¿MÍTISKIRI néchani jingoni uandontskuarhixaki Jakobu? Jakobu uánikua jurhiatikua xanharasptia ka exeaspti indechani jimesïsï enga posu ma japka. Íksï imecheri karichichani eranguaxapti ka Jakobu kurhamarhiaspti: ‘¿Nanijtsï anapueski?’.

Imaksï arhispti: ‘Arani anapueskachi’.

Jakobu kurhamarhiaspti: ‘¿Mítiskijtsï Labanini?’.

Imaksï arhispti: ‘Jo’. ‘Ka exe, ixú jurhaxati uájpa Rakeli, tátemberi karichichani jingoni.’ ¿Exexakiri Rakelini jurhani jarhani?

Enga Jakobu exepka Rakelini jurhani jarhani Labaniri karichichani jingoni, jirejiresï kénditaspti posurhu anapu tsakapuni parakaksï karichicha úpiringa itsïmani. Jimajkani Jakobu putinharhikuspti Rakelini ka eianguspti néspi ima. Rakeli kánikua tsípispti, ka níntaspti chenemba ka eianguspti i ambe tátembani.

Labani kánikua tsípispti enga Jakobu chenemba pakarapiringa. Ka májkueni tsípispti enga Jakobu ístu arhipka eska uékasïrenga Rakelini jingoni tembuchani. Peru Labani kurhakuspti, eska sieti uéxurhini ánchikuarhipiringa imani jingoni, Rakelini jimbo. Jakobu ísï úspti, jimboka kánikua uékasïrenga Rakelini. Joperu enga niárapkia jurhiatikua paraksï tembuperani, ¿mítiskiri ambe úkuarhispi?

Labani íntskuspti Leani, uátsï kʼérini ka no Rakelini. Enga Jakobu uékapka ánchikuarhini máteru sieti uéxurhini Labanini jingoni, ístu íntskuspti Rakelini. Imani jurhiatikuechani jimbo, Tata Diosï jurajkusïrendi achatini para jatsiani máteru témbechani. Peru iásï eska na uandajka Biblia, jatsistiksï para májku témbani jatsini.