EXE ambe enga úkuarheni jaka ixú. Adani ka Eba petanhantaxatiksï sési jándekuarhu. ¿Mítiskiri andi?

Jimbokaksï Adani ka Eba, úspkaksï ambe ma enga kánikua no sési japka. Ka ísï jimbosï Jeoba petaantani jati sési jándekuarhu uératini. ¿Mítiskiri ambeksï úspi?

Úsptiksï ambe ma enga Tata Diosï arhiapka eskaksï no úpiringa. Tata Diosï arhiaspti eskaksï úpiringa arhani iámindu jásï frutani. Joperu jarhaspti anhatapu ma enga Tata Diosïripka, ka imani anhatapueri frutani arhiaspti eskaksï no apiringa jimbokaksï uarhipiringa, ka jucha mítiska eska kánikua no sésiska para pʼárhitspini ambe ma enga no juchariuaka, ¿no ísïski? Jimajkani, ¿ambe úkuarhispi?

Ma jurhiatikua, Eba jandiajku jámaxapti sési jándekuarhu, ka jima uandontskuarhikuspti akuitsi ma, ¡exe!, arhispti eska apiringa imani frutani enga Tata Diosï arhiapka eskaksï no apiringa. Enga Jeoba kueraapka akuitsichani no kuerauaspti parakaksï uandapiringa. Ísï jimbo, japti nema enga uandarani japka akuitsini. ¿Néspi enga ísï úni japka?

Miánta eska Tata Diosï, ánjilichani orheta kuerauaspka ka tátsekua Echerini. Jucha no úsïnga exeani ánjilichani. Ísï jimbo ima enga uandarani japka akuitsini no Adanispti sino ánjili ma. Inde ánjili úndaspti kʼéri exekuarhini ka uékasïrendi ísï juramukua jatsini eska Tata Diosï. Uékasïrendi eska kʼuiripuecha imani kurhajchapiringa ka no Jeobani.

Inde ánjili chikuanderakuspti Ebani. Enga arhipka, eska ima májkuenipiringa eska Tata Diosï enga apiringa frutani, Eba jakajkuspti. Ísï jimbo, arhaspti ka Adanijtu májkueni úspti. Adani ka Eba nóksï kurhajchaspti Tata Diosïni, ka ísï jimbosïksï petanhantapti sési jándekuarhu uératini.

Joperu niárati jurhiatikua enga Tata Diosï xantskantaka Parhakpinini ísï eska na jándepka Edenirhu. Joperu tátsekuachi exeaka nénari uá tʼu jarhuajpeni sési jántskantani Echerini. Iásï ju exeni ambe úkuarhespi Adani ka Ebani jingoni.