¡EXE ambe enga inchaskuni jaka inde achati inderi kʼumanchikuarhu! Sési jásï xukuparhakua ma, ka ma barra orueri ka ístu máteru ambe enga platerika. I ambe Jeriko uératini juaasti. Peru, ¿ambeksï jatsispi para úni inde ambe jingoni engaksï Jeriko anapueka? ¿Miásïniri?

Jatsisptiksï para kʼamajkuni, ka oru ka plata jindepirindi para tesoru enga Jeobaeri tabernakulurhu japka. Ísï jimbo, íksï kʼuiripuecha nóksï kurhajchasti Tata Diosïni. Sïpastiksï ambe enga Tata Diosïrika. Inde achati arhinhasïndi Akani, ka indecha engaksï indeni jingoni jaka familiembestiksï. Ju exeni ambe úkuarhiski.

Enga Akani sïpapka ini ambe, tátsekua Josue axasïndi achatichani máru paraksï uarhiperani ireta Aini jingoni. Peruksï no andasïndi. Máruksï uarhisïndi, ka máteruechaksï sïpakuarhisïndi. Josue iásï kánikua kómu pʼikuarherasïndi. Tʼénksatasïndi éjpuni, ka kómarhiparini arhisïndi Jeobani: ‘¿Andisïri jurajkujki eska i ambe úkuarheaka?’.

Jeoba mókukusïndi: ‘¡Jauara! Israeli pekadu ústi. Jupikastiksï ambe ma enga jatsipka para kʼamajkunhani o enga jindepiringa para Tata Diosïri tabernakulu. Sïpastiksï sési jásï ma xukuparhakua ka nóksï uandantasti. Engajtsï no kʼamajkuska sési jásï xukuparhakuani ka imani enga jupikaka ini ambe, nóksïni újchakuraka’. Jeoba uandasïndi eska xarhatakuaka Josueni néski ima achati no sési úri.

Ísï jimbo, Josue taantasïndi iámindu iretani, ka Jeoba xarhatasïndi achati no sési úri Akanini. Akani uandasïndi: ‘Ji pekadu úska. Sési jásï ma xukuparhakua exeska, ka barra oruerini ka máru ambe enga platerika. Xáni tsitiaska engani jamberi pákuarhiaka. I ambe uákajtsï exentani juchiti kʼumanchikuarhu, jimaksï inchaskukata jarhastiʼ.

Engaksï exentajkia ini ambe ka engaksï juákujkia Josueni, ima arhisïndi Akanini: ‘¿Andijtsïnisï i uandanhiata ambe juáchi? ¡Iásï Jeoba tʼungini kʼuanhaskuchentati!ʼ. Jiájkani iámindu kʼuiripu tsakapkuerasïndiksï Akanini ka imeri familiani astakaksï uándikuajka. ¿Nójtsïni xarhatachisïni i ambe eskachi no jatsiska para páni ambe ma enga no juchariuaka?

Tátsekua Israeli ménderu nirasïndi uarhiperani ireta Aini jingoni. Iásï kʼóru Jeoba jarhuatasïndi imeri iretani, ka imaksï andasïndi uarhiperakuani.