¿Uénaskijtsïa cha ísï úni? (Mateu 24:14; 28:19, 20).

¹⁶ Apostuli Pablu xáni jukaparharasïrendi aianhpikuani enga niárapka uandani eska kánikua “jukaparhakua” ambespka o tesoru ma (2 Korintu 4:7). Sánderu jukaparhakua ambe engajtsï cha uáka úni jindesti Jeobaeri ambe aianguani máteruechani ka ambe enga ima eratseni jaka úni. Aianhpini, jindesti ma ambe engajtsï uáka úni parajtsï Jeobani marhuakuni ka ima kánikua jukaparharasïndi ambe engajtsï újka imani jimbo (Ebreu 6:10). Engajtsï aianhpijka, chájtsï jarhuataasïnga máteruechani paraksï Tata Diosïri amigueni ka ístujtsï cha niárasïnga sánderu sési pájperani imani jingoni. Aianhpikua jimbo, chájtsï uáka irekani para méntkisï ka ístu imecha engaksïni kurhajchaaka (arhinta je 1 Timoteo 4:16). No ma ánchikuarhita jarhasti engaksïni uáka ini ambe íntskuni.

17. ¿Andisï xáni uétarhini jaki iápurisï sóntku aianhpini?

 ¹⁷ Kánikua uétarhixati iápurisï sóntku aianhpini. Biblia uandasïndi: ‘Aianhpi Diosïri uandakuani, ka jánguarhinta ísï úni’ (2 Timoteo 4:2). Kʼuiripuechaksï uétarhinchasïndi kurhaani ambakiti ambe Tata Diosïri Juramukueri ambe. Biblia uandasïndi: “¡Jeobaeri kʼéri jurhiatikua axuterku jarhastia! ¡Axuterku jarhastia ka sóntku jurhaxati!”. Nóteru ióndaatia kʼamakurhini ambe ma (Sofonías 1:14; Habacuc 2:3). Jo, no ióndani, Jeoba kʼamajkuati Satanasiri no sési jásï parhakpinini. Ante de i ambe úkuarhini, jatsiskachi para aianguani kʼuiripuechani parakaksï uáka erakuni Jeobani marhuakuni.

18. ¿Andichisï jatsi para kʼéri ambe arhini Jeobani máteruecha jingoni engaksï imani marhuakujka?

¹⁸ Jeoba uékasïndi eskachi Jesusiri chúxapaticha tánguarhintaaka parachi kʼéri ambe arhini. Biblia arhisïndi: “Jaue jirinhatsperantani modu nani engachi na uáka jarhuatperani parachi úni uékperani ka ambakiti ambe úni. Ka jaue no kueratani siemprini tánguarhini, ka no ísï úni komueska máru engaksï no pʼindejka tánguarhini, sino jaue uinhaperperantani jarhani máteru ka máteruni jingoni, ka sánderu iásï engachi exeni jaka eska juchari Tateeri jurhiatikua janoxamkia” (Ebreu 10:24, 25). Jatsiskachi para jánguarhintani iámindu tánguarhikuecharhu nirani. Jimachi úsïnga jarhuajperani ka uinhaperperantani.

19. ¿Ambejtsïni jarhuataa xénchaani erachichani ka pirenchichani?

¹⁹ Tánguarhikuecharhu, chájtsï ambakiti amiguechani exeantauaka. Imaksïni jarhuataati parajtsï marhuakuni Jeobani. Míteauakajtsï erachichani ka pirenchichani engaksï mámaru jásïka ka mámaru járhati pʼindekuechani jatsiani engaksï ístu jánguarhintani jaka Jeobani marhuakuni. Peru májkueni eska cha, imajtuksï kʼamanharhintstisti ka nóksï úsïndi iámindu ambe sési úni. Enga i ambe úkuarhiaka, listu ja je parajtsï puákuantaani (arhinta je Kolosasi 3:13, TDU). Ju je jánguarhintani méntkisï ambakiti ambe exeni erachicheri ka pirenchicheri ambe. I ambejtsïni jarhuataati parachi xénchaani ka parachi sánderu sési pájperani Jeobani jingoni.

20, 21. ¿Ambeski tsípikua enga meru tsípikueka?

²⁰ Jeoba uékasïndi eskaksï iámindu imeri amiguecha kánikua sési irekaaka. Biblia jorhentpisïndi eskachi sánderu orhepani ménderueni irekaakia, méntku no ísïuati eskachi iásï na irekani jaka.

²¹ Sánderu orhepani, nóchi solu 70 o 80 uéxurhintku irekaaka sino para méntkisï. Niáraakachi irekani para méntkisï paraisu ma jimbo enga kánikua sési jándeaka, jimachi nóteru méni pʼamenchaakia, pínandikua jingonchi irekaaka ka kánikua tsípikua jingoni. Ini ambesï Biblia arhijti eska jindeska tsípikua ma enga meru tsípikueka. Jeobajtsïni aiachisïndi eskajtsïni íntskuaka inde jásï tsípikuani, peruchi jucha jatsiska para kánikua jánguarhintani iásï parachi úni intsïnhani (1 Timoteo 6:12, 19).

22. a) ¿Nénachi uá intsïnhani tsípikuani enga meru tsípikueka? b) ¿Niáraachi intsïnhani tsípikua para méntkisï solu jimbokachi jucha xáni jánguarhintaaka?

²² ¿Nénachi uá intsïnhani tsípikuani enga meru tsípikueka? Jatsiskachi para ambarhati úkuechani uáni (1 Timoteo 6:18). I ambe arhikuekasïndi eskachi jatsiska para úni ambe engachi jorhenguarhijka Bibliarhu. Joperu parachi irekani para méntkisï, no jindesti ambe ma engachi niáraaka intsïnhani solu jimbokachi jucha xáni jánguarhintaska. Intsïmperakua máesti enga Jeoba íntsaajka imechani engaksï no méni jurajkujka imani, xarhatakuaparini imeri “kóntperata” o kʼéri uékperakua (Roma 5:15). Juchari Táti auandarhu anapu, mintsita jingoni uékasïndi íntsaani imeri marhuatspirichani ini xáni ambakiti intsïmperakuani.

23. ¿Andijtsïsï cha jatsi para uénania imani ambe úni enga sési jaka?

²³ Kurhamarhikuarhi je: “¿Ji ísï kómarhixaki Tata Diosïni eska ima na uéjka?”. Engajtsï exeaka eskajtsï jatsiska para mójtakuni máru ambe, jánguarhinta je sóntku ísï úni. Engachi mintsinharhijka Jeobani ka jánguarhintanchi úni ambe enga ima uéjka, imajtsïni niárasïndi kuájchakuni. Jeoba kuájchakuauati imechani engaksï sési marhuakuni jaka ini últimu  jurhiatikuechani jimbo enga xáni no sési jánhaskuarhini jaka. Ka sánderu orhepani, uáti eskachi Paraisurhu ma irekaaka para méntkisï, ísï eskajtsïni na aiachijka. Engajtsï cha uénaskia imani ambe úni enga sési jaka, uákajtsï irekani para méntkisï.