¡EXE! ¡Israelitechaksï parhikuxati iorhekua Jordanini! Peru, ¿nani niraski itsï? Jimboka imani jurhiatikuechani jimbo kánikua janisïnga, sánititu antesi kánikua itsï iorhexapti. ¡Peru iásï nóteru iorhexatia! ¡Ka israelitechaksï parhikuxati kʼarhindekuarhu, ísï eskaksï na úpka mari Charhapitirhu! ¿Nani niraski iámu itsï? Ju exeni.

Enga niárapkia jurhiatikua parakaksï israelitecha parhikupiringa iorhekua Jordanini, Jeoba úspti eska Josue i ambe arhipiringa iretani: ‘Saserdotichaksï jatsisti para arka pakatperakuerini juchari orhepatinksï páni. Ka engaksï inde atastaaka iorhekua Jordanirhu, itsï anhaxurhiati’.

Ísï jimbo, saserdotichaksï tarhatasïndi arka pakatperakuerini ka orhekuapasïndiksï iáminduechani. Engaksï niárajka Jordanirhu, saserdotichaksï inchamisïndi itsïrhu. Iorhekua uinhamu niraxati ka jauamesti. ¡Peru engaksï imecha na atastajka itsïrhu, itsï sóntku úndasïndi anhaxurhini! ¡Milagru máesti! ¡Iorhekua kʼarhisti! Jeoba pʼínguxati itsïni.

Saserdoticha engaksï páni japka arka pakatperakuerini, niárasïndiksï iorhekuarhu terojkani jima enga kʼarindeka. ¿Exeasïniri íchani dibujurhu? ¡Engaksï ícha jima jarhajkia, iámindu israelitechaksï uénasïndi parhikuni Jordanirhu echeri kʼarhindekua jimbo!

Engaksï iámindu parhikujkia, Jeoba úsïndi eska Josue arhiauaka iásï 12 achati uinhapitichani: ‘Cha, ni je iorhekuarhu jima engaksï ima saserdoticha jaka arka pakatperakuerini jingoni. Tarhatauakajtsï 12 tsakapuechani, ka jimajtsï jatsiauaka nani engajtsï pakaraka i chúrekua. Ísï sánderu orhepatini, engaksïni chári uájpecha kurhamarhiaka ambeksï arhikuekasïni inde tsakapuecha, chajtsï arhiauaka eska ixú itsï anhaxurhispka jiájkani enga Tata Diosïri arka pakatperakueri parhikupka Jordanirhu. ¡Tsakapuechaksïni miátantati i milagruni!ʼ. Josuejtu 12 tsakapuechani tarhataasïndi, jima uératini engaksï saserdoticha japka iorhekuarhu.

Iásï, Josue ménderu arhiasïndi saserdotichani engaksï arka pakatperakuerini páni jaka: ‘Parhiku je Jordanini’. Engaksï ísï újkia, itsï ménderu uénasïndi iorheni.