NITAMASÏNDIKSÏ jurhiatikuecha, ka Jesusi mémindu xarhakuasïndi imeri chúxapatichani. Ma uelta xarhakuasti 500 ísï jorhenguarhitichani. ¿Mítiskiri ambe aianguasïni enga xarhakuajka? Tata Diosïri juramukueri ambe. Jeoba axasti Jesusini Echerirhu para Juramukueri ambe jorhentpini. Ka seguirisïndi i ambe úni enga tsíntajkia.

¿Miásïniri ambeski Tata Diosïri juramukua? Sési jimbo Tata Diosïri gobiernu máesti enga auandarhu jaka, ka Tata Diosï, Jesusini erakusti para juramutini. ¡Eskachi na exekia, Jesusi uánikuechani tʼireraasti, tsinasti pʼamenchatichani, ka tsítantasti uarhirichani, iámindu i ambe xarhatasïndi eska ambakiti juramuti máeuaka!

Ísï jimbo, enga Jesusi juramuni jauakia mili uéxurhini, ¿ambe úkuarhia Echerirhu? Jo, iámindu Parhakpini sési jándentaati. Nóteru jauatia uarhiperakuecha ni uándikperakuecha, pʼamenchakuecha, ka ni uarhikua. Mítiskachi eska ísïuaka, jimboka Tata Diosï úska Echerini para kʼuiripuecha sési jándikua ma jimbo irekani. Jimbosï úpti jardini Edenini. Ka Jesusi uáti eska iásï kʼóru úkuarhiaka ambe enga Tata Diosï uékajka.

Ka niárastia jurhiatikua para Jesusi auandarhu níntani. Kuarenta jurhiatikua xarhakuastia jorhenguarhitichani ka imaksï mítistia eska tsípiti jarhaska. Peru ante de karhanchintani, arhiasïndi: ‘Ixú pakara je Jerusaleni astakajtsï espiritu santu intsïnhakaʼ. Espiritu santu, Tata Diosïri uinhapikuesti, ísï eska tarhiata ambe, ka i jarhuatauati paraksï úni ambe enga Tata Diosï uékajka. Ístu Jesusi arhiasïndi: ‘Chájtsï juchiti ambe uandantaka iámu Parhakpinirhuʼ.

Peru enga i ambe arhiajka, úkuarhisïndi ambe ma. Jesusi úndasïndi auandarhu karhanchintani, eskari na újka exeni ixú. Tátsekua, nubi ma ójchakurasïndi ka jorhenguarhitichaksï nóteru úsïndia exeni. Jesusi níntasïndi auandarhu ka jini uératini úndasïndi juramukuani imeri chúxapatichani ixú Echerirhu.