1, 2. a) ¿Andichisï uandajki eska kómarhikua ambakiti intsïmperakua máeska? b) ¿Andisï jukaparhakue eskachi míteaka ambe uandasïni Biblia kómarhikueri ambe?

ECHERI kánikua sapichuesti engachi imani ambe jingoni terukutantaska ambe enga xáni kueraakata jaka auandarhu. Para Jeoba, iámindu kʼuiripuecha engaksï Echerirhu irekaka, ísïstiksï komueska gota ma itsïri (Salmo 115:15; Isaías 40:15). Nájkirukachi xáni sapichitu ambeka, Biblia uandasïndi: “Jeoba no iauani jarhasti imecha jingoni engaksï kómarhijka, iámindu imecha jingoni engaksï mintsita jingoni kómarhijka. Íntsaasïndi imechani engaksï janhanharhijka ambe engaksï uékajka; kurhaasïndi engaksï uinhachaparini jarhuajperata kurhajkuarhijka, ka pʼímutantaasïndi” (Salmo 145:18, 19). Kʼéri kóntperatachi ma jatsiska. Jeoba jindesti Tata Kuerajpiri enga iámindu ambe újka úni, ka uékasïndi juchari amigueni ka kurhauani juchari kómarhikuechani. Kómarhikua, ambakiti intsïmperakua máesti engajtsïni Jeoba íntskuka mándani arhini juchantsïni.

² Perujtsïni Jeoba solu jiáni kurhajchaati engachi ísï kómarhiska eska ima na uékajka. ¿Nénachi uá ísï úni? Ju je exeni ambejtsïni jorhendasïni Biblia kómarhikueri ambe.

3. ¿Andijtsïsï uá kómarhini Jeobani?

³ Jeoba uékasïndi eskajtsï cha kómarhiaka, eskajtsï uandontskuarheaka imani jingoni. ¿Nénachi míteski eska ísïska? Arhini pʼímarperakua jimbo engaksïni Tata Diosï úchijka ixú Filipusʌ 4:6, 7 (arhinta je). Ima enga méntku iámindu ambe Kueraaka, kánikuaksïni jukaparharasïndi ka uékasïndi eskajtsï aiangukuarhiaka ambe engajtsï pʼikuarherajka ka chári uandanhiatechani.

4. Engachi someni kómarhiska Jeobani, ¿nénachi pájperaa imani jingoni ka andi?

 ⁴ Kómarhikuajtsïni jarhuatasïndi parachi kánikua sési pájperani Jeoba jingoni. Engaksï tsimani amiguecha someni uandontskuarhejka ambe engaksï eratsejka, pʼikuarherani ka uandanhiani, sánderuksï sési pájperasïndi. Májkueni, Jeoba Bibliani úraparini, aiangustiksïni ambe enga eratsejka ka pʼikuarherani, ka arhistiksïni ambe enga uáka sánderu orhepani. Kómarhikua jimbo, chájtujtsï uáka aiangukuarhini Jeobani ambe engajtsï xáni pʼikuarhinhijka. Engajtsï someni kómarhiska, sánderujtsï sési pájperaaka imani jingoni (Santiagu 4:8).

5. ¿Nénachi míteski eska Jeoba no iámindu kómarhikuechani kurhauasïnga?

⁵ ¿Kurhauasïni Jeoba iámindu kómarhikuechani? Nómbe. Profeta Isaiasiri jurhiatikuechani jimbo, Jeoba arhiaspti israelitechani: “Nájkirukajtsï uánikua kómarhikuechani uájka, ji no kurhauasïnga; chári jájkichaksï iámu iurhiri jáxetixati” (Isaías 1:15). Engachi no jingontku jámaaka, uákachi úni ambe ma engachi  jimbo nóteru uákia sési pájperani Jeobani jingoni. Ísï úparini, ima nóteru kurhauauatia juchari kómarhikuechani.

6. a) ¿Andisï jukaparhakue mintsikani Tata Diosïni? b) ¿Nénachi xarhatasïni eskachi mintsikasïnga imani?

⁶ Engachi uéjka eska Jeoba kurhauaka juchari kómarhikuechani, jatsiskachi para mintsikani (Markusʌ 11:24). Apostuli Pablu uandaspti: “Enga nema no mintsikaska Diosïni, nómindu uáti jaiapanhitarantani, jimboka uétarhisïnga eska ima enga andarhientaaka Diosïni, jakajkuaka eska jarhaska Diosï ka eska ima jindeska enga premiu íntsauaka imechani engaksï jirinhantajka imani” (Ebreu 11:6). Peru no solu uétarhisïndi uandani eskachi mintsikasïnga. Jatsiskachi para xarhatani ini ambe pauani pauani kurhajchaparini Jeobani (arhinta je Santiagu 2:26).

7. a) ¿Andichisï jatsi para kaxumbitini ka janhanharhikua jingoni uandajpani Jeobani engachi kómarhiaka? b) ¿Nénachi xarhatasïni eskachi mintsitarhu uératini kómarhisïnga?

⁷ Engachi kómarhiaka Jeobani, jatsiskachi para kaxumbitini ka janhanharhikua jingoni uandajpani. ¿Andi? Engachi jatsipiringa para rei ma o juramuti ma jingoni uandontskuarheni, janhanharhikua jingonchi uandontskuarhekupiringa. Jiájkani, jimboka Jeoba jindeska Tata Diosï enga iámindu ambe újka úni, jatsiskachi para sánderu kaxumbikua ka janhanharhikua xarhatani engachi imani jingoni uandontskuarhiaka (Génesis 17:1; Salmo 138:6). Ístuchi jatsiska para iámindu ambe aiangukuarhini, mintsitarhu uératini, no méntku úndani mismu uandakuechani úraani méntkisï (Mateu 6:7, 8).

8. ¿Ambechi jatsiski para úni engachi kurhakuaka ambe ma Jeobani?

⁸ Últimu, engachi kurhakujka ambe ma Jeobani, jatsiskachi para jánguarhintani imani ambe úni engachi kurhakujka. Por ejemplu, jamberichi kurhakuaka eskajtsïni jarhuataaka parachi jatsini imani ambe engachi uétarhinchajka para irekani. Peruchi no jatsiska para xépini ka erokuarhini eskajtsïni Jeoba íntskuaka iámindu ambe. Engachi uáka ánchikuarhini parachi jatsini indeni ambe, ju je ísï úni ka jiókuarhini náki uéjki ánchikuarhita ma engachi uáka úni (Mateu 6:11; 2 Tesalonika 3:10). O engachi kurhakuaka eskajtsïni jarhuataaka parachi nóteru no sési jásï  ambe únia, ju je jánguarhintani no jimesïsï jarhani nani engachi úpiringa no sési jásï ambe úni (Kolosasi 3:5). Iásï, ju je exeani máru kurhamarhikuechani engaksï kʼuiripuecha úkuarhiajka kómarhikueri ambe.

9. a) ¿Nénchi jatsiski para kómarhini? b) ¿Ambejtsïni jorhendasïni Juanu 14:6 kómarhikueri ambe?

⁹ ¿Nénchi jatsiski para kómarhini? Jesusi jorhendaaspti imeri chúxapatichani eskaksï arisï kómarhipiringa: “Juchari Táti engari auandarhu jaka” (Mateu 6:9). Ísï jimbo, jatsiskachi para solu Jeobani kómarhini. Jesusi ístu uandaspti: “Jí jindeska xanharu, ka jí jindeska engani sési jimboeka, ka ístu jí jindeska tsípikua. Ka no nema jurhasïndi andarhierani Diosï Tátini enga no jíndeni jimbo” (Juanu 14:6). Jimajkani, jatsiskachi para solu Jeobani kómarhini Jesusiri nombri jimbo. ¿Ambe arhikuekasïni i ambe? Engachi uéjka eska Jeoba jiókuarhiauaka juchari kómarhikuechani, jatsiskachi para jukaparharani imani xáni ambakiti ánchikuarhitani enga Jeoba íntskuka Jesusini. Eskachi na jorhenguarhikia, Jesusi jurhasti Echerirhu parachi ma jurhiani niárani nóteru kʼamanharhintstinia ni uarhini (Juanu 3:16; Roma 5:12). Ístu, Jeoba, Jesusini erakusti para Kʼéri Saserdoti máeni ka Juesi (Juanu 5:22; Ebreu 6:20).

10. ¿Nénachi jatsiski para niárani engachi kómarhikua ma uáka?

¹⁰ ¿Nénachi jatsiski para niárani engachi kómarhikua ma uáka? Buenu, Jeoba no uandasïndi eskachi jatsiska para tinguixurhitini kómarhini, uaxakatini o anhandetini. Biblia jorhentpisïndi eskachi uáka kómarhini na engachi uékaaka niárani joperu janhanharhikua jingoni (1 Crónicas 17:16; Nehemías 8:6; Daniel 6:10; 1 Reyes 8:22, 23). Para Jeoba, no ima ambesï jukaparhakueti na engachi jauaka para kómarhini sino eskachi juchari mintsita jingoni uandontskuarhekuaka ka janhanharhikua jingoni. Uákachi kómarhini uandaparini o nómbe, nani uéjki engachi jauaka ka na uéjki jatini, jurhiakua o chúrikua. Engachi kómarhijka, uákachi seguru jarhani eskajtsïni Jeoba kurhaani  jarhasïnga nájkirukajtsïni kʼuiripuecha no kurhaani jauaka (Nehemías 2:1-6).

11. ¿Amberi ambechi uá kómarhini Jeobani?

¹¹ ¿Amberi ambechi uá kómarhini Jeobani? Ambe uéjki amberi enga Jeoba jaiapanhintaaka. Biblia arhisïndi: “Eska engachi kurhajkuarhiaka ma ambe eska ima na uékajka, imajtsïni kurhajchaaka” (1 Juanu 5:14). ¿Uáchi kómarhini Jeobani parachi aiangukuarini juchari ambe? Jo. Ísïchi jatsiska para uandontskuarheni Jeobani jingoni komueska ambakiti amigu ma jingoni. Uákachi aianguni iámindu ambe engachi eratsejka ka pʼikuarherani (Salmo 62:8). Ístuchi uáka kurhakuni eskajtsïni íntskuaka imeri espiritu santuni enga xáni uinhapitiika parajtsïni jarhuatani imani ambe úni enga sési jaka (Lukasʌ 11:13). Ístu, uétarhisïndi kurhakuni eskajtsïni íntskuaka jánhaskakua parachi ambakiti ambe erakuni úni ka uinhapikua parachi úni orhepani uérakuani uandanhiatechani (Santiagu 1:5). Ka jatsiskachi para kurhakuni eskajtsïni puáchintaaka juchari kʼamanharhintskuechani (Efesu 1:3, 7). Ístuchi jatsiska para máteruechani kómarhijpikuani, komu juchari familiani ka kúnguarhikuarhu anapu erachichani (Ukuecha 12:5; Kolosasi 4:12).

12. ¿Ambe jatsiski para sánderu jukaparhakueni juchari kómarhikuecharhu?

¹² ¿Ambe jatsiski para sánderu jukaparhakueni juchari kómarhikuecharhu? Jeoba ka eska úkuarhiaka ambe enga ima uékajka. Jatsiskachi para mintsita jingoni diosmaiamukua arhini Jeobani iámindu ambe jimbo enga xáni úka juchantsïni jimbo (1 Crónicas 29:10-13). Enga Jesusi jorhendaapka imeri chúxapatichani kómarhini Jeobani, xarhataspti ambe enga jatsika para sánderu jukaparhakueni juchari kómarhikuecharhu (arhinta je Mateu 6:9-13). Jesusi uandaspti eskachi orheta kurhajkuarhiaka eska Jeobaeri nombri pímbinhasïntaaka, o sea, eska pímbinhasï exenhaaka imeri nombri. Tátsekua Jesusi xarhataspti eskachi jatsiska para kurhajkuarhini eska juuaka Tata Diosïri Juramukua ka eska úkuarhiaka ambe enga ima uéjka iámu parhakpinirhu. Solu engachi na kómarhipiringuia ini ambe jimbo enga xáni jukaparhakueka, Jesusi uandaspti eskachi úpiringuia kurhajkuarhini ambe  engachi jucha uétarhinchajka. Engachi orheta peerajka Jeobani ka ambe enga ima uékajka eska úkuarhiaka jiáni engachi kómarhini jarhajka, xarhatasïngachi ambe enga sánderu jukaparhakueka para jucha.

13. ¿Náksï xáni jatsiski para kʼéni juchari kómarhikuecha?

¹³ ¿Náksï xáni jatsiski para kʼéni juchari kómarhikuecha? Biblia no uandasïndi na xáni. Kómarhikuechaksï uáti kʼérani o sapirhani, seguni ambe engachi uétarhinchani jauaka. Por ejemplu, uákachi sapichitu kómarhikua ma úni engachi tʼireni jámaaka,  joperu sánderu kʼéri kómarhikua ma engachi diosmaiamukua arhini jauaka Jeobani o engachi uandanhiata ma aiangukuarhini jauaka (1 Samuel 1:12, 15). Nóchi uékasïnga kʼérati kómarhikuechani uáni solu para máteru kʼuiripuechani ísku pakataani, ísï eskaksï máru kʼuiripuecha na uénga Jesusiri jurhiatikuecha jimbo (Lukasʌ 20:46, 47). I járhati kómarhikuechaksï no ísku pakatasïndi Jeobani. Ima uékasïndi eskachi mintsitarhu uératini kómarhiaka.

14. a) ¿Namuni xanharichi jatsiski para kómarhini Jeobani? b) ¿Ka ambejtsïni jorhendasïni Jeobaeri ambe?

¹⁴ ¿Namuni xanharichi jatsiski para kómarhini Jeobani? Jeobajtsïni pʼímarhisïndi parachi someni uandontskuarheni imani jingoni. Biblia arhisïndi “méntku jauena je kómarhini Diosïni” ka “méntkisï kómarhiparini” jáma je (Roma 12:12; 1 Tesalonika 5:17; Efesu 6:18). Jeoba méntkisï jingontku jarhasïndi parajtsïni kurhajchani. Pauani pauanchi uáka diosmaiamukua arhini imeri uékperakua jimbo ka engajtsïni xáni sési kámajka.  Ístuchi uáka kurhakuni eskajtsïni jarhuataaka, eskajtsïni íntskuaka imeri uinhapikua ka eskajtsïni sési pʼikuastantaaka. Engachi jukaparharaska kómarhikuani enga intsïmperakua máeka, méntkuchi uandontskuarheni jauaka Jeobani jingoni.

15. ¿Andichisï jatsi para uandani “eska ísï úkuarhiaka” engachi na kʼamaraakia kómarhikua ma úni?

¹⁵ ¿Andichisï jatsi para uandani “eska ísï úkuarhiaka” engachi na kʼamaraakia kómarhikua ma úni? Engachi ísï uandajka, xarhatasïngachi eskachi sési eratseska ambe engachi uandaka kómarhikuarhu, eska meru ísïska (Salmo 41:13). Ístu, Bibliajtsïni jorhendasïndi eska enga nema kʼamarajkia kómarhikua ma úni uánikuechani japarini, eska sési jarhaska parachi uandani “eska ísï úkuarhiaka”, iá sea uinhachaparini o nómbe. Engachi ísï újka, xarhatasïngachi eskachi jiókuarhixaka ambe enga xáni uandanhaka (1 Crónicas 16:36; 1 Korintu 14:16).

16. ¿Nénachi míteski eska Tata Diosï mókuantaasïnga juchari kómarhikuechani?

¹⁶ ¿Tata Diosï meru mókuantaasïni juchari kómarhikuechani? Jo. Biblia arhisïndi eska Tata Diosï kurhauasïnga juchari kómarhikuechani ka eskajtsïni mókuchiantasïnga (Salmo 65:2; Isaías 30:19). Jeoba kurhauasïndi uánikua kʼuiripuecheri kómarhikuechani engaksï mintsita jingoni uájka ka mámaru mókuantaasïndi.

17. ¿Jeoba néna úraasïni imeri ánjelichani ka imechani engaksï imani marhuakujka para mókuantaani juchari kómarhikuechani?

¹⁷ Jeoba ánjelichani úraasïndi ka imechani engaksï imani marhuakujka parajtsïni mókuchiantaani kómarhikuechani (Ebreu 1:13, 14). Uánikua kʼuiripuechaksï niárasti kómarhini Tata Diosïni paraka jarhuataapiringa Bibliani kurhanguni, ka ísï no ióni jimbo Jeobaeri testiguechaksï niárasti pʼorhembiani. I ambe xarhatasïndi eskaksï ánjelicha jarhuajpixaka paraka interu parhakpini jimbo aianhpinhaaka ambakiti ambe (arhinta je Jaŋaskuecha 14:6). Ístu, uánikua jucha niáraska kómarhini Jeobani jiáni engachi uandanhiata ambe jatsipka o jimbokachi uétarhinchaxapka  ambe ma ka kúnguarhikuarhu anapu erachijtsïni ma niárani jarhuatani (Proverbios 12:25; Santiagu 2:16).

18. ¿Jeoba néna úrasïni imeri espiritu santuni ka Bibliani parajtsïni mókuchiantaani kómarhikuechani?

¹⁸ Jeoba, ístu imeri espiritu santuni úrasïndi para mókuantaani kómarhikuechani. Engachi jarhuajperata kurhakujka parachi orhepani uérakuni uandanhiata ma, Tata Diosï uáti imeri espiritu santuni úrani parachi míteni ambe úni ka parajtsïni uinhaperantani (2 Korintu 4:7). Ístu, Jeoba Bibliani úrasïndi parajtsïni mókuchiantaani kómarhikuechani ka parajtsïni jarhuatani ambakiti ambe erakuni úni. Jamberi engachi arhintani jauaka Bibliani exeantauakachi karakatechani engajtsïni jarhuataaka. Jeoba ístu uáti eska nema tánguarhikuarhu imani ambe mókuntaaka engachi uétarhinchani jauaka kurhaani. Ka uáti úrani kúnguarhikuarhu anapu orhejtsïkutini ma parajtsïni exerani Bibliarhu anapu karakata ma (Galasia 6:1).

19. ¿Andisï ménisï úpirini ísï xarharani eska Jeoba no mókuantaasïnga juchari kómarhikuechani?

¹⁹ Joperu engachi ménisï ísï exeaka eskajtsïni Jeoba no mókuchiantaasïnga kómarhikuechani, ju je miáni eska ima míteska na jatini ka nénajtsïni mókuchiantaua. Jeoba sési mítesti ambe engachi uétarhinchajka. Peru jamberichi jatsiaka para seguirini jarhani kómarhini ma tiempu parachi xarhatakuni Jeobani eskachi kánikua jukaparharasïnga ambe engachi kurhajkuarhini jaka ka eskachi mintsikasïnga (Lukasʌ 11:5-10). Ménisï Jeoba no ísï mókuantaasïndi kómarhikuechani eskachi na erokuarhini jarhajka. Por ejemplu, jamberichi uáka kómarhini Jeobani kʼéri uandanhiata ma jimbo, perujtsïni ima no niárani kénditachini uandanhiatani, sinojtsïni uinhapikua íntskuni parachi úni orhepani uérakuni (arhinta je 2 Korintu 4:7).

20. ¿Andichisï jatsi para someni kómarhini Jeobani?

²⁰ Seguruchi jarhaskia jiájkani eska kómarhikua ambakiti intsïmperakua máeska engajtsïni Jeoba íntskuka. Uákachi kʼamakʼamasï mintsikani eskajtsïni ima kurhaasïnga (Salmo 145:18). Ka engachi sánderu mintsitarhu uératini kómarhiska, sánderuchi sési pájperaaka Jeobani jingoni.