KAPITULU 12
¿Nénajtsï uá cha Tata Diosïri amigueni?
1, 2. ¿Néksï jindespti máru Jeobaeri amiguecha?
¿NÉNTSÏ erakupirini cha para chári amigueni? Seguru eska imani kʼuiripuni engajtsï jingoni sési pájperajka, enga ambakiti kʼuiripu máeka ka imani ambe úni engajtsï cha tsitijka.
2 Jeoba erakuasti máru kʼuiripuechani paraksï imeri amigueni. Por ejemplu, Abraani imeri amigu máespti (Isaías 41:8; Santiagu 2:23). Rei Dabidi, ístu Tata Diosïri amiguespti. Para Jeoba, Dabidi ambakiti kʼuiripu máespti (Ukuecha 13:22). Ka ístu, Jeoba ísï exesïrendi profeta Danielini komueska nema enga kánikua jukaparhakuepka (Daniel 9:23).
3. ¿Andiksïsï Abraani, Dabidi ka Danieli Jeobaeri amiguepi?
3 ¿Andiksïsï Abraani, Dabidi ka Danieli Jeobaeri amiguepi? Jeoba arhispti Abraanini: “Jimbokarini kurhajchaska ambe engani uandaka” (Génesis 22:18). Jeoba ima kʼuiripuecheri amiguesti engaksï kaxumbitiika ka engaksï kurhajchajka. Asta úsïndi amigueni kʼéri ireteri ma. Ima arhispti ireta Israelini: “Kurhajcha je juchiti uandakuani, ka ji jindeuaka chári Tata Diosï ka chájtsï jindeuaka juchiti ireta” (Jeremías 7:23). Májkueni, engajtsï cha uéjka Jeobaeri amigueni, jatsiskajtsï para kurhajchani.
JEOBA JARHUATAASÏNDI IMERI AMIGUECHANI
4, 5. ¿Néna jarhuataasïni Jeoba imeri amiguechani?
4 Enemigu uinhapitinchi ma jatsiska enga no uéjka eskachi Tata Diosïri amigueuaka. Perujtsïni Jeoba uékasïndi jarhuatani ka kuájchakuni (arhinta je Salmo 55:22). Biblia arhisïndi eska Jeoba mámaru ambe jirinhantasïnga “para uinhapikua xarhatakuani imechani engaksï iámu mintsita jingoni marhuakujka” (2 Crónicas 16:9). Salmo 32:8 jimbo, Jeoba aiakuasïndi imeri amiguechani eska íntsauaka jánhaskakua ka ambarhati konsejuechani.
5 Iámu mintsita jingonchi marhuakusïnga jimbokachi imeri amigueska ka nóchi jurajkusïnga nájkirukachi no sési nitamakuarhini jauaka. Májkuenchi mintsinharhisïnga Tata Diosïni eska Dabidi. Ima, ari ambe karaspti Jeobaeri ambe: “Jimboka ima juchiti jurhijkandani ladu jimbo jarhaska, nórini méni niáraati ambe ma manamanatantani” (Salmo 16:8; 63:8). ¿Ambe úsïni Satanasi parachi jucha no Jeobaeri amigueni?
SATANASI UANDAKUA AMBE JAUATAKUSÏNDI KʼUIRIPUNI
6. ¿Ambe uandasïni Satanasi kʼuiripuecheri ambe?
6 Kapitulu 11 jimbo, jorhenguarhiskachi eska Satanasi niáraspka sánderu kʼéri exekuarhini eska Jeoba ka uandani eska Tata Diosï chkuandera máeska. Ístu uandaspti eska no jurhimbitku úsïrenga ambe ma jimboka no jurajkuasïrenga eskaksï Adani ka Eba erakupiringa ambesï sési japi ka ambe nómbe. Jobueri libru, jorhendasïndijtsïni eska Satanasi ístu uandakua ambe jauatakuasïnga imechani engaksï uéjka Tata Diosïri amigueni. Noambakiti uandasïndi eskaksï kʼuiripuecha solu marhuakusïnga Tata Diosïni imani ambe jimbo enga ima íntsaajka, no jimbokaksï xénchasïnga. Ístu uandasïndi eska ima uáka úni paraka né uéjki niáraaka no kurhajchani Tata Diosïni. Ju je exeni ambechi uá jorhenguarhini Jobueri ambe ka mítenchi sini ima jurajkuspi Jeobani o nómbe.
7, 8. a) ¿Ambe eratsesïreni Jeoba, Jobueri ambe? b) ¿Ambe uandaspi Satanasi, Jobueri ambe?
7 ¿Néspi Jobu? Ambakiti achamasï máespti enga ma 3,600 uéxurhinikia enga irekapka. Jeoba uandaspti eska imani tiempuni jimbo, no nema jarhaspka ísï eska Jobu ixú Echerirhu. Jobu kánikua janhanharhisïrendi Jeobani ka kurhunhesïrendi no sési jásï ambeni (Job 1:8). Para Jeoba, Jobu ambakiti amigu máespti.
8 Satanasi uandaspti eska Jobu solu marhuakusïrenga Jeobani nomasi para sési nikuni. Noambakiti arhispti Jeobani: “¿Nóri niáraski tʼu imeri uirhipandani jimbo tsirindakua ma jatsikuni parari kuájchakuni, imeri kʼumanchikua jimbo ka iámindu ambe jimbo enga xáni jatsikuarheka? Újchakurasïngari ambe enga újka imeri jájkicha jingoni, ka imeri animalichaksï niárasti iápurisï jarhani. Peru iásï iójkurhanta chíti jájkini ka euanta iámindu ambe enga xáni jatsikuarhika, ka seguru eskakini no sési arhiaka tʼunguini eratiparini” (Job 1:10, 11).
9. ¿Ambe jurajkuspti Jeoba para úni Noambakiti?
9 Satanasi uandaspti eska Jobu solu marhuakusïrenga Jeobani imani ambe jimbojku enga íntskuenga. Uandaspti eska ima úpiringa úni eska Jobu nóteru marhuakupiringuia Jeobani. Nájkiruka Jeoba no jaiapanhintapka ambe enga uandapka Noambakiti, jurajkuspti eska tsʼéjkupiringa Jobuni. Ísï úpirindi xarharani sini Jobu uékperakua jimbosï marhuakueni Jeobani.
SATANASI NO SÉSI KÁMASÏNDI JOBUNI
10. a) ¿Ambe xáni úkuspti Satanasi Jobuni? b) Peru ¿ambe úspi Jobu?
10 Uénani jámani, Satanasi úspti eskaksï Jobuni sïpakuapiringa ma parti animalichani ka eskaksï máteruecha uarhipiringa. Tátsekua, úspti eskaksï sáno iámindu imeri jántspiricha uándikunhapiringa. Jobu iámindu ambe tsïtakuarhispti enga xáni jatsikuarhipka. Kʼamarhukuni jámani, Satanasi úspti eskaksï 10 Jobueri uájpecha uarhipiringa kʼéri tarhiata ma jimbo. Joperu Jobu no jurajkuspti Jeobani. Biblia uandasïndi eska nájkiruka Jobu ini ambe nitamanchani japka, no niáraspti kʼamanharhintskua ambe úni, ni no sési ambe uandani Tata Diosïri ambe (Job 1:12-19, 22).
Jeoba kóndentaspti Jobuni enga imeri amigu máepka ka no méni jurajkuni.
11. a) ¿Ambe máteru ambe úkuspi Satanasi, Jobuni? b) Peru ¿ambe úspi Jobu?
11 Satanasi no kuatantaspti. Ka arhispti Tata Diosïni: “Engari tʼu iójkurhantaska chíti jájkini ka no sési amberi úkuni imeri kuerpuni ka únichani, seguru eskakini no sési arhiaka tʼunguini eratiparini”. Jimajkani, Satanasi úspti eska Jobu no sési jásï pʼamenchakua ma pʼipiringa (Job 2:5, 7). Ka ménderu Jobu no jurajkuspti Jeobani. Uandaspti eska asta enga uarhipiringa no méni jurajkupiringa Tata Diosïni (Job 27:5).
12. ¿Néna xarhataspi Jobu eska Satanasi chkuandera máespka?
12 Jobu no ma ambe mítespti ambe enga xáni uandapka Satanasi ni andisï xáni kómu nitamani japi. Asta jamberi eratsespti eska Jeobasï axakuani japka iámindu imani tsʼéjkukuechani (Job 6:4; 16:11-14). Nájkiruka i ambe nitamanchani japka, Jobu no méni jurajkuspti Jeobani. Iásï kʼóru sési xarharasptia eska Jobu no imajku eratsekuarhisïrenga. Tata Diosïri amiguespti jimboka xénchasïrenga. Iámindu ambe enga Satanasi uandapka chkuanderakua ambespti.
13. ¿Ambe úkuarhispi enga Jobu ísï no jurajkupka Tata Diosïni?
13 Nájkiruka Jobu no mítepka ambe enga úkuarhini japka auandarhu, no méni jurajkuspti Tata Diosïni ka xarhataspti eska Satanasi no sési úri máeska. Jeoba kóntperatechani íntsaaspti Jobuni enga ísï ambakiti amigu máepka (Job 42:12-17).
SATANASI CHKUANDERAKUA AMBE UANDASÏNDI CHÁRI AMBE
14, 15. ¿Ambe uandasïni Satanasi eskaksï niáraaka úni iámindu kʼuiripuecha?
14 Jukaparhakua ambechi jorhenguarhisïnga ima amberi enga Jobu nitamanchapka. Iásï, Satanasi iámindu Tata Diosïri marhuatspirichani uandakua ambe jauatakuani jarhasïndi. Uandasïndi eskachi interesi jimbojku marhuakusïnga Tata Diosïni. Noambakiti uandaspti: “Iámindu ambe enga kʼuiripu jatsikuarhika, íntspiati para kuájpintani imeri tsípikuani” (Job 2:4). Jiájkani, Satanasi uandasïndi eska no solu Jobu interesi jimbojku marhuakusïrenga Tata Diosïni sino iámindu kʼuiripuecha. Uánikua uéxurhini ísï tátsekua enga Jobu uarhipkia, Satanasi seguirixapti no sési pʼikuastani Jeobani ka uandakua ambe jauatakuani imeri marhuatspirichani. Míteskachi ini ambe jimboka Proverbios 27:11 jimbo, Jeoba uandasïnga: “Mímixekua xarhata juchiti uátsï ka tsípera juchiti mintsitani, parani ji úni mókukuntani imani engarini tsʼiuekuarhichini jaka teresmarhukua jingoni”.
15 Chájtsï uáka erakuni Jeobani marhuakuni ka imeri ambakiti amigueni. Ísïjtsï xarhataaka eska Satanasi chkuandera máeska. Jamberijtsï jatsiaka para uánikua ambe mójtakuni na engajtsï irekani jaka parajtsï úni Tata Diosïri amigueni, peru i jindesti sánderu ambakiti ambe engajtsï erakuaka úni. Ka uétarhisïndi eskajtsï méntku no chketakuarhiaka. Satanasi uandasïndi eskajtsï cha niáraaka jurajkuni Tata Diosïni engajtsï uandanhiatechani jatsiauaka. Imajtsïni uékasïndi támisï jánhastani parachi jurajkuni Jeobani.
16. a) ¿Ambe xáni úrasïni Noambakiti paraka kʼuiripu nóteru marhuakuakia Jeobani? b) Chánksïni jimbo, ¿ambe úpirini úrani Noambakiti parajtsï nóteru marhuakunia Jeobani?
16 Satanasi uánikua ambe úrasïndi para úni eskachi jucha nóteru Jeobaeri amigueuakia. Ménisï ísï jámasïndi eska “leoni apejpiti ma” parajtsïni no sési ambe úchini (1 Pedru 5:8). Ísï jimbo, asï ísku pakara je engaksïni chári amiguecha, familiaricha o máteru kʼuiripuecha uékaaka ójkutani parajtsï cha nóteru jorhenguarhinia Bibliaeri ambe ni ambakiti ambe úni. Jamberijtsï cha ísï pʼikuarherajka enajkiksïni Noambakiti no sési ambe úchini jaki (Juanu 15:19, 20). * Ka ménisï, Noambakiti niárasïndi “ísï xarharani eska ma ánjeli enga eramarhandikuarhu anapueka”. Ísï jimbo, uékasïndijtsïni támisï jánhastani parachi no kurhajchani Jeobani (2 Korintu 11:14). Máteru ambe enga úrajka Noambakiti parachi nóteru marhuakunia Jeobani jindesti eskachi ísï eratseaka eskachi méntku no uáka sési marhuakuni Tata Diosïni (Proverbios 24:10).
JU JE ÚNI AMBE ENGA JEOBA JURAMUJKA
17. ¿Andichisï kurhajchajki Jeobani?
17 Engachi kurhajchajka Jeobani, xarhatasïngachi eska Satanasi chkuandera máeska. ¿Ambejtsïni jarhuataa parachi kurhandirani? Biblia arhisïndi: “Xénchakuarhi chíti Tata Diosï Jeobani iámu chíti mintsita jingoni, iámu chíti alma jingoni ka iámu chíti uinhapikua jingoni” (Deuteronomio 6:5). Kurhajchasïngachi Jeobani jimbokachi xénchasïnga. Engachi sánhani arhiaka sánderu xénchani, sánderuchi uékaaka úni ambe engajtsïni ima kurhachiaka. Apostuli Juanu karaspti: “Jimboka para Diosïni uékani, jindeska eskachi uáka eska imajtsïni na juramuchijka, ka no kʼuetsapiti ambesti engajtsïni ima juramuchijka” o sea, no úkua jukasti parachi ísï úni (1 Juanu 5:3).
18, 19. a) ¿Nákiksï jindeski máru ambe enga Jeoba uandajka eska no sési jarhaska? b) ¿Nénachi míteski eskajtsïni Jeoba no imani ambe kurhachesïnga engachi no uáka úni?
18 Jeoba uandasïndi eska jarhaska máru ambe enga no sési jaka. Exeantauakajtsï máru ejempluechani rekuadrurhu “ Kurhunhi je imani ambe enga Jeoba kurhunhijka”. Uénani jámani, jamberijtsï ísï exeaka eska máru i ambe no xáni no sési jarhaska. Peru engajtsï arhiantauaka Bibliaeri karakatechani ka eratseantaani, kurhanguakajtsï na enga xáni sési jaka úni ambe engajtsïni Tata Diosï juramuchijka. Ístujtsï jamberi kuenta íntskukuarhiaka eskajtsï jatsiska para mójtakuni máru ambe chári irekuarhu. I ambe uáti úkua jukani ménisï. Nájkiruka úkua jukaaka, engajtsï ísï uáka, pínandikuajtsï jatsiaka ka sési pʼikuarherani májkueni eskaksï Jeobaeri ambakiti amiguecha (Isaías 48:17, 18). ¿Nénachi míteski eskachi uáka mójtakurhini?
19 Jeobajtsïni no méni kurhachesïndi imani ambe engachi no uáka úni (Deuteronomio 30:11-14). Jeoba ambakiti amigu máesti ka sánderujtsïni sési mítesti ka eska jucha mismu. Mítesti ambe engachi sési újka ka ambe nómbe (Salmo 103:14). Apostuli Pablu arini ambe uandaspti enga uinhaperpintajka: “Diosï mintsinharhikuesti, ka nóksïni jurajkuati eskajtsï jukari tsʼéjkunhaaka sino xántku eskajtsï xáni uáka tekaantani, jimboka engajtsï tsʼéjkunhani jauaka, jimajkanimindu Diosïksïni jánhastaa[ti] nani engajtsï na uáka kuájpikuarhini” (1 Korintu 10:13). Uákachi mintsikani eskajtsïni Jeoba méntkisï jarhuataaka parachi ambakiti ambe úni. Ka íntskuatiksïni chánksïni “uinhapikua enga xáni kʼéri ambeka” parajtsï úni orhepani uérakuani uandanhiatechani (2 Korintu 4:7).
JU JE XÉNCHANI AMBE ENGA TATA DIOSÏ XÉNCHAJKA
20. ¿Náki ambakiti úkuechanchi jatsiski para terukukuntani Jeobani, ka andi?
20 Engachi uéjka Jeobaeri amigueni, nóchi solu jatsiska para nóteru únia imani ambe engajtsïni ima arhijka eska no sési jarhaska. Jatsiskachi para máteru ambe úni (Roma 12:9). Tata Diosïri amiguechaksï xénchasïndi ambe enga ima xénchajka. Májkuenksï jámasïndi eska ima ka niárasïndiksï “uékpini, ka tsípini, ka pínandikua jatsini, ka ióni tekaantani, ka sési kámpini, ka ambakini, para Diosïni mintsikani, ka kaxumbini, ka pʼíngukuarhini” (Galasia 5:22, 23). Parajtsï míteni na engaksï járhatiika Tata Diosïri amiguecha, arhinta je Salmo 15:1-5.
21. ¿Ambeksïni jarhuataa parajtsï xarhatani imani ambe enga Jeoba xénchajka?
21 ¿Ambeksïni jarhuataa parajtsï xarhataani ini ambakiti úkuechani? Jorhenguarhini ima amberi enga Jeoba xénchajka. Para ini ambe úni, pʼinde je arhintani ka jorhenguarhini Bibliaeri ambe (Isaías 30:20, 21). Engajtsï ísï uáka, sánhani arhiakajtsï sánderu xénchani Jeobani. Ka tátsekuajtsï uékaaka tsípikua jingoni kurhajchani.
22. ¿Ambe niáraa úkuarhini engachi kurhajchaska Jeobani?
22 Mójtakuni máru ambe juchari irekuarhu ísï terukuntasïndi komu morekuarhini pʼíntaparini imani xukuparhakua enga jiánguarhikia ka jimbanhi xukuparhakua ma jukantani. Biblia arhisïndi eskachi jatsiska para mójtakuani juchari no sési járhati úkuechani ka jimbanhi kʼuiripuchi máenia (Kolosasi 3:9, 10). Nájkiruka úkua jukaaka, Jeobajtsïni aiachisïndi eskajtsïni kʼéri kóntperata ma íntskuaka engachi mójtakurhiska ka kurhajchani (Salmo 19:11). Kurhajcha je Jeobani no jimbokajtsï kóntperata ma intsïnhaaka sánderu orhepani sino jimbokajtsï mintsita jingoni xénchasïnga. Engajtsï ísï uáka, chájtsï xarhataaka eska Satanasi chkuandera máeska ka niáraakajtsï Jeobaeri ambakiti amigu máeni.
^ párr. 16 I ambe no arhikuekasïndi eska Satanasi meru manataani jarhasïnga imani kʼuiripuechani engaksïni uéjka ójkutani chánksïni parajtsï Bibliaeri ambe jorhenguarhini. Peru Satanasi jindesti “diosï i parhakpiniri” ka Biblia arhisïndi eska interu parhakpini imeri jájki jimbo jarhaska. Jimbochisï no ísku pakarajka engaksï máru kʼuiripuecha uéjka úni eskachi nóteru marhuakuakia Jeobani (2 Korintu 4:4; 1 Juanu 5:19).
