ÍKSÏ achaticha engari tʼu ixú exeani jaka, afuersaksï ánchitarhaaxati kʼuiripuechani. ¡Exe indeni enga latigu ma jingoni atani jaka máteruni! Indecha engaksï ánchikuarhini jaka, Jakobueri familiestiksï, ka arhinhasïndiksï israelitecha. Ka indecha engaksï ánchitaani jaka, ejipsiuestiksï. Israelitechaksï indecheri jántspiristia. ¿Néna ísï úkuarhiski?

Jakobueri familia uánikua uéxurhini sési irekaspti Ejiptu. Jose, enga sáno májkueni kʼéri ambepka eska Faraoni, kuájchakuasïrendi. Peru Jose uarhistia. Ka niáraspti juramuni máteru Faraoni, enga no uékauenga israelitechani.

I Faraoni no sési úri, jántspiri uáspti israelitechani. Ka peeraspti máru achatichani engaksï no sési kámpiaenga ka engaksï no pʼamojpienga para israelitechani ánchitaani. Íksï, afuersaksï ánchitarhasïrendi israelitechani, para iretechani úkuani Faraonini. Peru israelitechaksï méntku uánipaxapti. Tátsekua, ejipsiuechaksï chéspti eskaksï israelitecha jukari uánipiringa ka eskaksï niárapiringa uinhapikua jatsini.

¿Mítiskiri ambe úspi Faraoni? Uandajpaspti uarhitichani engaksï israelitechani jarhuatauenga ambakintani, ka arhiaspti: ‘Uándikua je iámindu tatakechani engaksï andajpenuaka’. Peru uarhiticha ambakiti kʼuiripuespti, ka nóksï uándikuasïrendi.

Jimbosï Faraoni juramukupti iretani: ‘Uándikua je iámindu tataka israelitani. Ka tsípiti jurajkua je nanakaechani’. ¿Nori exesïni eska i ambe no sési jarhaspka? Ju exeni néna tsípiti pakaraspi charhaku ma.