¡EXE, barku ipimexati! ¡Xerekuarhintaxati! ¿Exeasïniri kʼuiripuechani itsïrhu? Máruksï andantaxatiia plaiarhu. ¿Jimini jarhaski Pablu? Ju exeni néna nitamakuarhexaki.

Miánta, Pablunksï tsimani uéxurhini jatsisïndi ónhakata Sesarea. Tátsekua Pabluni ka máteruechani engaksï ónhakata japka, jatsiraasïndiksï barkurhu paraksï Roma pánhani. Isla de Kreta ísï niárapani, kʼéri ma janikua jurhasïndi tarhiata jingoni. Ka nóteruksï úsïndia sési páni barkuni. Nóteruksï úsïndia exeni Jurhiatani ka ni jóskuechani chúrikua. Uánikua jurhiatikua tátsekua, iáminduecha engaksï jima nirani japka eratsisïndiksï eskaksï nóteru tsípiti pakaraka.

Pablu jauarasïndi ka uandasïndi: ‘No nema uarhiati; barkujku tsïnchiati. Jimbokarini Tata Diosïri ánjili ma arhiska: “¡Asï ché, Pablu! Jatsiskari parari Sésariri japarini jarhani enga Roma juramujka. Ka Tata Diosï kuájpiantauati iáminduechani engaksï tʼungini jingoni nirani jaka”’.

¡Katorse jurhiatikuaksï páxaptia desdeka uénapka janini, jiáni terojkani chúri ísï, marineruechaksï exesïndi eska mari no káni jauameska! Chésïndiksï eska barku uátatakuarheaka tsakapu ma jingoni, ísï jimbo, kʼuanimaasïndiksï anklechani. Pauandikua exesïndiksï plaiani ma. Ka jámasïndiksï páni barkuni indeni plaiani jimbo.

Peru engaksï niárani jarhajkia plaiarhu, barku uátatakuarhesïndi kutsarirhu ka jima anhaxurhisïndi. Jiájkani olechaksï uénasïndi barkurhu uátatakuarheni ka barku úndasïndi xerekuarhintani. Ma sondaduecheri juramuti uandasïndi: ‘Iáminduecha engaksï uáka xarhiani, xarhia je asta plaiarhu jamberi; máteruecha tátsekua kʼuanikuri je ka úraa je barkurhu anapu ambe parajtsï no ipimeni’. I ambeksï úsïndi, ka 276 kʼuiripuecha engaksï barkurhu nirani japka sésiksï niárasïndi plaiarhu, ísï eska na uandapka ánjili.

Isla, Malta arhinhasïndi. Ka jima anapu kʼuiripu sésiksï kámpisïndi ka jarhuaatasïndiksï iáminduechani engaksï barkurhu nirani japka. Enga nóteru janini jarhajkia, Pablunksï jatsirasïndi máteru barku jimbo ka Romaksï pásïndi.