UÁNIKUA ireta Kanaani anapuechaksï jingontku jarhastia paraksï uarhiperani Israelini jingoni. Jakajkusïndiksï eskaksï uáka andani. Peru Gabaoni anapuecha nóksï ísï jakajkusïndi. Imechaksï jakajkusïndi eska Tata Diosï jarhuaataxaka israelitechani, ka nóksï uékasïndi Tata Diosïni jingoni uarhiperani. Ísï jimbo, ¿mítiskiri ambeksï úsïni gabaonitecha?

Úsïndiksï ambe ma paraksï xarhatani eskaksï iauani uératini jurhasïnga. Ísï jimbo, máruksï xukuparhakua karukarupasï jukantasïndiksï ka kuarhachichani engaksï karukurikia. Ka kostali tererichani jatsiparakuasïndiksï imecheri burruechani ka kurhinda kʼarhiri pásïndiksï. Jimajkani nirasïndiksï Josueni jingoni ka arhisïndiksï: ‘Iauani uératinchi jurhaska, jimbokachi kurhanderaska chári kʼéri Tata Diosï Jeobaeri ambe. Kurhanderaskachi ambe enga úka chánksïni jimbo jini Ejiptu. Ísï jimbo, juchari ireteri orhejtsïkuticha, arhistijtsïni eskachi tʼirekua jatsirapiringa parachi juákuarheni ka eskaksïni jupiringa arhini: “Jucha jindeska chári ánchikuarhiricha. Aiachijtsïni je eskajtsï no uarhiperaka juchantsïni jingoni”. Uákajtsï exeni na enga jucha kʼamarhekuarikia takusïni ka kurhinda kʼarhistia jimbokachi iauani uératini jurhaskaʼ.

Josue ka máteruecha engaksï orhejtsïkujka iretani jakajkukuasïndiksï gabaonitechani. Ísï jimbo, aiakuasïndiksï eskaksï no uarhiperaka imechani jingoni. Peru tanimu jurhiatikua tátsekua mítisïndiksï eska gabaonitecha jimajkuksï no iauani irekaska.

Josue kurhamarhiasïndi: ‘¿Andijtsïnisï arhi eskajtsï iauani uératini jurhaspka?ʼ.

Gabaonitechaksï mókukusïndi: ‘Jimbokachi eiangunhaska eska chári Tata Diosï Jeoba, aiacheskaksïni iámu echerichani engaksï Kanaani anapueka. Ísï jimbo, chésïrengachi eskajtsïni uándikupiringaʼ. Peru israelitecha úsïndiksï ísï eskaksï na aiakuapkia gabaonitechani, ka nóksï uándikuasïndi. Sánderu sési, úsïndiksï eskaksï imecheri ánchikuarhiricheuaka.

Juramuti Jerusaleni anapu kánikua ikiasïndi jimbokaksï gabaonitecha sési pájperasïnga israelitechani jingoni. Ísï jimbo, arhiasïndi máteru tʼámu juramutichani: ‘Ju je, ka jarhuatajtsïni je uarhiperani Gabaonini jingoniʼ. Ka ísïksï úsïndi inde iúmu juramuticha. ¿Jánhaskakuaksï xarhataspi gabaonitecha engaksï jirinhapka sési pájperani Israelini jingoni, jimbokaksï iásï i juramuticha jurhaxakaksïa uarhiperani ichani jingoni? Ju exeni.