¿MÍTISKIRI néski enga kuarhatsetini jaka? Sauluesti. Indesï exeani japti imecheri xukuparhakuechani engaksï Estebanini tsakapkuerapka. ¡Exe lusini enga tʼíntskani jaka! ¿Ambe úkuarhixaki?

Enga Estebani uarhijkia, Saulu nirasïndi jirinhaani Jesusiri chúxapatichani para no sési kaani. Petaasïndi kʼumanchikuecharhu ka paasïndi ónhaani. Uánikuaksï nirasïndi sïpakuarhini máteru iretecharhisï ka jimaksï eianhpesïndi “ambakiti eianhperakuani”. Peru Saulu nirasïndi jirinhani Jesusiri chúxapatichani máteru iretecharhisï. Iásï Damasku niraxati. Peru xanharu jimbo i ambe úkuarhisïndi:

Repentku lusi ma auandarhu uératini tʼíretasïndi Sauluni. Ima kuarhatsesïndi, ísï eskari na exejka ixú. Jiájkani uandakua ma arhisïndi: ‘¡Saulu, Saulu! ¿Andisïrini no sési kámajki?’. Achaaticha engaksï Sauluni jingoni jaka exesïndiksï lusini ka kurhaasïndiksï ambe ma, peruksï no kurhangusïndi ambesï uandajki.

Saulu arhisïndi: ‘¿Néskiri, Tata?’.

Ka uandakua arhisïndi: ‘Ji Jesusiska, imani engari no sési kámajka’. Jesusi i ambe uandasïndi jimboka enga Saulu no sési kájka imeri chúxapatichani, ísïsti eska Jesusini no sési kámani.

Saulu kurhamarhisïndi: ‘¿Ambe uá, Tata?’.

Jesusi arhisïndi: ‘Jauara ka inchaaku Damasku’. ‘Jiminiri arhinhaka amberi jatsiski para úni.’ Enga Saulu jauarajka, ka enga mítaajka éskuechani no úsïndi exeni. ¡Siegu pakarasti! Jimbosïksï achaaticha engaksï imani jingoni jámajka, jupijkutinksï pájti Damasku.

Iásï Jesusi uandajpasïndi jorhenguarhitini ma enga Damasku jaka ka arhisïndi: ‘Jauara Ananiasi, ni imani xanharu jimbo enga Rekta arhinhajka. Ka Judasïri kʼumanchikuarhu, kurhanguarhi Sauluni jimbo. Ji, imani erakuska paraka juchiti ambakiti jántspiri máeuaka’.

Ananiasi ísï úsïndi. Enga exejka Sauluni, pʼájtsïkusïndi ka arhisïndi: ‘Tatarini axasti parari úni éskantani, ka parari espiritu santu intsïnhani’. Jirejiresï uekorhisïndi imeri éskuecharhu ambe ma enga ísïpka eska kurucheri tinimu ka éskantasïndi ménderu.

Saulu kánikua marhuasïndi para nirani eianhpini máteru nasionicharhu. Ka ísïksï mítisïndi eska apostuli Pablu, ka uánikua ambechi jorhenguarhiaka inderi ambe. Peru orheta ju exeni Tata Diosï ambe úrasïni Pedruni.