IÁSÏ juebesï chúrikuestia, nitamastia tsimani jurhiatikua. Jesusi ka imeri 12 apostulicha ini kʼéri kuartuni jimboksï jarhasti enga iótakuarhu jaka paraksï arhani Paskuarhu anapu senani. Inde enga uérani jaka, Judasï Iskariotisti. Niraxati arhiani saserdotichani nénaksï jupika Jesusini.

Ma jurhiatikua antesi, Judasï uandontskuarhikuasti saserdotichani ka arhiasti: ‘¿Ambejtsïni íntskua engaksïni jarhuataska jupikani Jesusini?ʼ. Imechaksï arhisti: ‘Treinta tumina plateriʼ. Judasï iásï niraxati imechani jingoni para paani Jesusini jingoni. ¡Xáni no sési jásï ambe! ¿No ísïski?

Kʼamakusïndiksï arhani paskuarhu anapu senani. Ka Jesusi uénasïndi máteru sena enga kánikua jukaparhakueka. Íntsaasïndi imeri apostulichani kurhinda ma ka arhiasïndi: ‘A je, jimboka i arhikuekasïnga juchiti kuerpu enga chánksïni jimbo íntskunhakaʼ. Tátsekua jupikasïndi basu ma binu jingoni ka arhiasïndi: ‘Itsïma je, jimboka i arhikuekasïnga juchiti iurhiri enga chánksïni jimbo tsïtanhakaʼ. Biblia arhisïndi i senani ‘Ultimu senaʼ.

Israelitechaksï arhasïrendi Paskuarhu anapu senani paraksï miántani jiáni enga Tata Diosïri ánjili ‘no niárapkaʼ imecheri kʼumanchikuecharhu jini Ejiptu ka enga kʼóru uándikupka orheta uájpani enga ejipsiuecheri kʼumanchikuecharhu irekapka. Peru iásï Jesusi uékasïndi eska imeri chúxapaticha Jesusinksï miántaaka, ka eska imecha jimbo uarhiska. Ka para i ambesti i sena enga mándani uéxurhini úkuarhijka.

Engaksï na úpkia Ultimu Senani, Jesusi arhiasïndi imeri apostulichani eskaksï no chéaka ka eska uinhapiaka imecheri jakajkukua. Kʼamarukusïndiksï pirekuparini Tata Diosïni ka uéntasïndiksï jima. Jamberi jukari terojkani chúriptia. ¿Naniksï nirasïni?