JESUSI ambakerantasïndi pʼamenchatichani iámindu paisi jimbo enga xáni jámajka. I milagruecha niárasïndiksï mítikuarhini iretecharhu engaksï jimesïsï jaka. Jimboksïsï paajti mangusïchani, sieguechani, kándichani ka uánikua máteru pʼamenchatichani. Ka Jesusi iáminduechani ambakeraantasïndi.

Jukari tanimu uéxurhini nitamastia enga Juanu itsï atapka Jesusini. Ka Jesusi arhiasïndi imeri apostulichani eska no ióni jimbo Jerusaleni niuaka, ka eskaksï jima uándikuaka ka eska tsíntaka. Peru ante de i ambe úkuarhini, Jesusi seguirisïndi pʼamenchatichani tsinaani.

Ma uelta Jesusi jorhentpixapti sábadu. I jurhiatikua, judiuechaksï mintsikuarhisïndi. Uarhiti engari ixú exejka, 18 uéxurhini jarhasti kʼurhukuarhitini, ka no úsïrendi jurhimbintani. Jimbosï Jesusi pʼárhijti ka ima jurhimbintasïndi. ¡Ka ambakintastia!

I ambe, kánikua ikiataasïndi religionirhu anapu orhejtsïkutichani. Ma uinhachasïndi ka arhiasïndi kʼuiripuechani: ‘Seisi jurhiatikua jarhasti para ánchikuarhini’. ‘¡Ka indeksï jurhiatikua jindesti para tsinakuarhini, no sábadu!’

Peru Jesusi arhiasïndi: ‘¡No sési úricha! Chájtsï sábadu jurhiatikua kueratapiringa chári burruni parajtsï itsïmatani. Jiájkani, ¿no sési japirini tsinani ini uarhitini enga 18 uéxurhini pʼamenchakia?’. I ambe kʼuratsetaasïndi i no sési úrichani.

Tátsekua Jesusi ka imeri apostulicha, nirasïndiksï Jerusaleni. Engaksï niárani jarhajkia Jeriko, tsimani kʼuiripuecha engaksï no éskajka ka engaksï tumina kurhajkuarhijka, uinhachakusïndiksï: ‘Jesusi, jarhuatajtsïni’.

Jesusi uandajpaasïndi ka arhiasïndi: ‘¿Ambejtsï uékasïni eskaksïni úchiaka?’. Imaksï arhisïndi: ‘Tata, eskachi uáka éskani’. Jesusi pʼánharhikuasïndi, ¡ka imaksï jirejiresï éskantasïndi! ¿Mítiskiri andisï Jesusi uájki ini milagruechani? Jimboka uékaasïnga kʼuiripuechani ka uékasïndi eskaksï jakajkuaka imani. I ambejtsïni xarhatachisïndi eska, enga Jesusi juramuni jauakia nóteru nema pʼamenchakia.